Şuşa-Xankəndi yolunda Azərbaycanın qeyri-hökumət təşkilatları təmsilçilərinin, ictimaiyyət nümayəndələrinin, ekofəalların, ekspertlərin keçirdiyi aksiya bir həftədən çoxdur ki, davam edir.
Aksiyada səslənən tələblər Qarabağdakı əhalinin qaranlıqdan gün işığına çıxması üçün də lazımdır, dövlət də onları öz vətəndaşı kimi qəbul etməyə hazır olduğunu bildirir.
Ancaq təəssüflər olsun ki, bəzi ölkələr bu proseslə bağlı qeyri-səmimi kampaniyalar aparır. Təəssüf ki, bu tora iki baltiktanı ölkə olan Litva və Estonya da düşüb.
Azərbaycan Respublikası Xarici İşlər Nazirliyinin tvitterdəki paylaşımında bildirilib ki, Estoniya Xarici İşlər Nazirliyinin Azərbaycanın Qarabağ bölgəsini köhnəlmiş sovet adı ilə adlandırması qəbuledilməzdir.
Paylaşımda qeyd olunub: “İnsanların əzab çəkmələrinə dair iddialardan qeyri-qanuni iqtisadi fəaliyyətləri ört-basdır etmək və qanunsuz hərəkətlərə qarşı fəaliyyətin qarşısını almaq üçün istifadə etmək, görünür, yeni tendensiyadır. “Blokada şəraitində” avtomobillər keçirsə, yol necə bağlanmış olur?”
Litvanın yersiz bəyanatı ilə bağlı da həm rəsmi, həm də ictimai səviyyədə etirazlar bildirilib.
Bu iki ölkənin belə qərəzli münasibəti nədən qaynaqlanır?
Azərbaycan Naminə Alyans Partiyasının sədri Abutalıb Səmədov “Bakı-Xəbər”ə açıqlamasında bildirdi ki, Litva və Estonyanın nümayiş etdirdiyi mövqe, təbiidir ki, bizi qane eləmir: “Ancaq eyni zamanda həm də anlayırıq ki, erməni təbliğatının təsiri altına düşən yalnız bu ölkələr deyil. Biz həddindən artıq riyakar və hər bir cildə girməyə hazır olan qonşu ilə üz-üzəyik. Ən xırda məsələri də böyüdüb, bizim əleyimizə istifadə etməyə çalışırlar. Təbiidir ki, onların Qərbdəki dəstəkçiləri də böyükdür. Litva və Estoniya kimi ölkələr də bu təbliğatın təsirinə düşüb. Laçın yolunda baş verənləri humanitar fəlakət adlandırırlar. Dəfələrlə deməyimizə baxmayaraq, yenə də köhnə sovet adlarından istifadə edirlər. Buna təəccüblənməməliyik. Əksinə, işimizi bir az da gücləndirməliyik. Sentyabr hadisələri zamanı bizim dost saydığımız Ukrayna ermənilərin böyük sevincinə səbəb olan bəyanat verirsə, onları dəstəkləyirsə və üstəlik də öz vətəndaşlarına Qarabağa səfər etməməyi məsləhət görürsə, bu o deməkdir ki, bizim görəcəyimiz iş həddindən artıq çoxdur. Özünə müxalifət deyən qüvvələr belə bu məsələ ilə bağlı heç bir münasibət bildirmədilər. Heç indinin özündə də Ukrayna bizə lazım olan dəstəyi vermir. Ancaq bizim humanitar yardım kimi göndərdiyimiz generatorlar Rusiyanın ciddi narazılığına səbəb olub. Biz bunu Rusiyanı qarşımıza alaraq, bilə-bilə edirik. Bu, günümüzün reallığıdır. Son dərəcə məkrli düşmən və ədalətsiz dünya ilə üz-üzəyik. Gərgin işləməkdən başqa çarəmiz yoxdur”.
Azərbaycan heç vaxt həmin ölkələrin daxili işlərinə qarışan dövlət siyahısında olmayıb. Əksinə, rəsmi Bakı həmişə Baltikyanı ölkələr - Latviya, Estoniya, Litva ilə strateji dostluğa söykənən münasibətlər qurmaq əzmində olduğunu bildirib və onu əminliklə göstərib. Litva və Estoniya hökuməti öz səhvini anlamalıdır. Məsələnin nə yerdə və haqqın kimin tərəfində olduğunu, həmçinin bölgədə nə baş verdiyini dərindən təhlil edərək məsələyə doğru münasibət bildirməlidir.
Məhəmmədəli QƏRİBLİ
