Faiq Ələkbərli: "Onların bu cür siyasətinin arxasında Azərbaycanın varlığına qısqanc münasibətləri, çirkin niyyətləri dayanır"
Fars şovinstləri Azərbaycanı qaralamaqdan əl çəkmək istəmirlər. Əksinə, günü-gündən "dozanı" bir az da artırırlar. Bir tərəfdən Azərbaycanla dostluqdan, əməkdaşlıqdan, yaxınlaşmadan danışırlar, başqa bir tərəfdən də ölkəmizə çirkab atırlar.
Azərbaycan ərazilərini işğaldan azad etdikdən sonra qonşu ölkənin rəsmilərinin, qeyri-rəsmi şəxslərinin, keçmiş diplomatlarının bizə qarşı kin-küdurəti daha da qabarıb. Azərbaycanın yürütdüyü müstəqil siyasətdən elə narahat olublar ki, bu narahatlıqlarını bizə böhtan atmaqla, qara yaxmaqla, müəyyən hədə yolu ilə ifadə edirlər. Ermənidən çox erməni olmaqda maraqlı olan din qardaşlarımız antiazərbaycan siyasətini dayandırmaq istəmir.
Azad İran Teleqram kanalının yaydığı məlumata görə, İranın İtaliyadakı keçmiş səfiri, antiazərbaycan açıqlamaları ilə tanınan Əbülfəz Zöhrəvənd "Şəbab Press" saytına müsahibəsində deyib ki, Azərbaycan əhalisinin 99%-dən çoxu şiədir.
Kanal qeyd edir ki, keçmiş səfir riyakarlıqla Azərbaycan Prezidenti İlham Əliyevin ölkədə Qərb siyasətini və düşüncəsini təbliğ etdiyini iddia edib.
Kanal şərhində vurğulayır ki, Azərbaycanda müsəlmanlara və şiələrə qarşı "təzyiqlər" göstərilməsi iddiasını ortaya atan bədnam diplomat utanmazcasına Azərbaycan dövlətini "sionist" siyəsəti icra etməkdə günahlandırıb.
Keçmiş səfir "Biz Azərbaycanın müsəlman ölkələri ilə qardaşlıq əlaqələrinin olmadığını və İsrailin Qəzza və Rəfahda müsəlmanları qətlə yetirdiyi bir vaxtda bu ölkənin "sionist"lərə dəqiq mövqe nümayiş etdirdiyini görürük. Azərbaycandan antiislam siyasətinə son qoymasını və şiələrin həbsi ilə bağlı açıqlama verməsini istəyirik" - deyə o sərsəmləyib.
Ekspert rəyinə keçməzdən əvvəl keçmiş səfirə, şovinst diplomata xatırladaq ki, onun ölkəsindən fərqli olaraq, Azərbaycan dövləti daim müsəlman həmrəliyi, islam dünyasının birliyi naminə çalışıb və ortaya gerçək nümunələr qoyub. Onu da üzdəniraq diplomatın yadına salaq ki, bir neçə gün əvvəl Şuşada "Xarıbülbül" VII Beynəlxalq Musiqi Festivalının açılışında Azərbaycan Prezidenti "Biz İslam həmrəyliyi istiqamətində ardıcıl fəaliyyət göstəririk. Azərbaycan İslam dünyasının birləşməsi, İslam həmrəyliyinin gücləndirilməsi üçün böyük səylər göstərir" bəyanatını verdi. Beləliklə, Azərbaycanın islam aləmi ilə bağlı mövqeyi aydındır. Buna baxmayaraq, yenə də panfarsistlər ölkəmizə qarşı əsassız ittihamlar irəli sürürlər.
