27 dekabr 2022-ci il tarixində Azərbaycan Respublikasının Xarici İşlər Nazirliyində 2022-ci ilin yekunlarına dair mətbuat konfransı keçirilib. Mətbuat konfransında Xarici İşlər Nazirliyinin rəhbər heyəti, yerli media nümayəndələri, həmçinin Azərbaycanda akkreditə olunmuş xarici jurnalistlər iştirak edib.
Xarici İşlər Nazirliyindən verilən məlumata görə, mətbuat konfransında çıxış edən Azərbaycan Respublikasının xarici işlər naziri Ceyhun Bayramov 2022-ci il üzrə xarici siyasətimizin əsas istiqamətləri və əldə olunmuş nəticələrlə bağlı konfrans iştirakçılarına ətraflı məlumat verib.
Azərbaycan Respublikasının bir çox dövlətlərlə diplomatik əlaqələrinin qurulmasının 30-cu ildönümünün qeyd olunduğu 2022-ci il ərzində ikitərəfli münasibətlərin daha da inkişaf etdirilməsi istiqamətində tədbirlərin görüldüyü bildirilib. Bu xüsusda, həm qonşu ölkələrlə, həm də digər dövlətlərlə siyasi, iqtisadi, mədəni, humanitar və s. sahələr üzrə səmərəli əməkdaşlıq münasibətlərinin inkişafının diqqət mərkəzində saxlanıldığı qeyd olunub.
Azərbaycanın il ərzində beynəlxalq təşkilatlar, o cümlədən Birləşmiş Millətlər Təşkilatı (BMT), Qoşulmama Hərəkatı (QH), Türk Dövlətləri Təşkilatı (TDT), Avropa İttifaqı (Aİ), Avropada Təhlükəsizlik və Əməkdaşlıq Təşkilatı (ATƏT), İslam Əməkdaşlıq Təşkilatı (İƏT) və s. təşkilatlar çərçivəsində aktiv fəaliyyət göstərdiyini bildirən nazir Ceyhun Bayramov beynəlxalq sülh, təhlükəsizlik və inkişafın bərqərar edilməsi istiqamətində səylərə verilən töhfələrdən bəhs edib.
Regionda, o cümlədən dünyada iqtisadi, energetika, nəqliyyat və humanitar sahələrdə həyata keçirilən layihələrin təşəbbüskarı və iştirakçısı kimi Azərbaycanın rolunun artdığını bildirən nazir Ceyhun Bayramov qlobal enerji təhlükəsizliyinin təmini, regional nəqliyyat və kommunikasiyalar sahəsində fəaliyyətin inkişafı istiqamətində görülən işlər, o cümlədən Azərbaycanın beynəlxalq səviyyədə humanitar yardım və inkişafa dəstək fəaliyyəti barədə konfrans iştirakçılarını ətraflı məlumatlandırıb.
Post-münaqişə dövründə diplomatik fəaliyyət, Azərbaycan Ermənistan münasibətlərinin normallaşması, sülh gündəliyinin təşviqi istiqamətində görülən işlərdən geniş bəhs edən nazir Ceyhun Bayramov, ölkəmiz tərəfindən bölgədə nəqliyyat-kommunikasiya əlaqələrinin bərpası, ərazilərimizdə aparılan qeyri-qanuni iqtisadi fəaliyyətin qarşısının alınması, münaqişədən sonra regionda yaranmış vəziyyət haqqında dünya ictimaiyyətinin məlumatlandırılması, beynəlxalq məhkəmələrdə Ermənistana qarşı hüquqi məsuliyyət tədbirlərinin həyata keçirilməsi işlərinin davam etdirildiyini bildirib.
Azərbaycan vətəndaşlarının hüquq və azadlıqlarının qorunması istiqamətində il ərzində İraq və Suriyadan 54-ü uşaq və 14-ü qadın olmaqla, ümumilikdə 68 vətəndaşımızın repatriasiyasının, Ukraynadan isə 16 mindən çox şəxsin təxliyəsinin həyata keçirildiyi diqqətə çatdırılıb.
