“Qaynar xətti” yaratmışıq ki, onlar zəng edib bizimlə əlaqə qursunlar, problemlərini desinlər”
Bu günlərdə Dilarə Əliyeva adına Azərbaycanın Qadın Hüquqlarını Müdafiə Cəmiyyəti nəzdində fəaliyyət göstərən "Qadın: Sülh və Təhlükəsizlik Mərkəzi"nin rəhbəri Dilarə Əfəndiyeva mətbuata bildirib ki, Azərbaycanda Qarabağ erməniləri üçün “qaynar xətt” yaradılıb.
“Separatçıların və şəxsən Qarabağdakı quldur rejimin “dövlət naziri” adlandırılan Ruben Vardanyanın Qarabağda yaşayan dinc ermənilərə təzyiq göstərmək üçün bütün cəhdlərinə baxmayaraq, mənə müxtəlif xarakterli çoxlu zənglər gəldi. Bu zənglər hər gün daha da artdı və təkbaşına öhdəsindən gəlmək mümkün olmadığından, “qaynar xətt” yaratmağa qərar verdik”, - deyə o bildirib.
Hüquq müdafiəçisi vurğulayıb ki, çağrı mərkəzi humanitar problemlərlə üzləşəcəkləri təqdirdə Qarabağ ermənilərindən daxil olan müraciətləri operativ şəkildə cavablandırmağa və onların həlli üçün bütün səylərini səfərbər etməyə hazırdır.
Proseslə bağlı Dilarə Əliyeva adına Azərbaycanın Qadın Hüquqlarını Müdafiə Cəmiyyətinin sədri Novella Cəfəroğlu ilə əlaqə saxladıq.
- Novella xanım, sizin cəmiyyətin nəzdində fəaliyyət göstərən “Qadın: Sülh və Təhlükəsizlik Mərkəzi” Azərbaycanda Qarabağ erməniləri üçün “qaynar xətt” yaradıb. Bu “qaynar xətt” hansı məqsədlə yaradılıb?
- Bu “qaynar xətt”in yaradılması zərurət idi. Bilirsiz ki, Qarabağda yaşayan ermənilər müxtəlif iddialar irəli sürürlər, “bizim çıxışımız yoxdur, bizi heç yana çıxmağa qoymirlar” deyirlər. Xankəndi bizim torpağımızdır, orda yaşayanlar isə bizim vətəndaşlarımızdır. Əgər onlar bizim vətəndaşlarımızdırsa onlara dəstək göstərməliyik. Bu gün ermənilər ordan qışqırıb dünyaya car çəkirlər ki, bizi heç yerə buraxmırlar, bizə təzyiq edirlər, xəstəmiz var və sair. Biz də hüquq müdafiə cəmiyyəti kimi bu “qaynar xətti” açdıq ki, sizin nə sözünüz varsa bizə deyin və biz də onu dövlətə çatdıraq, o yoldan sizin xəstəniz də, humanitar yardımlarınız da gəlib keçəcək, özü də o yolu biz bağlamamışıq, o yolu sülhməramlılar bağlayıb.
- “Qaynar xətt”ə müraciət edənlərin sayı çoxdur?
- Bu “qaynar xəttə” ermənilər tərəfindən bir neçə müraciət olunub. Onların müraciətləri üzrə məsələləri həll etdik. Sizə bir məsələni də deyim ki, bizim tandıqlarımız var, illərdir biz onlarla tədbirlərdə görüşmüşük. Onlar da zəng vurublar. Biz onların adlarını deyə bilmərik. Onların zənglərindən də ermənilərin uzun illər qorxu altında yaşadıqlarını, qorxu içində olduqlarını duyuruq. Ermənilər hər zaman qorxu vəziyyətində qalıb. “Biz qorxu vəziyyətində yaşayırıq, hər şeydən qorxuruq” kimi mesajları olub. Belə baxmayın, onlar müharibədən çox qorxurlar…
Çox təəssüf ki, “qaynar xətt”dən istifadə edib söyüş söyənlər də olub. Halbuki, “qaynar xətti” yaratmışıq ki, onlar zəng edib bizimlə əlaqə qursunlar, problemlərini desinlər. Onlar bizim torpağımızda yaşayırlar və bizim vətəndaşlarımızdır. Onlar Azərbaycan vətəndaşlığını qəbul etsinlər. “Qaynar xətlə” dünyaya “onlar bizim vətəndaşlarımızdır” deyirik, yolları biz bağlamamışıq.
