Bəhruz Quliyev: "Bu, həqiqətən də Ermənistana bir dividenddir"
Baş nazir Nikol Paşinyan Ermənistan və Azərbaycanın Tavuşda delimitasiya haqqında protokol-təsvirinin imzalanmasını böyük uğur adlandırıb. Bu barədə Ermənistan mətbuatı məlumat yayıb.
Paşinyan hökumətin iclasında qeyd edib ki, "Bu, Ermənistanın suverenliyinin və təhlükəsizliyinin daha da möhkəmləndirilməsi üçün təməl daşı olub. Müstəqillik tarixində ilk dəfədir ki, Ermənistanın rəsmən delimitasiya edilmiş sərhədi var. Bu, Ermənistan-Azərbaycan sərhədinin bütün perimetri boyunca təhlükəsizlik və sabitliyin səviyyəsini əhəmiyyətli dərəcədə artıracaq".
Xatırladaq ki, mayın 15-də iki ölkənin sərhədində Ermənistan və Azərbaycanın baş nazirlərinin müavinləri Mher Qriqoryanın və Şahin Mustafayevin sədrliyi ilə delimitasiya komissiyalarının doqquzuncu iclası keçirilib. Yekun olaraq 1976-cı ilin xəritələri əsasında bir neçə yaşayış məntəqələri arasında birbaşa sərhədin delimitasiyasına dair protokol imzalanıb.
"Delimitasiya ermənilər üçün göydəndüşmədir və Paşinyan bununla özünü, gələcəyini, ölkəsini sığortalayır"
Sözügedən məsələni "Bakı-Xəbər"ə şərh edən "SƏS" Media Qrupunun rəhbəri, politoloq Bəhruz Quliyevin fikrincə, Paşinyanın razılaşmanı ciddi uğur hesab etməsi müsbət tendensiyadır: "Bu, həqiqətən də Ermənistana bir dividenddir. Çünki Ermənistan faktiki olaraq ilk dəfədir ki, sərhədlərinin delimitasiyasını edir. Delimitasiya o deməkdir ki, artıq sərhədə hüquqi status verir. Yəni Ermənistan sərhədləri tanınır. Ermənistan bilir ki, Azərbaycan istənilən vaxt ata-baba yurduna gələ bilər. Ona görə də delimitasiya Ermənistan üçün göydəndüşmədir və o özünü, gələcəyini, ölkəsini sığortalayır. Əgər sülh danışıqları prosesində hər hansı əngəllər yaranarsa, Azərbaycan öz ata-baba torpaqlarının geri qaytarılmasını gündəmə gətirə bilər. Qeyd edim ki, Paşinyan bir neçə dəfə, hətta torpaqlarımız işğal altında olanda da Azərbaycan ərazisinin 86.6 min kvadrat km olmasını bəyan edib. O bunu açıq şəkildə bəyan etməklə, bir tərəfdən guya bizim gələcəkdə ata-baba torpaqlarımıza qayıtmaq istəyimizi əngəlləyirdisə, digər tərəfdən də dolayısı ilə Azərbaycan torpaqlarının Ermənistan tərəfindən işğal faktını təsdiqləyirdi. Yəni bir tərəfdən bizim torpağımızın indiki vəziyyətini tanımaqla, ərazimizin yalnız bu qədər olduğunu göstərir. İndiki gedən proseslər isə, yəni sərhədlərin delimitasiya, demarkasiyası məsələsi həm Ermənistanın təhlükəsizliyini, həm də gələcəkdə qorxusunun qarşısını alan bir amildir. Ona görə də əgər bunlar sülh danışıqları prosesində erməni oyunpozanlığı etməsələr, bu proses regionda sülhün, sabitliyin təmin olunması, ümumiyyətlə Cənubi Qafqazda təhlükəsizliyin qorunması istiqamətində atılan addımdır".
Vidadi ORDAHALLI
