Azərbaycanın Qadın Hüquqlarını Müdafiə Cəmiyyəti nəzdində fəaliyyət göstərən "Qadın: Sülh və Təhlükəsizlik Mərkəzi"-nin rəhbəri Dilarə Əfəndiyeva deyib ki, Qarabağda yaşayan ermənilər üçün yaradılan "qaynar xətt"ə indiyə qədər çox sayda zəng daxil olub:
“Yüzlərlə erməni Bakıya zəng vuraraq Laçın yolunun niyə bağlı olduğunu soruşub. Zəng edən ermənilər məsələ ilə bağlı bizim məqsəd və məramımızı öyrənməyə çalışırlar. Təbii, həmin şəxslərə izah olunur ki, yolu biz bağlamamışıq”.
Maraqlıdır ki, artıq ermənilər Qarabağda rastlaşdığı problemin həlli ilə bağlı Ermənistana deyil, Azərbaycana müraciət edir. Baş verənləri inteqrasiya meyllərinin ilkin simptomları kimi qəbul etmək olarmı?
Azərbaycan Sosialist Partiyasının sədri Elşən Həsənov “Bakı-Xəbər”ə açıqlamasında bildirdi ki, bu məsələyə müxtəlif rakurslardan yanaşmaq olar:
“Təbii ki, indiki halda belə müraciətlərin artmasını, Qarabağda yaşayan erməni icması nümayəndələrinin inteqrasiyaya meylliliyinin güclənməsini, separatçı meyllərdən daha çox, hadisələri real qiymətləndirmək cəhdi kimi dəyərləndirmək olar.
İstər Ermənistan daxilində baş verən prosesləri, istər Avropa dövlətlərinin regionda baş verənlərə münasibətində bəyanat, müraciət və s. formatda təqdim edilən nəzərəçarpacaq dəyişikliklərini, istərsə də Qarabağ ətrafında gedən proseslərdə Rusiyanın əlində sadəcə siyasi oyuncaq olduğunu dərk etməyə başlayan yerli ermənilər artıq siyasi situasiyanın onların əleyhinə işləyəcəyinin fərqindədirlər və yəqin ki, vəziyyətdən çıxış yolu aramaqdadırlar.
Bildiyiniz kimi, Ermənistan hökumətinin Laçın yolunun Azərbaycan tərəfindən bağlanmasına qarşı Avropa İnsan Haqları Məhkəməsinə müraciəti də ermənilərə nəticə əldə etməyə imkan vermədi və bunun bir yalan, Azərbaycan əleyhinə təbliğat məsələlərinə yönəlik addım olduğunu ortaya qoymuş oldu.
Faktiki olaraq, Rusiyanın Ukraynaya müdaxiləsindən sonra onun bütün cəbhə boyunca məğlubiyyətlərə uğraması, iqtisadi böhrana sürüklənərək günü – gündən zəifləməsini müşahidə edərək nəticələr çıxaran Ermənistan, indiki zamanda elə Rusiyanın da ona yükləmiş olduğu ballastları üzərindən ataraq daha sərbəst olmağa çalışır. Əlbəttə ki, Ermənistan rəhbərliyi indiki halda qonşu dövlətlərə qarşı ərazi iddialarının elə Ermənistanın özünə qarşı yönəldiyini aydın şəkildə anlamağa başlayıb ki, bu da həmin dövlətin qurulduğu andan öz siyasi dəst-xəttində 180 dərəcə dönüş yaratmış olur və bu da təqdirəlayiqdir.
Çox güman ki, Ermənistan rəhbərliyinin mövcud reallığı dərk edərək yerli emissarları vasitəsilə Qarabağda məskunlaşmış separatçı qüvvələrə müəyyən siqnallar göndərməsi də Azərbaycana inteqrasiyanın zəruri olduğunu ilkin şərt olaraq özündə ehtiva edir.
Düşünürəm ki, Azərbaycan dövlət başçısı İlham Əliyevin Türkmənistanda keçirilmiş üçtərəfli görüş zamanı işlətdiyi ifadə – Zəngəzur dəhlizinin iyirmi dördüncü ildən etibarən fəaliyyətə başlayacağını qeyd etməsi yaxın iki il ərzində inteqrasiya prosesinin sürətlənəcəyinə mühüm işarədir.
Bu baxımdan yanaşsaq, qaynar xəttə zəng edərək şikayət edən erməni əsilli Azərbaycan vətəndaşlarının Azərbaycan daxilində digər xalqların nümayəndələri ilə dövlət quruculuğunda, ölkənin iqtisadi, mədəni həyatında da birgə addım atacaqları ilə bağlı zənglər edərək müraciətlər edəcəklərinin şahidi olacağıq. Düşünürəm ki, belə müraciətlərin sayı getdikcə artacaq.
O gün çox da uzaqda deyil”.
Məhəmmədəli QƏRİBLİ
