Prezident İlham Əliyev yerli televiziya kanallarına müsahibəsində bildirib ki, keçirdiyimiz iztirablara, ağrılara, bizə əziz olan hər şeyin dağıdılmasına baxmayaraq, biz sülh barədə danışırıq: “Bu, həm siyasi baxımdan, həm də insaniyyət baxımından asan deyil. Lakin bunun Azərbaycanın uzunmüddətli maraqlarına uyğun olduğunu başa düşdüyümüz üçün biz bunu təklif edirik”.
Ölkə başçısı deyib ki, bu bir müddət masa üzərində olacaq: “Sonra, necə deyərlər, xüsusi fəallıq göstərməyəcəyik. İstəmirlər - heç lazım da deyil. Delimitasiyanı istəmirlər – heç lazım da deyil. Deməli, sərhəd bizim lazım bildiyimiz yerdən keçəcək. Lakin mən artıq belə terminlərdən istifadə etməyə məcburam. Sərhəd delimitasiya edilməyib, bəs kim deyir ki, sərhəd buradan deyil, oradan keçir? Mən hesab edirəm ki, buradan keçir. Mənim bunu demək üçün əsaslarım var – tarixi, kartoqrafik əsaslar. Buna görə bu məsələ bizdən çox onları maraqlandırmalıdır”.
Göründüyü kimi, ölkə başçısı sülh danışıqlarını sabotaj edən Ermənistana olduqca ciddi məzmunda xəbərdarlıq edir. Ermənistan bundan özü üçün hansı nıticələri çıxarmalıdır?
Siyasi şərhçi Turab Rzayev “Bakı-Xəbər”ə açıqlamasında bildirdi ki, Azərbaycan sərhədlərin dəqiqləşməsinə xüsusi önəm verir: “Xatırlayırsınızsa, 44 günlük müharibə bitən kimi Azərbaycan bu istiqamətdə səylərə başladı. Hətta təklif etdi ki, Qarabağ məsələsini kənarda saxlamaqla, iki ölkə arasındakı sərhədin dəqiqləşməsini apara bilərik. Azərbaycan bu istiqamətdə önəmli addım da atdı. İşğaldan azad edilən Ermənistanla sərhəd sayılan rayonlarımızda Milli Ordu deyil, Sərhəd Qoşunlarının şəxsi heyəti yerləşdirildi. Bununla dünya ictimaiyyətinə həmin ərazilərin iki ölkə arasındakı sərhəd olduğu nümayiş edildi. Həm də, bizim müharibə etmək kimi fikrimizin olmadığını nümayiş etdirdi. Fərqli platformalarda keçirilən bir çox görüşlərdə sərhədlərin müəyyənləşməsinin hansı ilin xəritəsi əsasında aparılacağı müzakirə predmeti oldu. Ermənistan tərəfi və vasitəçiliyi həyata keçirən Rusiyanın öz funksiyasını lazımi səviyyədə həyata keçirə bilməməsi bu qeyri-müəyyən vəziyyəti yaratmış oldu. Sonra Avropa İttifaqı təşəbbüsü ələ aldı. Hətta deyərdim ki, onların vasitəçiliyi ilə uğurlu nəticələr də əldə edildi. Bu formatda olan görüşlərin birindən sonra sərhədlə bağlı komissiyanın yaradılması haqda qərar qəbul edildi. Ancaq Ermənistanın destruktiv fəaliyyətinə görə proseslər sona çatdırıla bilmədi. Rusiya prosesi pozmağa çalışdı, Fransa özünü formata salmaq istədi”.
Ekspertin sözlərinə görə, bundan sonra Azərbaycan ortaya konkret iradə qoymağa başladı: “Sərhədlərin dəqiqləşməsi bizim üçün olduqca önəmlidir. Cünki Ermənistan bu prosesi uzatmaqla, faktiki olaraq bu münaqişənin ömrünü uzatmağa çalışır. Bu başa çatarsa, ölkələr arasında sərhəd münaqişəsi qalmayacaq. Yalnız Qarabağdakı separatçılarla bizim aramızda xırda problemlər qalacaq. Avropa İttifaqı hətta bunun üçün lazım olan vəsaitin bir hissəsini də öz üzərinə götürmüşdü. Ermənistanın prosesi açıq sabotaj etməsi bizə əsas verir ki, sərhədi istədiyimiz yerdən çəkək. Əlbəttə, biz bununla haqsızlıq da etmək istəmirik. Prosesi öz əlimizdə olan xəritələr vasitəsilə apara bilərik. Hər iki tərəf prosesdə iştirak edəndə isə ortaq nəticəyə gəlinir. Yəqin ki, Ermənistan bununla razılaşmayacaq. Yaxşı olardı ki, Ermənistan bəri başdan bu proseslə bağlı konstruktivlik göstərsin. Bu, həm də sərhədlərdə ola biləcək kiçik toqquşmaların qarşısını alardı. Sentyabr döyüşlərində Ermənistan belə bir dərsi aldı. Hesab edirəm ki, Ermənistan ölkə başçımızın bu xəbərdarlığından ciddi nəticələr çıxarmalıdır. Əks təqdirdə, proseslər Prezidentin dediyi istiqamət üzrə cərəyan edəcək”.
Məhəmmədəli QƏRİBLİ