- Qarabağda yaşayan ermənilərin müraciətləri əsasən hansı məzmunda idi?
- Əsas istəkləri humanitar yardımla bağlı idi. Deyirdilər ki, bizə humanitar yardım gəlmir, xəstəmiz var, xəstəmizi çıxara bilmirik, uşaqlarla burda qalmışıq. Biz də bunun yalan olduğunu çatdırırdıq.
- Beynəlxalq təşkilatlara?
- Bizə beynəlxalq təşkilatlara yolu bizim bağlamadığımızı çatdırmaq lazımdır. Beynəlxalq təşkilatlar bilsinlər ki, yolu biz bağlamamışıq. Biz. sadəcə olaraq, öz torpaqlarımızda yataqlarımıza baxmaq istəyirik, öyrənmək istəyirik ki, bizim təbiətə ziyan dəyib, ya dəyməyib, ağaclarımız kəsilib, yoxsa yox. Yeri gəlmişkən bir məsələni deyim, 2015-ci ildə mətbuatda dedim ki, ermənilər bizim yataqları qanunsuz olaraq istismar edirlər, onlar barədə materialları geologiya kəşfiyyat idarəsindən götürün və o materail əsasında onları beynəlxalq məhkəməyə verin. Onları Avropa İnsan Hüquqları Məhkəməsinə verin ki, o torpaqlar bizimdir, ermənilər istələr də, istəməsələr də bütün dünya o torpaqların bizim olduğunu qəbul edib. Mənim yataqlarımı onlar istismar edib aparırlar. Onlar məhkəməyə verilməli idilər. İndi bu məsələni qaldırıblar, çox yaxşı. Amma mən bunu 2015-ci ildə demişəm.
- “Qaynar xətt”i yaratmaqla həm də ermənilərə mesaj verirsiz ki, biz xalq olaraq ermənilərlə yanaşı, dinc yaşamağa hazırıq, ermənilər də hazır olmalıdır. Belə demək olar?
- Bəli. Baxın görün, Azərbaycanda neçə xalqın nümayəndəsi, neçə millət var. Ruslar, yəhudilər, gürcülər, tatlar, talışlar, ləzgilər, avarlar, onlardan başqa nə qədər xalqlarla birgə yaşayırıq. Ölkəmizdə yaşayan xalqlar bizim can qardaşlarımızdır. Düzdür? Torpaqlarımızın müdafiəsində də həmin xalqların nümayəndələri bizim uşaqlarla çiyin-çiyinə döyüşüblər. Çünki onlar Azərbaycanı öz vətəni sayırlar. Bu vətən onlarındı da , bizimdi də. Bütün dünyaya deyirik ki, bizim ölkədə bu qədər xalqın nümayəndəsi bizimlə yaşayır, ermənilər də bizimlə yaşayıb, indiyə qədər də hələ 30 min erməni var. Ermənilər də bizim vətəndaşlarımızdır.
...“Qaynar xətt”lə bağlı onu deyim ki, bizim Cəmiyyətin nəzdində bir dənə "Qadın: Sülh və Təhlükəsizlik Mərkəzi" var. Bu mərkəz həmişə Qarabağ məsələsində ermənilərlə söhbət aparırdı. Rəhbəri Dilarə Əfəndiyevadır. Yadınızdadırsa, o vaxt erməniləri bura biz gətirmişdik. Aksiyanın ilk günündən Dilarə Əfəndiyeva orda olub. Birinci dəfə öz telefonunu verib ki, bütün dünya bizim onların vəziyyətinə biganə qalmadığımızı bilsin.
İradə SARIYEVA
