Dekabrın 22-də Rusiya prezidenti Vladimir Putin fərman imzalayaraq Ruben Vardanyanı ölkə vətəndaşlığından çıxarıb. Novator.az bildirir ki, qərar Ruben Vardanyanın müraciəti əsasında qəbul olunub.
1968-ci ildə Ermənistanın paytaxtı İrəvanda doğulan Ruben Vardanyan Moskva Dövlət Universitetinin iqtisadiyyat fakültəsini bitirib, Rusiyada sərmayə sektorunda fəaliyyət göstərən iş adamı kimi tanınıb, milyarderdir. 2022-ci il sentyabrın 1-də Ruben Vardanyan Rusiya vətəndaşlığından çıxmaq üçün müraciət etdiyini, Qarabağa köçdüyünü açıqlayıb, işğalçı rejimin təhlükəsizliyi və inkişafı üzrə cəbhə yaradıldığını vurğulayıb.
Azərbaycanın Qarabağ bölgəsindəki işğalçı rejimin başçısı Araik Arutunyan noyabrın 4-də Ruben Vardanyanı “dövlət naziri” təyin edib. “Dövlət naziri” işğalçı rejimdə hökumət başçısı sayılır.
Çox maraqlıdır, Putin nəyə görə Vardanyanı vətəndaşlıqdan məhrum etməklə onun separtizmi dəstəkləməsi üçün şərait yaradıb? Bu onların Qarabağ planının tərkib hissəsi sayıla bilərmi?
Uzun müddət Rusiyadakı Azərbaycan diaspor təşkilatlarına rəhbərlik etmiş, ictimai-siyasi xadim Mirkazım Seyidov “Bakı-Xəbər”ə açıqlamasında bildirdi ki, bu çox maraqlı sualdır: “Yada salaq ki, sülhməramlı qüvvələrin Azərbaycana gəldiyi vaxt belə bir müsahibə vermişdim. Demişdim ki, artıq Rusiya Azərbaycana gəlir və uzun müddət burada qalacaq və məskunlaşacaq. Dediklərim təsadüfi sözlər deyildi. Geopolitik vəziyyət bir daha göstərir ki, həqiqətən də belədir. Məlumdur ki, Rusiyanın özü Ukrayna ilə böyük bir müharibə aparır, dünyanın yarısından çoxu da onların əleyhinədir. Rusiya artıq Cənubi Qafqazı birdəfəlik itirmək təhlükəsilə üzləşib. Bu da Ermənistanın satqınlığı və Qərbə üz tutması ilə əlaqədardır. İranla Rusiya münasibətlərində olan bağlılıq isə bir daha onu göstərir ki, Rusiya Qərbdən ciddi təzyiq görərsə, Cənubi Qafqazı itirə bilər. Bunun olmaması üçün də Qarabağ ətrafında çirkin oyunlara gedir. Oyunlardan biri də Vardanyanın Putinin sərəncamı ilə vətəndaşlığının dayandırılmasıdır. Bu ona işarədir ki, Azərbaycan yalnız Türkiyəyə arxalanır. Çünki İran bizim qonşu dövlət olsa da, orada bizim 35 milyon xalqımız olsa belə biz İrandan heç vaxt Türkiyə qədər yaxınlıq görməmişik və bundan sonra da görməyəcəyik. Əksinə, Rusiya-İran münasibətləri də ona dəlalət edir ki, biz işimizi ehtiyatlı tutmalıyıq. Bu gün bizim ekologiyanın üsyanına qalxan, təbii sərvətlərimizin özümüzə aid olmasını istəyən aksiya iştirakçılarını alqışlamalıyıq. Çünki bu da onun bir tərkib hissəsidir ki, Rusiya qoşunlarının təcrid olunmasına xidmət edir. Ancaq Rusiya elə-belə getməyəcək. Mən belə düşünürəm ki, son nəticədə Rusiya Qarabağın ermənilər yaşayan hissəsini neytral zona kimi saxlamaq istəyir. Sonra Rusiyanın Ermənistanda olan hərbi birləşmələrini bizim neytral zonamıza köçürməyi planlayırlar. Bu mənim subyektiv fikrimdi. Bəlkə də səhv edirəm, amma Qarabağ ətrafında baş verən geopolitik siyasətin izlənimlərinə görə biz yaxın gələcəkdə Dağlıq Qarabağı rus sülhməramlılarından xilas edə bilməyəcəyik. Buna görə də, addım-addım bu prosesə doğru getməliyik”.
Məhəmmədəli QƏRİBLİ