İl ərzində Xarici İşlər Nazirliyi tərəfindən “Şuşa İli” çərçivəsində tədbirlərin keçirildiyi, xarici siyasətin informasiya təminatı ilə əlaqədar “Diplomatiya Aləmi” jurnalının “Şuşa İli”nə həsr olunmuş xüsusi buraxılışının nəşr edilməsi, o cümlədən işğaldan azad olunmuş ərazilərə xarici jurnalistlərin mətbuat turlarının təşkil edildiyi vurğulanıb.
Nazir Ceyhun Bayramov Xarici İşlər Nazirliyinin kadr potensialının inkişafı məqsədilə mərkəzləşdirilmiş qaydada müsabiqə prosesinin təşkil edildiyini, 500-ə yaxın ümumi namizəddən bütün imtahan mərhələlərini uğurla keçən 67 namizəddən 38 nəfərin işə qəbul olunduğunu, digər namizədlərin yaxın aylarda diplomatik xidmətə qəbulunun nəzərdə tutulduğunu bildirib.
Ermənistanla sülh müqaviləsi, delimitasiya və kommunikasiyaların açılması bir-birindən ayrı proseslərdir.
AZƏRTAC xəbər verir ki, bunu xarici işlər naziri Ceyhun Bayramov ilin yekunları ilə bağlı keçirdiyi mətbuat konfransında deyib.
Moskvada danışıqların üçüncü raundunun keçirilməli olduğunu diqqətə çatdıran nazir əlavə edib: "Ermənistan bir gün əvvəl sülh müqaviləsi ilə bağlı öz təkliflərini açıqladı. Bir gün sonra Ermənistanın baş naziri Nikol Paşinyan dedi ki, bu təkliflə sülh müqaviləsini imzalamaq olar. Bu, ictimaiyyətə mesaj vermək xətrinə verilən açıqlamadır".
Nazir deyib ki, bir çox hallarda Ermənistan rəhbərliyi daxili auditoriyaya hesablanmış açıqlamalar verir.
“Ermənistanın öz milli maraqları baxımından praqmatik addımlar ataraq öhdəliklərini yerinə yetirməsi, ilk növbədə, onun özünə faydalı olar. Biz Ermənistanın üzərinə götürdüyü öhdəliklərini yerinə yetirməsinə səy göstərməyə davam edəcəyik”, - deyə nazir vurğulayıb.
Ceyhun Bayramov həmçinin qeyd edib ki, Beynəlxalq Ədalət Məhkəməsində və Avropa İnsan Hüquqları Məhkəməsində Azərbaycan tərəfinin Ermənistana qarşı şikayətləri üzrə tədbirlər görülür.
Nazir deyib ki, Moskvada keçirilməli olan üçtərəfli görüşün növbəti raundunu Ermənistan tərəfi pozdu. Onun sözlərinə görə, ümumilikdə, keçirilən bu görüşlərdə əldə olunan proqres məhduddur.
“Bunun əsas səbəbi Ermənistan tərəfinin atdığı qeyri-konstruktiv addımdır”, - deyə nazir bildirib.
Ceyhun Bayramov onu da bildirib ki, 2023-cü ilin əvvəlində Azərbaycan tərəfindən Ermənistana qarşı ətraf mühitə, canlı təbiətə vurulan ziyana, təbii yataqlarımızın istismarına dair yeni iddialar irəli sürüləcək.
Qarabağda yaşayan etnik ermənilərin Azərbaycanda yaşamaq hüququ olduğunu deyən XİN rəhbəri Azərbaycanın bunu dəfələrlə qeyd etdiyinə diqqət çəkib. Onun sözlərinə görə, Azərbaycan bu dialoqun aparılmasına açıqdır.
“Bu istiqamətdə bir sıra addımlar atılır və bu davam edəcək. Məqsədli şəkildə kimlərsə bu prosesə müdaxilə edirsə, ləkəli keçmişə malik olan insan bölgəyə göndərilirsə, bu, prosesə vurulan zərbədir. Azərbaycan bunun qarşısını almaq iqtidarındadır və alacaq da",- deyə nazir qeyd edib.
