Prezident İlham Əliyev Qoşulmama Hərəkatının Əlaqələndirmə Bürosunun Bakıda keçirilən “Qoşulmama Hərəkatı: meydana çıxan çağırışlarla mübarizədə birgə və qətiyyətli” mövzusunda Nazirlər görüşündə Fransanın fəaliyyətini kəskin tənqid edib:
“Təəssüf ki, Fransa Azərbaycanın Qarabağ bölgəsində erməni separatizmini dəstəkləyərək, geosiyasi rəqabət, xarici hərbi mövcudluq və “Orientalizm” müstəmləkəçilik siyasəti ilə Cənubi Qafqaz regionunda da eyni mənfur təcrübəni tətbiq etməyə çalışır”.
Prezident bildirib ki, özünü yalandan insan haqlarının və beynəlxalq hüququn müdafiəçisi kimi qələmə verən Fransa hələ də digər ölkələrin daxili işlərinə qarışır: “Fransa qoşunlarının bu yaxınlarda Mali və Burkina-Fasodan çıxarılması onun Afrikadakı amansız neokolonializm siyasətinin uğursuzluğa məhkum olduğunu bir daha göstərdi”.
Fransanın “Orientalizm” müstəmləkəçilik siyasətini Cənubi Qafqaz regionunda tətbiq etmək istəyinin əsl mahiyyətinin ifşa olunmasında Prezidentin fikirlərinin nə kimi əhəmiyyəti var?
Politoloq Ramiyyə Məmmədova “Bakı-Xəbər”ə açıqlamasında bildirdi ki, sözügedən Hərəkat 1961-ci ildə yaranıb: “Azərbaycan Qoşulmama Hərəkatına sədrliyi üzərinə götürən ölkə kimi çox uöurlu fəaliyyət göstərdi. Prezidentin bu Hərəkatın qarşısında qoyduğu hədəflər onda ibarətdir ki, hər bir ölkənin suverenliyi və ərazi bütövlüyü tanınmalıdır. Biz son 30 il ərzində belə təzahürlərin fəsadını yaşamışıq. Baş verənlər göstərdi ki, belə amillərlə mübarizə aparmamaq hədəf seçilən dövlətin tam məhvinə səbəb ola bilər. Azərbaycan bu məsələdə müqavimətini göstərdi. 30 il ərzində aparılan mübarizənin bəhrəsi oldu. Görürük ki, bəzi ölkələr öz simasını dəyişmir. Rusiya kimi ölkə yenə də belə cəhdlərini davam etdirir. Müharibədən dərhal sonra öz sülhməramlılarını tələsik ora yerləşdirməsi və mandatına uyğun fəaliyyət aparmaması bir çox həqiqətləri üzə çıxarmış olur. Ermənistanın da belə niyyətləri var. Bunların sırasına İranı da əlavə edə bilərik. Bəzən bu ölkənin rəsmiləri belə suverenliyimizə təhdid sayılan addımlar atırlar. Hazırda Fransa da bu istiqamətdə fəallıq göstərir. Prezidentin bu çıxışı ona dəlalət edir ki, müstəqil ölkələr öz suverenliyini qorumaq üçün sona qədər mücadilə verməlidir. Prezident mesaj verir ki, biz bütün məkrli niyyətlərdən xəbərdarıq. Əslində bu gün NATO-nun da genişlənmək cəhdi başqa ölkələrin işlərinə müdaxilə baxımından Rusiyadan heç nəyi ilə fərqlənmir. Qoşulmama Hərəkatı bu çağırışlarla bağlı birgə fəaliyyət ortaya qoysa, müdaxilə ilə bağlı ciddi proseslərin qarşısı birgə səylərlə alına bilər”.
Politoloqun sözlərinə görə, BMT-dən sonra ikinci ən böyük beynəlxalq təsisat olan hərəkata sədrlik, xüsusilə də sədrliyin daha bir il uzadılması ölkəmizin qlobal səylərinin beynəlxalq ictimaiyyət tərəfindən dəstəklənməsinin növbəti nümunəsi idi: “2019-cu ildə Hərəkata sədrliyi öz üzərimizə götürərkən də Prezident İlham Əliyev bəyan etmişdi ki, Azərbaycan beynəlxalq arenada üzv ölkələrin maraqlarının müdafiə edilməsi üçün əməli addımlar atacaq, həmrəyliyin gücləndirilməsini və qarşılıqlı dəstəyi rəhbər tutacaq. Bu mənada Azərbaycan Prezidenti Qoşulmama Hərəkatının sədri kimi nəyi dedisə, onu da həyata keçirdi. Azərbaycan Hərəkatın institusional inkişafına güclü dəstək verdi. Ölkəmizin sədrliyi dövründə Qoşulmama Hərəkatının Parlament Şəbəkəsi, həmçinin Gənclər Təşkilatı yaradılması bunun əyani sübutudur. Hazırda hərəkatın qadınlar platformasının yaradılması üzərində iş gedir. Təsadüfi deyil ki, məhz Azərbaycanın sədrliyi dövründə hərəkatın tarixində ilkə də imza atıldı - Qoşulmama Hərəkatı ilə əks qütblərdə yer alan Avropa İttifaqının rəsmisinin zirvə görüşündə iştirakı və çıxışı baş tutdu”.
Məhəmmədəli QƏRİBLİ
