Ermənistanın BMT-də məlum cəhdlərinə baxmayaraq, Laçın yolu ətrafında yaranmış vəziyyətlə bağlı erməni tərəfinin həyasızlığı səngimək bilmir. İndi də erməni hüquq müdafiəçiləri, ombudsmanlar belə tezis ortaya atıblar ki, guya BMT-nin tanınmamış dövlətlərlə bağlı da öhtəliyi var.
Ermənistanın keçmiş ombudsmanı, hüquq müdafiəçisi Larisa Alaverdyan öz aləmində bunu belə əsaslandırıb: “BMT-nin təkcə tanınmış dövlətlər deyil, həm də tanınmamış Qarabağ qarşısında öhdəlikləri var. Bu gün biz mübarizə aparmalı, təzyiq göstərməli, hakimiyyətdən xalqın vahid iradəsinin həyata keçirməsini təmin etməyi tələb etməliyik. Gedib BMT ofisinin yanında deyil, hökumət binası qarşısında mitinq təşkil etməliyik. Təsəvvür edin ki, hansısa ştatda hakimiyyət xalqın tələbini yerinə yetirmək istəmir, bu halda BMT susmalıdır? BMT ofisinin aksiya təşkil etməsi tələb olunur. Çünki bu strukturun təkcə tanınmış dövlətlər və orada yaşayan insanlar deyil, həm də tanınmamış “dövlət”lər qarşısında öhdəlikləri var. Dünyanın hər hansı bir yerində yaşayan bir şəxs və ya bir qrup insan BMT-ni narahat etməlidir”.
Doğrudanmı BMT-nin tanınmamış ərazilərlə bağlı belə bir öhdəliyi var?
“Hər hansı separatçı rejimlə bağlı, tanınmamış ərazilərlə bağlı BMT-nin heç bir öhdəliyi yoxdur”
Məsələyə münasibət bildirən Aydınlar Partiyasının sədri, hüquqşünas Qulamhüseyn Əlibəylinin fikrincə, erməni hüquq müdafiəçilərinin bununla bağlı ortaya atdığı tezis sadəcə uydurmadır: “Bu, növbəti erməni həyasızlığının və uydurmasının bir formasıdır. BMT ayrı-ayrı üzv dövlətlərdən ibarətdir. Həmin dövlətlərin BMT qarşısında öhdəliyi var. O cümlədən, insan hüquqları ilə bağlı. Çünki insan hüquqları haqqında BMT-nin ümumi bəyannaməsi var. Mülki və siyasi hüquqlar haqqında paktlar var ki, üzv olan dövlət həmin paktlara qoşulur. Daha sonra həmin paktlara uyğun üzərinə müəyyən öhdəlik götürür. Ancaq hər hansı separatçı rejimlə bağlı, tanınmamış ərazilərlə bağlı BMT-nin heç bir öhdəliyi yoxdur. BMT sadəcə olaraq üzv dövlətlər qarşısında müəyyən öhdəlik daşıyır. O mənada ki, həmin dövlətlərin suverenliyinin müdafiə olunması, ərazi bütövlüyünün, təhlükəsizliyinin müdafiə olunması istiqamətində BMT müəyyən qərarlar qəbul edə bilər. 1993-cü ildə BMT Təhlükəsizlik Şurası Azərbaycanla bağlı 4 qətnamə qəbul etdi. Düzdür, həmin qərarlar kağız üzərində qaldı. Ancaq bu qərarlar bizim üçün hüququ baza idi. Baş verənlər onu göstərir ki, erməni saxtakarlığının həddi-hüdudu yoxdu. İstənilən vaxt beynəlxalq qərarları təhrif edə bilərlər. Ona görə də narahat olmağa dəyməz. Çünki onların irəli sürdüyü tezislərin hüquqi əsası yoxdu. Düzdür, Laçın yolu ilə bağlı məsələ ilə bağlı BMT-də bir dəfə müzakirələr aparılıb. Humanitar dəhlizlə bağlı çağırışlar səslənib. Azərbaycan onsuz da ora humanitar yüklərin getməsinə mane olmur. Sadəcə, ekofəallar etiraz edirlər. Bunun da səbəbi bəllidir. O yoldan təyinatına uyğun olmayan məqsədlər üçün istifadə edilməsi yolverilməzdir. Erməni tərəfi də buna əməl etməlidir. Biz imkan verə bilmərik ki, təbii sərvətlərimiz qanunsuz olaraq talan edilsin, ekoloji normalar pozulsun”.
Vidadi ORDAHALLI
