Ermənistanın xarici işlər naziri Ararat Mirzoyan Azərbaycanla sülh sazişinin imzalanması yönümündə növbəti yanlış və qərəzli mülahizələr söyləyib. Nazir Azərbaycanı sülh sazişinin imzalanmasına hazır olmamaqda günahlandırıb.
Bunu “Bakı-Xəbər” Media Qrupunun rəhbəri, politoloq Aydın Quliyev öz Facebook səhifəsində yazıb.
A.Quliyev daha sonra yazır:
Mirzoyan deyib ki, martın 13-də hər iki tərəf saziş mətni üzərində işə yekun vurulduğunu bəyan etsə də, Ermənistan sazişi elə bu an imzalamağa hazır olduğunu bəyan etsə də, sazişin imzalanma vaxtını və yerini müəyyənləşdirmək üçün müzakirəyə hazır olsa da Azərbaycan hələ bu mətni imzalamağa hazır olması ilə bağlı konkret bəyanat verməyib. Mirzoyan yekun qənaətə gəlir ki, Azərbaycan sazişi imzalamağa hazır deyil. Üstəlik Mirzoyan Azərbaycanın imzalanma üçün əlavə hansısa şərtlər (?) ortaya qoyduğunu da iddia edib.
Bəs Azərbaycan razılaşdırılmış saziş mətnini imzalamağa niyə həvəs göstərmir? Azərbaycanın sülhə hazır olmadığı barədə iddialar Mirzoyanın növbəti uydurmasıdır. Azərbaycanın guya hansısa yeni şərtlər açıqladığı barədə deyilənlər də tam yalandır. Azərbaycanın şərtləri dəyişməyib. Ermənistan məhz özünün sülhə hazır olmadığını gizlətmək üçün yalanlar uydurur. Azərbaycanın dəyişməyən şərtləri Minsk Qrupunun buraxılması barədə Ermənistanın bəyanat verməsi, hüquqi aktlardan Azərbaycana qarşı ərazi iddialarını ehtiva edən maddələrin çıxarılması və sərhədlərdə 3-cü qüvvələrlə bağlı birmənalı şəffaf mövqe ortaya qoyulmasıdır. Ermənistan Minsk Qrupunu rəsmən buraxmaqla sübut etməlidir ki, Dağlıq Qarabağ münaqişəsini artıq bitmiş sayır. Konstitusiyada dəyişikliklər etməklə dünyanı inandlrmalı və öhdəliyini təsdiqləməlidir ki, gələcəkdə də Azərbaycana qarşı hər hansı ərazi iddiasında olmayacaq. Nəhayət, sərhədlərdə 3- cü qüvvələr məsələsində Ermənistan rəhbərliyi hələ də yayındırıcı və qeyri - şəffaf mövqe tutmaqda davam edir. Nümunə üçün XİN müavini Ovanesyanın fikirlərini göstərmək olar. Ovanesyanın sözlərindən belə çıxır ki, Ermənistan rəhbərliyi saziş mətnini qəbul etsə də,reallıqda Avropa Birliyinin missiyasından imtina etmək fikrində deyil. Ermənistan XİN Avropa missiyasının yeni statusu üzərində iş aparır. Əvvəlcə dedilər ki, sərhədlərin delimitasiya prosesinə uyğun qaydada Avropa missiyası sərhədlərdən çıxarılacaq. Yəni əvvəlcə delimitasiya olunmuş sərhəd hissələrindən missiya üzvləri çıxarılacaq, sərhəddin qalan yerlərində saxlanılacaq. Aydın görünür ki, Ermənistan delimitasiya prosesinin illərlə, bəlkə də on illərlə davam edəcəyi müddətdə missiyanın sərhədlərdə saxlanmasına çalışır. Təbii ki, Azərbaycan bu mövqeni qəti şəkildə rədd etdi. İndi Ermənistan rəhbərliyi Avropa birliyinin missiyası üçün "yeni status" deyilən yeni oyun düşünüb. Nazir müavini Azərbaycanla Sazişdən sonra Avropa missiyasını Azərbaycanla sərhədlərdən Ermənistanın dərin içərilərinə doğru çəkəcəklər ilə bağlı Avropa ilə danışıqlar aparılacağını bildirib. Əcəb oyundur… Avropa missiyası əslində yenə də Ermənistanda saxlanılır. İndiyə kimi iddia edirdilər ki, missiya təhlükəsizlik məsələsinə görə bölgəyə gətirilib. Belə də sual yaranır: Missiya deyildiyi kimi Ermənistanın içərilərinə doğru geri çəkiləcəksə, onun adı niyə "sərhəd missiyası" adlandırılmalıdır? Kim təminat verəcək ki, həmin missiya istənilən vaxt sərhəddin istənilən yerində peyda olmayacaq? Ümumən, əgər Ermənistan real sülhdə maraqlıdırsa, saziş imzalanandan sonra Avropa birliyinin missiyasına bu bölgədə nə ehtiyac qalır?!...
Beləliklə, açıq görünür ki, Ermənistan rəhbərliyinin guya bu andaca sülh sazişi imzalamağa hazır olduğu barədə fikirlər "baş aldatmaq cəhdindən" başqa bir şey deyil və bununla Azərbaycanın sülh sazişini imzalamağa guya hazır olmadığını göstərmək istəyir...
Tahir TAĞIYEV
