Türkiyə Prezidenti Rəcəb Tayyib Ərdoğan ölkədəki yaşanan son hadisələrlə bağlı "X" sosial şəbəkəsində paylaşım edib.
"Sizə bir daha xatırlatmağı faydalı hesab edirəm...
Sol təşkilatları, marjinalları, vandalları yanınıza alaraq küçələrə çıxıb milli iradəyə barmaq silkələmə dövrü bitdi.
Siyasətin və ədalətin küçə terroruyla idarə edildiyi günlər köhnə Türkiyə ilə keçmişdə qaldı.
Türkiyə demokratik ölkədir, hüquq dövlətidir; Alilərin qanununun deyil, qanunun aliliyinin hökm sürdüyü müstəqil ölkədir.
Cəsarətiniz varsa, qoyun demokratiya işləsin, qanun işləsin.
Ürəyiniz varsa, qoyun məhkəmələr heç bir təzyiqə məruz qalmadan türk milləti adına qərar versin.
Qoyun ağla-qara, günahsız və günahkar qanunla üzə çıxsın.
Siz qəbul etsəniz də, etməsəniz də...
Türkiyədə heç kim qanun çərçivəsindən kənarda deyil.
Türkiyədə cinayət törətmək azadlığına malik olan imtiyazlı bir azlıq yoxdur və olmayacaq.
Demokratiyadan, hüquqdan, qanuni əsaslardan kənar həll yolları axtaranlar bu günə qədər həmişə uğursuzluğa düçar olublar və inşallah bundan sonra da məqsədlərinə çata bilməyəcəklər.
CHP və tərəfdarlarının təxribatlarla ictimai asayişi pozmasına, millətimizin dincliyini pozmasına qətiyyən imkan verməyəcəyik.
Biz Türkiyə üzərindən əməliyyat aparılmasına, sosial mühəndislik yolu ilə 85 milyon insan arasında yeni nifaq divarları tikilməsinə dözməyəcəyik.
Min ildir olduğu kimi, ələvisi-sünnisilə, kürdü-türküylə, lazı-çərkəzilə bu torpaqların üzərində birlikdə, qardaşca yaşamağa inşallah davam edəcəyik.
Bir olacağıq, bərabər olacağıq, birlik içərisində olacağıq, diri olacağıq; Biz öz maraqlarını qorumaq üçün 85 milyonun qardaşlığına pusqu quranları birlikdə məğlub edəcəyik" – deyə Ərdoğan paylaşımda bildirib.
ZÜMRÜD
