Turan Rzayev: "Keçmişi qətliamlarla zəngin olan Fransa, görünür, növbəti soyqırıma imza atmaq niyyətindədir"
Məlum olduğu kimi, Yeni Kaledoniyanın yerli xalqı olan kanaklar Fransa zülmünə, müstəmləkə siyasətinə qarşı ayağa qalxıb. Belə ki, adada bir müddətdir davam edən etiraz aksiyaları son günlər şiddətli toqquşmalara çevrilib.
Kanak xalqına ikili standartlar tədbiq edən, assimilyasiya siyasəti yeridən Fransa açıq şəkildə bu xalqın hüquqlarını pozur. Baş verən iğtişaşlar fonunda üç nəfər ölüb, yüzlərlə yaralı, həbs olunanlar var. Fransa hər keçən gün bu xalqa qarşı repressiyaları gücləndirir. Yeni Kaledoniya hadisələri Fransanın hərbi müdaxiləsidir. Müstəqillik tərəfdarı olan 20 nəfərin ev dustağı edildiyini açıqca dedilər. Üstəlik, ada informasiya blokadasına alınıb. Tiktok bağlanıb. Adaya 1500-dən çox jandarm qüvvəsi yeridilib. Faktiki olaraq kanak xalqı genosidə məruz qalır.
Vaxtilə Fransa bütün dünyaya car çəkirdi ki, guya Qarabağda ermənilərə genosid mühiti yaradılıb, blokadaya alınıb. Guya ermənilərin İravana getmələrinə imkan verilmir və s. Gah çalışdı BMT Təhlükəsizlik Şurası Azərbaycana qarşı qətnamə qəbul etsin, gah da çalışdı ki, Beynəlxalq Məhkəmə qondarma "genosid"lə bağlı qərar qəbul etsin. Həmin o Fransa bu gün həqiqi genosid mühitini Yeni Kaledoniyada formalaşdırır. Ora çoxsaylı hərbçinin yeridilməsi, 200 nəfərdən çox şəxsin həbs edilməsi buna əyani sübutdur. Cəmi 231 min əhalisi olan adaya gör nə qədər ordu yeridiblər.
"Paris keçmiş separatçı rejimin "liderləri" ilə təmaslar qurub, onları açıq şəkildə dəstəkləyirdi"
Sözügedən məsələni "Bakı-Xəbər"ə şərh edən politoloq Turan Rzayev hesab edir ki, Fransa Əlcəzair xalqına qarşı törətdiyi soyqırımın bənzərini Yeni Kaledoniyada kanaklara edir: "Fransanın daxili işlər naziri Jerar Darmanin Bakını Yeni Kaledoniyadakı iğtişaşlara "müdaxilə etməkdə" ittiham edib. Ancaq onun bununla bağlı Azərbaycana qarşı səsləndirdiyi ittihamlar gülünc və absurddur. Rəsmi Bakı heç bir ölkənin daxili işinə qarışmır. Fransadan fərqli olaraq, Azərbaycan bu ölkənin ərazi bütövlüyünə hörmət edir. Halbuki, Paris keçmiş separatçı rejimin "liderləri" ilə təmaslar qurub, onları açıq şəkildə dəstəkləyirdi. Azərbaycan, Fransadan fərqli olaraq, separatizmə yox deyir, xalqların öz müqəddəratını təyinetmə hüququna hörmət edir. Parisin adada etdikləri, sözün əsl mənasında, beynəlxalq hüquqa ziddir. Misal üçün, bazar ertəsi Fransa parlamenti adada 10 ildən çox yaşayan Fransa vətəndaşlarına yerli seçkilərdə səsvermə hüququnun verilməsinə səs verib. Yerli liderlərin bəziləri bu dəyişikliyin kanakların adanın işlərində söz sahibi olmaq hüququnu azaldacağından narahatlıqlarını ifadə edib. Fransa illərdir onsuz da adada keçirilən referendumlara müdaxilə edir, səsverməni saxtalaşdırır. Son addım isə gələcəkdə adanın Fransadan ayrılması üçün keçiriləcək ehtimal referendumların nəticəsinə təsir etmək məqsədi daşıyır. Fransa bir vaxtlar Əlcəzair xalqının azadlıq hərəkatına etdiyi müdaxiləni, törətdiyi soyqırımın bənzərini Yeni Kaledoniyada kanaklara edir. Keçmişi qətliamlarla zəngin olan Fransa, görünür, növbəti soyqırıma imza atmaq niyyətindədir. Bu siyasətə qarşı çıxan, kanak xalqının haqq səsinin eşidilməsinə dəstək olan Azərbaycanı isə Paris separatizmə dəstəkdə ittiham etməyə çalışır".
Vidadi ORDAHALLI
