Qabil Hüseynli: "Çünki, Azərbaycan güclü lider tərəfindən idarə olunur"
Bu gün Gürcüstan və Ermənistanda baş verən prosesləri bir çox mətləblərə işıq salır. Gürcüstan Cənubi Qafqazın mühüm tranzit ölkəsidir. 2003-cü ildə bu ölkədə xarici dəstəklə "Qızılgül inqilabı" adı altında hadisələrin baş verməsi heç kimə sirr deyil.
30 ildən çox qonşu dövlətin ərazisini işğal edən, nəticədə Türkiyə ilə dövlət sərhədi hələ də bağlı olan, dənizlərə heç bir çıxışı olmayan, həmçinin də səbəb olduğu müharibəyə görə regionun bütün mühüm layihələrindən kənarda qalan Ermənistanda da hal-hazırda müxtəlif siyasi qüvvələrin öz maraqlarını həyata keçirməyə çalışması məlumdur. Ermənistanda hazırda davam edən etiraz aksiyaları da ölkə xaricindən idarə edilərək Gürcüstanda sınanmış eyni texnologiya və metodlarla aparılmaqdadır.
Hal-hazırda Cənubi Qafqazın iki ölkəsi Gürcüstan və Ermənistanda vəziyyət yenidən qarışmaqdadır. Gürcüstanı "Xarici təsirin şəffaflığı haqqında" qanun layihəsinin parlamentdən keçməsini qəbul etməyən kütlələrin etiraz dalğası bürüyüb.
Ermənistanda isə Azərbaycanla sərhədlərin demarkasiya prosesinin tərkib hissəsi olaraq 4 kəndin Azərbaycana qaytarılmasını heç bir vəchlə qəbul etməyənlərin etiraz dalğası mayın 9-da paytaxt İrəvana da sıçrayıb və etirazlara başçılıq edən arxiyepiskop Baqrat Qalstanyan Ermənistanın baş naziri Nikol Paşinyanın istefasını tələb edir.
Faktiki olaraq, hər iki ölkədə Qərblə Rusiya münasibətləri meydanda aydınlaşdırır. Qərbin və Rusiyanın müəyyən dayaqlarının Azərbaycanda da olması sirr deyil. Onda isə bizdəki stabilliyin sirri nədədir. Eyni coğrafiyada olan ölkələrdə baş verən bu fərqli təzahürlər nə ilə izah oluna bilər?
Politoloq Qabil Hüseynli "Bakı-Xəbər"ə açıqlamasında bildirdi ki, digər iki Cənubi Qafqaz ölkəsindən fərqli olaraq Azərbaycandakı vəziyyətin obyektiv səbəbləri var: "Gürcüstan və Ermənistanda Rusiya əlində olan mövqelərini güzəştə getmək istəmir. Qərb də öz təsir imkanlarından istifadə edərək, həmin ölkələrdə möhkəmlənməyə çalışır. Hər iki ölkədəki mübarizə fərqli mövzular ətrafında aparılır. Gürcüstanda QHT-lərə qarşı yeni qanun layihəsinə, Ermənistanda isə kəndlərin Azərbaycana verilməsinə etiraz edilir. Əslində, bunlar bəhanədir. Dava geopolitik maraqlar uğrundadır. Gürcüstanı uzun müddətdir ki, İvanaşvili adlı milyarder idarə edir. O, sırf Rusiyanın maraqlarını ifadə edir. Qərb Gürcüstana nə qədər güzəştə getsə də, İvanaşvili "bizim öz yolumuz var" deyir. Ermənistanda isə Rusiya kilsəni ortaya atır. Ermənistan konstitusiyasında dinin dövlətdən ayrı olduğu qeyd olunsa da, ölkənin hər küçəsində "keşiş üsyanları"-na rast gəlinir. Təbiidir ki, belə hərc - mərcliyin olmasında zəif idarəetmə amili də var. Həmin güclərin Azərbaycanda da dayaqları var. Ancaq biz onların ölkənin işlərinə aktiv müdaxiləsini hiss etmirik. Çünki, Azərbaycan güclü lider tərəfindən idarə olunur. Biz öz milli maraqlarımızı heç kimə güzəştə getmirik. Yeri gələndə İrana da, Qərbə də, Rusiyaya da sözümüzü deyib, etirazımızı edirik. Ölkənin xarici siyasət kursunu özü müəyyən etməlidir. Zəif siyasi iradə olanda dediyiniz ölkələrdəki vəziyyət yaşanır".
Məhəmmədəli QƏRİBLİ
