Türkiyənin "Qlobal panorama" qəzetində "Cənubi Qafqazda sülhə ümid yaranır" başlıqlı Azərbaycan - Türkiyə qardaşlığının ruhuna və Ermənistanın hazırda apardığı siyasətin mahiyyətinə qətiyyən uyuşmayan məqalə çap olunub. Doğrusu, belə yazının qardaş ölkənin mediasında çap olunması o qədər inanılmaz görsənir ki, az qala buna erməni mediasının növbəti təxribatlarından biri demək istəyirsən. Ancaq bu böyüklükdə yalan olur? Yalansa, bu gün çap olunmuş xəbərə niyə qardaş ölkədən hər hansı reaksiya verilməyib?
Bunu “Bakı-Xəbər” Media Qrupunun rəhbəri, politoloq Aydın Quliyev öz Facebook səhifəsində yazıb.
A.Quliyev daha sonra yazır:
Əgər erməni mediasının yaydığı xəbər düzdürsə, qardaş ölkəmizin mediası həqiqətən bu məqaləni çap edibsə, onu yazan da, çap edənlər də Azərbaycanın, Türkiyə - Azərbaycan qardaşlığının və elə Türkiyənin özünün də düşmənləridir, Ermənistanın isə dostlarıdır…
Məqalədən bir neçə cümləni xatırlatmaq yetər: "Paşinyan hökuməti böyük müqavimətə və daxili çətinliklərə baxmayaraq, Azərbaycanla sülh prosesinə özünün realist yanaşmaq qabiliyyətini nümayiş etdirdi. Azərbaycan rəhbərliyi isə, əksinə, heç tərəddüd etmədən sərt ritorika aparır, beləliklə Ermənistanla sülhü təhlükəyə atır və Cənubi Qafqazda Türkiyənin normallaşma prosesinə münasibətini pozur... Türkiyə bu şəraitdə Ermənistanla sərhədi açmalı və səfirliyini açmağa qərar verməlidir. Ermənistanın Orta Dəhlizə qoşulmasını təmin etmək üçün mümkün olan hər şeyi etməlidir"…
Məncə qardaş Türkiyə mətbuatında yazılan məqalənin arxasında düşmən barmağının olduğuna əmin olmaq üçün bu iqtibaslar kifayətdir...
Ən bağışlanmaz nüans, əslində Azərbaycana böyük zərbə odur ki, Paşinyanın bütün təxribatçı antisülh fəaliyyətlərinə baxmayaraq, məqalə müəllifi Paşinyandan bölgəmiz üçün "sülh fədaisi " düzəldir, əksinə, bütün çabalarına rəğmən Azərbaycan rəhbərliyinin fəaliyyəti pozuculuq kimi qiymətləndirilir.
"Qlobal panorama" qəzetinin Türkiyədə nəşr olunan bir erməni qəzeti olduğunu da inkar etmək olmaz. Bu hələ bilinmir. Ancaq erməni qəzetidirsə, yəni onun sahibi ermənidirsə, məsələn, Karo Paylan kimi, onun indiyə kimi hazırkı Türkiyə iqtidarının əleyhinə nəsə yazıb-yazmadığı maraq mövzusudur…
Bütün hallarda qardaş ölkədən bu təxribatçı və düşmən məqaləyə kəskin münasibətin bildirilməsinə böyük ehtiyac var...
Tahir TAĞIYEV
