Son vaxtlar Ermənistanın beynəlxalq müstəvidə Azərbaycana yönəlik təşəbbüslərinin ard-arda fiaskoya uğraması diqqət çəkir. Açıq hiss olunur ki, erməni tərəfi Azərbaycana qarşı əvvəlki kimi qərarlar qəbul etdirə bilmir. Son iki ildə bu tendensiya daha qabarıq şəkildə özünü göstərir.
İlk əvvəl Böyük Britaniya parlamentinin Lordlar Palatasında Azərbaycana qarşı qətnamə qəbul etməyə cəhd etdilər. Ancaq Palatada əzici çoxluq bunu rədd etdi və ermənilərin planı alınmadı. Ondan sonra ABŞ Konqresinin Nümayəndələr Palatası Azərbaycana dövlət yardımını qadağan etməklə bağlı ermənipərəst konqresmenlərin təşəbbüslərini qəbul etmədi. Açıq qeyd edildi ki, belə bir qətnamənin qəbul olunması Birləşmiş Ştatların maraqlarına ziddir. Ən nəhayət, Avropa Şurası Parlament Assambleyası (AŞPA) Laçın yolunun bağlanması ilə bağlı ermənilərin qətnamə tələbini rədd etdi. Qeyd edək ki, Vladimir Vardanyan AŞPA Hüquq Komitəsində son hadisələrlə bağlı qətnamə layihəsinin hazırlanmasını xahiş edib. Lakin prosedur qaydalarına zidd olduğu üçün bu xahiş rədd edilib. Vardanyanın daha sonra AŞPA Hüquq Komitəsinin sədrinin qərəzli bəyanat verməsi yönündə təklifi də qəbul olunmayıb.
“Ən əsası odur ki, getdikcə Azərbaycanın dünyada dostlarının sayı artır”
Sözügedən məsələ ilə bağlı fikirlərini “Bakı-Xəbər”lə bölüşən Demokratik Dəyişim Partiyası Təşkilat Komitəsinin sədri Əli Mustafayev erməni tərəfinin uğursuzluqlarını bir sıra faktorlarla əlaqələndirdi: “Bunun bir neçə prinsipial səbəbi var. Əvvəla, dünya klassik anlamda dəyişir. Əvvəlki dünya artıq yoxdur. İndi daha çox qloballaşan dünya var və harda nə baş verirsə, o dəqiqə bilinir. Digər tərəfdən, erməni lobbisi əvvəllər yalan təbliğat hesabına Azərbaycan barədə müəyyən qədər mənfi rəy yaratmışdı. Ancaq illər keçəndən sonra dünya anladı ki, erməni təbliğatı yalan üzərində qurulub. Bu baxımdan əvvəl yaradılan stereotiplər dağıldı. Bu səbəbdən indi dünya ermənilərin ağlaşmasına əvvəlki illərdə olduğu kimi yanaşmır. Başqa bir səbəb ondan ibarətdir ki, Azərbaycan Böyük Britaniya ilə yaxından əməkdaşlıq edir. Biz nəzərə almalıyıq ki, İngiltərə ilə Fransa arasında ənənəvi tarixi rəqabət var. Bu da Azərbaycan-Ermənistan qarşıdurmasına öz təsirini göstərir. Fransa Ermənistanın yanındadır. Bu o deməkdir ki, Böyük Britaniya da Azərbaycanın yanındadır. İngiltərə Türkiyə ilə əməkdaşlıq edirsə, Fransa İranla yaxınlaşır. Necə deyərlər, ortada belə bir rəqabət var. Ona görə də anqlo-saks nüfuz dairəsi olan yerdə ermənilərin fitnə-fəsadı o qədər də işləmir. Səbəb səngərin fərqli tərəflərində olduqlarına görədir. ABŞ-a gəldikdə isə, noyabrda Nümayəndələr Palatasına keçirilən seçkilərdə dəyişikliklər oldu. Ermənipərəst Nensi Pelosinin təmsil olunduğu Demokratlar Partiyası uduzdu. Qısası, Ermənistan-Azərbaycan münaqişəsi təkcə iki dövlət arasında baş vermir. Bu həm də dünya gücləri arasında özünü göstərir. Başqa bir tərəfdən ən əsası odur ki, getdikcə Azərbaycanın dünyada dostlarının sayı artır. Azərbaycanın Avropanın qaz təchizatında artan rolu buna öz müsbət təsirini göstərir. Artıq kortəbii olaraq erməniləri müdafiə etmirlər. Ən nəhayət, Ermənistan regionda öz əhəmiyyətini itirir. Bəlli olur ki, Ermənistan bəlli güclərin əlində bir alət rolunu oynayıb”.
Bütün bunlardan çıxış edən Əli Mustafayev hesab edir ki, Ermənistanın Azərbaycanla bağlı planları fiaskoya uğrayır.
Vidadi ORDAHALLI