"Azərbaycan dünyəvi bir dövlətdir, islama münasibəti də ancaq islami dəyərlərə əsaslanır"
AMEA-nın Fəlsəfə və Sosiologiya İnstitutunun aparıcı elmi işçisi, fəlsəfə doktoru, BAO sədrinin müavini, siyasi ekspert Faiq Ələkbərli "Bakı-Xəbər"ə şərhində bildirdi ki, Azərbaycanın bir dövlət olaraq islam dininə, müsəlman dünyasına münasibəti dəqiq və aydındır. "Azərbaycan islam aləmində həmrəyliyin, qardaşlığın, dostluğun tərəfdarıdır. Azərbaycan bu məsələdə Türkiyə, Türk Dövlətləri Təşkilatı, İslam Konfransı təşkilatı ölkələri ilə çox sağlam, müsbət əlaqələr qurub və bu münasibətlər də davam etməkdədir. Azərbaycanın istər türk, istərsə də islam dünyasındakı mövqeyi obyektivdir, qardaşlığa, humanizmə, sülh və əmin-amanlığa əsaslanır. Ancaq Azərbaycanın islam dünyasında tutduğu doğru, obyektiv yolu görmək istəməyən əsas ölkələrdən biri İran İslam Respublikası adlanan ölkədir. Azərbaycan öz müstəqilliyini bərpa etdikdən sonra, çox təəssüflər olsun ki, bu ölkə 34 il ərzində bizə qarşı daim qərəzli mövqe tutub. Doğrudur, ara-sıra öz mahiyyətlərini gizlətməyə çalışsalar da, bütövlükdə Tehran rejimi Azərbaycana qarşı münasibətdə nəinki ikili, deyərdim ki, çoxüzlü və riyakar münasibətlərini ortaya qoyub. Bu da qəbuledilməzdir. Bu ölkənin müxtəlif təmsilçiləri tərəfindən Azərbaycana qarşı qeyri-səmimi münasibət ortaya qoyulur. Onlardan biri də İranın İtaliyadakı keçmiş səfiridir ki, o da Azərbaycanı əsassız olaraq ittiham etməklə ölkəmizin həm islam aləmində, həm də regionda mövqeyinə kölgə salmağa cəhd göstərir. Onların bu cür siyasətinin arxasında Azərbaycanın varlığına qısqanc münasibətləri, çirkin niyyətləri dayanır"-deyə bildirən F.Ələkbərli hesab edir ki, şiə "qardaşlarımızın" bizi əsassız ittiham etməsinin arxasında dayanan amillərdən biri də Azərbaycanın dünya dövlətləri ilə qurduğu qarşılıqlı əlaqələr və münasibətlərdir, Azərbaycan regionun güclü dövlətidir. Onun sözlərinə görə, dövlətimizin güclü olması, müstəqil siyasət yürütməsi isə molla rejimini narahat edir. "Prezident Əliyevin Şuşada bəyan etdiyi kimi, Azərbaycan islam həmrəyliyinin gücləndirilməsi istiqamətində ardıcıl fəaliyyət göstərib. Bu gün də o siyasəti davam etdirməkdədir.
Amma bu şovinst diplomat kimilərinin xəyalından keçir ki, Azərbaycan özünü sırf şiə təəssübkeşi kimi göstərməlidir və İranın yürütdüyü siyasətin çərçivəsində addımlar atmalıdır, əlbəttə, bu mümkün deyil. Azərbaycan özünü nə şiə, nə sünni, nə də hər hansı bir məhzəbçi dövlət kimi aparır, Azərbaycan dünyəvi bir dövlətdir, islama münasibəti də ancaq islami dəyərlərə əsaslanır. Bu başqa cür də ola bilməz. Azərbaycanın islam dövlətlərinə münasibətinin əsasında islami prinsiplər dayanır. Yəni burada şiə-sünni məzhəbçiliyi, yaxud hansısa bir məzhəbçilik yoxdur, olmayacaq da. Bu prinsipi biz 1918-ci ildə qurulan Azərbaycan Cumhuriyyətində də görürük və bunu da davam etdiririk, davam etdirəcəyik".
Azərbaycanda heç bir dini ayrıseçkilik olmadığını, məzhəblər arasında fərq qoyulmadığını deyən F.Ələkbərli vurğuladı ki, insanlar etdikləri əməllərə görə qanun qarşısında cavab verirlər. "Buna hansısa bir şiə məzhəbçiliyi anlamında yanaşıb, öz əməllərinə görə cəza çəkənləri "şiələrin həbsi" kimi qələmə vermək yolverilməzdir.
Aydındır ki, Azərbaycan islama və digər bütün məsələlərə münasibətdə obyektiv fikir ortaya qoyduğuna görə irançılar, panfarsistlər ölkəmizi əsassız yerə tənqid edir. qeyri-obyektiv şəkildə İsrail məsələsini ortaya atır. Azərbaycanın İsrailə, ABŞ-a və digər ölkələrə münasibəti də bəllidir. Azərbaycan Qərbyönümlü siyasət yürütmür, dünyəvi, insani, humanist siyasət yürüdür. Bunun da kökündə, şübhəsiz ki, azərbaycanlılığımız, türklüyümüz, islamlığımız dayanır. Bunların da mahiyyətində məhz bəşəri, dünyəvi dəyərlərə əsaslanmaq dayanır. Yoxsa hansısa bir Qərbyönümlü siyasətdən söhbət getmir"-deyə F.Ələkbərli bildirdi.
İradə SARIYEVA
