Qarabağdakı separatçıların yeni lideri kimi özünü təqdim edən erməni əsilli milyonçu Ruben Vardanyan Xankəndidə Fransanın “Marianne” və “La Vie” jurnallarına müsahibələr verib. O, Azərbaycanın “blokadası” ilə bağlı vəziyyəti təqdim edib.
Ruben Vardanyan “Marianne” jurnalına verdiyi müsahibədə Qarabağdakı ermənilərin öz “ata-baba” torpaqlarında yaşamasını təmin etmək üçün Azərbaycana təzyiq göstərməyə çağırıb. Ruben Vardanyan qeyd edib ki, 2020-ci ilin 44 günlük müharibəsindən bəri Azərbaycan çox aqressiv davranış nümayiş etdirir. Ruben Vardanyan qeyd edib ki, əgər ətraf mühitin mühafizəsi həqiqətən Bakını narahat edirsə, o zaman onlar BMT-nin nümayəndələrindən ibarət beynəlxalq ekoloji ekspertlər komissiyasını qəbul etməyə hazırdır.
O vurğulayıb ki, yalnız beynəlxalq təzyiq Rusiya sülhməramlılarına mandat verə bilər və ərzaq və dərman ehtiyacları humanitar hava dəhlizi ilə göndərilə bilər.
Vardanyan Rusiyanın adamıdırsa, Fransa və Qərb mediası ona niyə belə dəstək ifadə edir? Bu amil Rusiyanı narahat edə bilərmi?
Media məsələləri üzrə ekspert Müşfiq Ələsgərli “Bakı-Xəbər”ə bildirdi ki, erməni diasporunun və beynəlxalq erməni şəbəkəsinin üzvləri olan erməni əsilli milyarderlər Ermənistanın Azərbaycana qarşı yürütdüyü siyasəti öz maraqları konteksində dünya ictimaiyyətinə sırımaq üçün çox böyük işlər görürlər: “Bu sahədə Ruben Vardanyan tək deyil. Bir neçə erməni əsilli milyarder var ki, Azərbaycana qarşı siyasəti alovlandırırlar və ermənilərin xəyali maraqlarının təmin olunması üçün ciddi şəkildə cəhd göstərirlər. Bu sırada Vardanyanla yanaşı biz Vartan Serakisyanın, Kaspar Karapetyanın və başqa milyarderlərin də adını çəkə bilərik. Məsələ burasındadır ki, baxmayaraq ki neqativ işlə məşğuldurlar, onlar öz işlərini müasir texnologiyalar baxımından yüksək səviyyədə qura biliblər. Ruben Vardanyan Rusiya milyarderi kimi gedirsə və gəlib Qarabağda oturub separatçılara rəhbərlik edirsə, Seraksyan və Kaspar Karapetyan da öz işlərini Avropada oturub yürüdürlər. Çox təəssüflə qeyd etmək lazımdır ki, onlar neqativ mənada əməlləri baxımından həm də Avropada müəyyən işlər görüb, mexanizmlər qura biliblər”.
Ekspertin sözlərinə görə, bu adamlar Avropanın siyasi çevrələrini, kütləvi informasiya vasitələrini, vətəndaş cəmiyyəti instutlarını ələ ala biliblər: “Hətta Avropanın siyasi institutlarına, dövlətlərarası təşkilatlarına da nüfuz edə biliblər. Məsələn, erməni milyarder Kaspar Karapetyan Avropa parlamentində mövcud olan Ermənistanla dostluq qrupunun üzvlərini maliyyələşdirən bir şəxsdir. Avropa parlamentində 30-dan çox Ermənistanla dostluq qrupunun üzvləri var. Bu dırnaqarası dostluqdur. Əslində onlar Kaspar Karapetyanın və Vardan Serakesyanın milyarder dostlarıdırlar. Bu milyarderlərin sifrişi əsasında Ermənistanın xeyrinə, Azərbaycanın ziyanına olan bəyanatları gündəliyə gətirib qəbul etdirə bilirlər. Bu şəbəkə həm də Avropada media qurumlarını, kütləvi informasiya vasitələrini, müəyyən vətəndaş cəmiyyətli QHT - ləri də ələ ala biliblər. Baxmayaraq ki, onların bu cür QHT - lə əməkdaşlıq etməsi qanunsuz maliyyə üzərində qurulub, amma onlar öz işlərini lobbiçilik maraqları, lobbiçilik mexanizmləri üzərində formulə edə bilirlər. Qeyd edək ki, bu yaxınlarda Avropa parlamentinin sədr müavini yunan əsilli siyasətçi Eva Kaylı həbs olundu. Onu korrupsiya əməlinə görə həbs etdilər. Amma o da bilinir ki, Eva Kaylı Avropa parlamentində Ermənistanla dostluq qrupunun üzvü idi və Kaspar Karapetyan tərəfindən maliyyələşdirilən şəxslərdən biri olub. Bu cür məsələlərə, yəni pul məsələsi, lobbiçilik məsələsinə, qanunsuz maliyyələşmə konteksində Ermənistan və Qarabağ separatçılarının müəyyən əməllərinə Avropada ələ alınmış media qrupları, beynəlxalq statuslu QHT və siyasi mərkəzlər dəstək olur. Bəzən olur ki, onların maraqları üst-üstə düşmüş olur. Fransanın özünün Azərbaycana qarşı maraqları bəllidir. O, Qafqaza, Qarabağa daxil olmaq istəyir. Azərbaycan isə buna razılaşmır. Bu baxımdan onlar həm də erməni milyarderlərlə əməkdaşlıq edirlər. Çünki onların işləri, maraqları üst-üstə düşür. Bu baxımdan onlar Avropada da öz işlərini qura bilirlər. Dediyimiz kimi, nəinki KİV qurumları ilə, eyni zamanda beynəlxalq statuslu QHT-lər və siyasi instutlarla, hətta dövlətlərarası təşkilatlarla əməkdaşlıq edib bu təsir mexanizmlərini qura bilirlər. Amma məsələnin ikinci bir tərəfi var ki, onlar uzun müddət bu işləri gizlin şəkildə həyata keçirirdilər, bilinmirdi bu məsələ necə ortaya çıxır. Amma Azərbaycan tərəf bütün bu faktları əldə edib ictimailəşdirir artıq. Əgər bu mexanizmlər bəlli olubsa, deməli onlara qarşı tədbir görülməsi də mümkün olacaq”.
Məhəmmədəli QƏRİBLİ