Bayramov xatırladıb ki, qanunsuz silahli birləşmələrin Qarabağdan çıxarılması Ermənistanın öhdəliyidir. "Biz danışıqlar zamanı bu məsələni qaldırırıq və qaldırmağa da davam edəcəyik. Bu, həqiqətən də Ermənistanın öhdəliyidir və o, bu öhdəliyi pozur. Ermənistan buna paralel olaraq, bölgədə davamlı gərginlik yaradır. Bir çox hallarda Qarabağda gərginliyə səbəb qanunsuz silahlı birləşmələrin oradakı fəaliyyətidir”, - nazir deyib.
XİN rəhbəri deyib ki, yalnız sülh müqaviləsi ilə bağlı deyil, bir sıra digər istiqamətlərdə də Ermənistan tərəfi müzakirə mövzusu ilə bağlı məqamları ictimai məkana sızdırır ki, bu da özlüyündə ziyanverici addımdır.
"Bu, sosial şəbəkələr vasitəsilə edilir. Birincisi, bunu sızdırmaq danışıqlar prosesinə çox ziyanlıdır. İkincisi isə bu, qarşı tərəfin mövqeyini əks etdirmir", - nazir qeyd edib.
“Azərbaycanın Ruben Vardanyanla təmasları heç vaxt olmayacaq” – deyən nazir qeyd edib ki, gələcəkdə də yerli əhali ilə təmaslar olacaq.
“Azərbaycanın Qarabağdakı etnik ermənilərlə təmasları ilə bağlı adlar çəkilərsə, o şəxslərə qarşı təzyiq arta bilər. Bu cür təmaslar olub”,- deyə nazir əlavə edib.
C.Bayramov bildirib ki, Rusiya sülhməramlı kontingentinin gündəlik fəaliyyəti ilə bağlı isə hər hansı sənəd yoxdur.
“Rusiya sülhməramlı kontingentinin gündəlik fəaliyyəti ilə bağlı hər hansı sənəd yoxdur. Hazırda belə bir sənəd üzərində də iş aparılmır”, - deyə nazir əlavə edib.
Xarici işlər naziri Ermənistan-Azərbaycan sərhədində Aİ-nin monitorinq missiyasından da danışıb. Bildirib ki, iki ay ərzində Avropa İttifaqının (Aİ) 40 mülki şəxsdən ibarət missiyası delimitasiya olunmayan Ermənistan-Azərbaycan sərhədində monitorinq keçirməli idi. Bu missiya 19 dekabrda başa çatıb. Nazir qeyd edib ki, Avropa İttifaqı tərəfindən yeni missiyanın planlaşdırılması mərhələsi baş tutur.
"Mütəxəssislər yeni missiya ilə bağlı planlaşdırmanı həyata keçirir. Bu missiya ilə bağlı məsələlər Azərbaycan tərəfi ilə razılaşdırılmalıdır. Baxmayaraq ki, missiya Ermənistan ərazisindədir, ancaq missiya Azərbaycan sərhədi istiqamətində olduğu üçün Azərbaycan tərəfi ilə məlumat mübadiləsi olmalıdır”, - deyə nazir əlavə edib.
Azərbaycanın XİN rəhbəri onu da deyib ki, Ermənistanla delimitasiya prosesində 8 Azərbaycan kəndi qaytarılmalıdır. Bu kəndlərdə azərbaycanlılar yaşayıb və həmin kəndlərin qaytarılması həyata keçirilməlidir.
Nazir qeyd edib ki, Azərbaycan və Ermənistan arasında 30 ildir sərhədlər müəyyənləşməyib. Çünki bu illər ərzində Azərbaycan torpaqları Ermənistanın işğalı altında olub.
"Vətən müharibəsi nəticəsində Azərbaycan ərazi bütövlüyünü, öz sərhədlərinə nəzarəti bərpa edib”, - deyə nazir əlavə edib.
Daha sonra nazir Ceyhun Bayramov media nümayəndələrinin çoxsaylı suallarını cavablandırıb.
