Laçın yolunun bağlanmasından sonra erməni mediasının müxbirləri Qarabağ erməniləri arasında sorğu keçiriblər. Sualları cavablandıran ermənilər azərbaycanlılardan narazılıq etməyiblər:
“Bizim kənddə sakitçilikdır. Panika yoxdur. Yolun açılmasını gözləyirik. Dörd tərəfdə azərbaycanlılardır. Yuxarıda onların bayrağı görünür, ora onların postlarıdır. Sarıbaba dağında da onlardır. Azərbaycanlılar bizi heç vaxt narahat etməyiblər. Mən bu kənddə yaşayıram. Azərbaycanlılar bizdən 50 metr aralıdır. İndi dostumun yanında qalıram. Yol açılmasa, bilmirəm necə olacaq. Nə Ermənistanda, nə Qarabağda hökumət var. Ona görə belə vəziyyət yaranıb. Bu gün şərtləri Azərbaycan diqtə edir. Biz ancaq qaçırıq. Bizim bir çıxış yolumuz var - hamımız əlimizi qaldırıb deyəcəyik: İlham Əliyev, biz səninləyik”.
Görünən odur ki, separatçıların əli hər yerdən üzüldükcə, oradakı dinc insanlar çıxış yolunu Azərbaycanla normal münasibətlərin qurulmasında görür.
“Qarabağdakı etnik erməni icmasının bütün problemlərinin həlli Azərbaycanla hüquqi, sosial, iqtisadi və siyasi sferalarda əməkdaşlıqdan keçir”
Sözügedən məsələ ilə bağlı fikirlərini “Bakı-Xəbər”lə bölüşən politoloq Elşən Manafov bununla bağlı bir sıra məqamlara toxundu: “Keçmiş Dağlıq Qarabağdakı erməni icması Ermənistanın millətçi dairələrinin, habelə erməni diasporasının separatçı, korporativ maraqlarının girovuna çevrilib. Uzun illərdir həmin dairələr separatizmdən bir alət kimi istifadə edirlər. Azərbaycana təhdid, habelə Xəzərin karbohidrogen ehtiyatlarına nəzarət uğrunda gedən mübarizə Qarabağ layihəsində erməni icmasından ötürücü qayış kimi istifadə zərurəti doğurduğundan, bəlli dairələr erməni icmasının bu oyunlara cəlb olunmasında maraqlı olublar. Belə olmasaydı, hesab edirəm ki, Qarabağ məsələsinin həlli bu qədər uzanmazdı. Qarabağdakı erməni diasporasının, humanitar məsələlər istisna olunmaqla, bəlli dairələrlə münasibətlərində hüquqi zəmində yarada biləcəyimiz məhdudiyyətlər Qarabağ probleminin dövlətin ərazi bütövlüyü çərçivəsində həlli işində mühüm rol oynaya bilər. Qarabağdakı etnik erməni icmasının bütün problemlərinin həlli Azərbaycanla hüquqi, sosial, iqtisadi və siyasi sferalarda əməkdaşlıqdan keçir. Sadəcə problem ondadır ki, millətçilik azarına mübtəla olmuş bu icma ilə davamlı, qarşılıqlı anlaşma və etimada əsaslanan siyasətin aparılması bu gün həllini gözləyən ən vacib problemlərdən biridir. Lakin erməni millətçiləri, habelə regionda, bununla yanaşı Xəzər hövzəsində imperialist maraqları olan qlobal maliyyə mərkəzləri bilərəkdən bu münasibətlərin qurulmasına əngəl yaradir. Beləliklə, Qarabağ kartından uzun müddət üçün yararlanmağa çalışırlar. Ona görə də hesab edirəm ki, Qarabağdakı etnik ermənilər bu cür oyunlara alət olmamalıdılar. Etnik ermənilərin gələcəyi Azərbaycan qanunlarına tabe olmaqdan keçir. Onsuz da Qarabağda separatizmin gələcəyi yoxdur. O baxımdan erməni azlıq xəstə düşüncəli erməni millətçilərinin təsirindən çıxmalıdır. Xarici oyunçuların əlində alət olmamalıdılar. Çünki bunun hansısa perspektivi yoxdur. Əvvəl-axır Azərbaycan Qarabağın digər hissəsinə də nəzarəti bərpa edəcək”.
Bir sözlə, politoloq hesab edir ki, qarşı tərəf reallıqla barışmalıdır.
Vidadi ORDAHALLI
