Məlum olduğu kimi, Prezident İlham Əliyev dekabrın 24-də Qərbi Azərbaycan icmasının bir qrup nümayəndəsi ilə görüşüb. Görüş zamanı Prezident İ.Əliyev mühüm mesajlar verdi. Bu mesajların mahiyyəti xalqımızın qədim torpağı olan həmin ərazilərə dair tarixi faktların, ermənilərin köçürülməsi barədə məlumatların dünya ictimaiyyətinə çatdırılması və Qərbi Azərbaycana qayıdış üçün inamımızın sarsılmaz olmasından ibarətdir.
Görüş zamanı dövlət başçısı Qərbi Azərbaycan İcmasının güclənməsi üçün maraqlı ideyalar verdi. Həmin ideyaların həyata keçməsilə Qərbi Azərbaycan İcması daha da güclənəcək, azərbaycanlıların Ermənistanda öz tarixi vətənlərinə qayıdışı prosesinin sürətlənməsinə öz təsirini mütləq şəkildə göstərəcək.
Qeyd edək ki, İ.Əliyevin çıxışında Qərbi Azərbaycan İcması tərəfindən müxtəlif tədbirlərin, müəyyən işlərin görülməsinin planı da təqdim edildi. Aydındır ki, Qərbi Azərbaycan İcmasının fəaliyyəti tam şəkildə dövlətin himayəsi altındadır. Bu sahədə görüləcək işlərə dövlət tərəfindən lazımi dəstək də veriləcək. Ancaq onu da bildirmək lazımdır ki, bizdə qərbi azərbaycanlıların işi ilə məşğul olan bir neçə qeyri-hokümət təşkilatı səviyyəsində qurumlar var. Əsas olaraq Azərbaycan Qaçqınlar Cəmiyyətinin balansında yaradılan Qərbi Azərbaycan İcmasının fəaliyyəti göz önündədir. Maraqlıdır, Qərbi Azərbaycan İcmasından başqa bu istiqamətdə fəaliyyət göstərən təşkilatların fəaliyyəti necə olacaq? Yeni mərhələdə həmin təşkilatları hansı aqibət gözləyir?
“Qərbi Azərbaycandan olan soydaşlarımızın, bu işlə məşğul olan təşkilatların beynəlxalq platformalara çıxışı artmalıdır ki, dünya baş verən hadisələrdən xəbərdar olsun”
Siyasi şərhçi Azər Həsrət “Bakı-Xəbər”ə açıqlamasında qeyd etdi ki, Qərbi Azərbaycanla bağlı baş verən proseslər sevindiricidir: “Uzun illərdir beynəlxalq platformalarda ermənilərlə üz-üzə gəlib, onlara lazımi cavablar verib, faktlarla susdurmuşuq. Ancaq qərbi azərbaycanlılarla bağlı mövzularda əksər vaxtlarda çatışmazlıq hiss olunub. Belə ki, etnik təmizlənmə ilə bağlı mövzularda ordan çıxan şəxslərin danışması, müzakirə aparması daha maraqlı olardı. Düzdür, iştirak edənlər də olub, ancaq yetərincə olmayıb. Beynəlxalq platformalarda qərbi azərbaycanlıların da səsinin gəlməsi daha düzgün olardı. Ölkə başçısı İlham Əliyevin tapşırığı ilə son illər bu sahədə müəyyən işlər görülməyə başlanıb. Danılmaz faktdır ki, Qarabağdan olan şəxslərin beynəlxalq tribunalara çıxışı intensivləşib. Qərbi Azərbaycandan olan soydaşlarımızın, bu işlə məşğul olan təşkilatların beynəlxalq platformalara çıxışı artmalıdır ki, dünya baş verən hadisələrdən xəbərdar olsun”.
Həmsöhbətimiz hesab edir ki, qərbi azərbaycanlıların dünyadan səsinin gəlməsi üçün lazımi işlər görülməlidir. Vətəndaş Cəmiyyətləri elə işlər görməlidir ki, beynəlxalq platformalardan onların səsi gəlsin.
A.Həsrət onu da əlavə etdi ki, ermənilərin son iki yüz il ərzində kütləvi şəkildə Cənubi Qafqaza köçürülməsi ilə azərbaycanlıların öz tarixi torpaqlarında sıxışdırılması tarixi faktdır. Mərhələ-mərhələ gerçəkləşdirilən bu plan nəticəsində azərbaycanlılar indi Ermənistan adlandırılan ərazidən - min illər boyu yaşadıqları öz doğma tarixi torpaqlarından qovularaq kütləvi qətl və qırğınlara məruz qalıb, xalqımıza məxsus minlərlə tarixi-mədəni abidə və yaşayış məskənləri məhv edilib, 2000-dən çox toponimlərin adları dəyişdirilib. Yalnız 1948-1953-cü illər ərzində 150 minə yaxın azərbaycanlı indiki Ermənistan ərazisində öz tarixi torpaqlarından kütləvi surətdə və zorakılıqla deportasiya olunub: “Nəticədə 200 mindən çox azərbaycanlı Ermənistandan qaçqın düşüb. Prezident İlham Əliyev Qərbi Azərbaycan İcmasının bir neçə istiqamət üzrə həm ölkə daxilində, həm də beynəlxalq müstəvidə öz işini davam etdirməsinin zəruri olduğunu vurğuladı. Qarabağ həqiqətləri dünya ictimaiyyətinə çatdırıldığı kimi, Qərbi Azərbaycan həqiqətləri də çatdırılmalıdır. Bu işdə dövlət və icmanın fəaliyyəti ilə yanaşı, qərbi azərbaycanlılarla bağlı yaradılan təşkilatlar da aktiv olmalıdır. Onların fəaliyyəti də artmalıdır”.
Günel CƏLİLOVA
