Türkiyə Silahlı Qüvvələrinin Azərbaycandakı Xüsusi Komandanlıq Qrupunun komandanı, general-polkovnik Bəxtiyar Ersay Azərbaycan Müdafiə naziri, general-polkovnik Zakir Həsənovun müşaviri təyin edilib.
O, Müdafiə Nazirliyinin Kollegiya iclasında məhz Zakir Həsənovun müşaviri kimi çıxış edib.
Bəxtiyar Ersay Türkiyədə Balyoz hadisələri zamanı həbs edilib, barəsində 16 il həbs qərarı çıxarılıb. Həbsinin 31-ci ayında azadlığa çıxan polkovnik qısa müddət sonra general rütbəsi alır və briqada komandanı təyin olunur. O, başına gələn müsibətlərdən sonra mükafatlandırılması və ya orduda ona ehtiyac duyulmasına belə reaksiya verib: “Mən türk zabitiyəm. Belə yetişdirildim. Dövlətdən küsmək olmaz. Bəli, başımıza haqsız işlər gəldi. Allaha verərkən yaxşı, alarkən pis deyilə bilmədiyi kimi, dövlətə də verərkən yaxşı, alarkən pis demək olmaz. Biz hər şərtlərdə “Vətən sağ olsun”, deyə yetişdirildik”.
Polkovnik Bəxtiyar Ersay FETÖ-nün 15 iyun 2015-ci ildəki dövlət çevrilişi cəhdindən sonra general-mayor rütbəsi alıb.
Bəllidir ki. Şuşa Bəyannaməsi ilə iki dövlət arasında müttəfiqlik münasibətləri keyfiyyətcə yeni, daha yüksək səviyyəyə yüksəlib. Bu sənəd qardaş ölkələr arasında münasibətlərin perspektivləri üçün yol xəritəsi kimi dəyərləndirilir. Möhkəm zəmin üzərində qurulan gələcək əməkdaşlıq beynəlxalq müstəvidə fəaliyyətlərin uzlaşdırılmasını, hərbi, siyasi, iqtisadi-ticarət, humanitar-mədəni əlaqələrinin möhkəmləndirilməsini, ümumiyyətlə, həyatın bütün sahələrini əhatə edir. Bəyanatda müdafiə sənayesi sahəsində əməkdaşlığın genişləndirilməsi və qarşılıqlı hərbi yardım məsələləri də öz əksini tapıb. Bu, indiki geosiyasi reallıqlar fonunda müstəsna önəm daşıyır. Azərbaycan və Türkiyə dünyaya bəyan ediblər ki, bundan sonra da hər zaman bir yerdə olacaqlar və bir-birinin təhlükəsizliyinin təmin olunmasında yer alacaqlar. Prezident İlham Əliyev dəfələrlə ortaq ordunun yaradılmasının vacibliyini qeyd edib. Dövlət başçısının ADA Universitetindəki nitqində iki qardaş dövlətin - Azərbaycan və Türkiyənin vahid orduya malik olması barədə dedikləri bütün Türk coğrafiyası üçün bir yol xəritəsi hesab edilir.
Bu baxımdan, Bəxtiyar Ersayın ordumuzda yüksək vəzifəyə təyin olunmasını tam olaraq Şuşa Bəyannaməsinin ruhuna uyğun saymaq olar. Ancaq bu təyinata tənqidi yanaşanlara da rast gəlmək mümkündür. Onlar deyir ki, məgər bizdə peşəkar zabit yoxdur ki, başqa dövlətin hərbçisini belə yüksək posta təyin edirlər?
Bəxtiyar Ersayın yüksək posta təyin edilməsindən doğacaq nəticə ilə bağlı hərbi ekspertlər nə düşünür?
Hərbi ekspert Ədalət Verdiyev “Bakı-Xəbər”ə açıqlamasında bildirdi ki, Bəxtiyar Paşa həm Türkiyə, həm də Azərbaycan ordularında kifayət qədər yüksək nüfuza malik bir şəxsdir: “Onun Müdafiə nazirinin müşaviri vəzifəsinə təyin edilməsini birmənalı olaraq dəstəkləyirəm. Bu, Azərbaycanın türk ordu modelinə keçidini daha da sürətləndirəcək. Azərbaycan və Türkiyə ordusu arasında olan münasibətləri, əlaqələri yeni mərhələyə keçirmiş olacaq. Yalnız Baş Qərərgahlar səviyyəsində deyil, həm də idarələr, xidmətlər və baş idarələr arasında birbaşa kontaktların yaradılmasında çox böyük əhəmiyyət daşıyacaq. Azərbaycan auditoriyasında istənilən qərara etiraz edən təbəqə mövcuddur, amma onların sayı o qədər də çox deyil. Bəzən bir çox adamlar məlumatları belə olmadıqları sahələrlə bağlı peşəkar, mütəxəssis kimi danışmağa başlayırlar. Bir daha xatırladım ki, Bəxtiyar Paşa Azərbaycanda ən böyük nüfuza sahib olan türk generalıdır. Belə bir şəxsin Azərbaycan Ordusunda xidmət etməsi olduqca müsbət haldır. Bu halı tənqid edənlərin özündən Bəxtiyar Paşanın kim olduğunu, Azərbaycan qarşısında hansı xidmətləri olduğunu soruşsanız, onu tanımadıqları üzə çıxacaq. Türkiyə bizim üçün başqa dövlət sayılmadığı üçün, onun hərbçisi də başqa dövlətin hərbçisi sayılmır. Bəlkə də yaxın zamanda Azərbaycan hərbçisinin də Türkiyə Ordusunda yüksək vəzifə daşıdığını görəcəyik. Çünki belə addımların atılmasına iki ölkə arasında imzalanmış Şuşa Bəyannaməsi imkan verir. Həmin Bəyannamədə bizim ortaq təhlükəsizlik maraqlarımızın mövcudluğu öz əksini tapıb. Bəxtiyar Paşanın Azərbaycan qarşısındakı xidmətləri bizim bir çox yerli generallarımız, o cümlədən müharibə zamanı etdikləri yanlışlara görə həbslərdə yatan və ya vəzifəsindən uzaqlaşdırılan generallardan daha çoxdur”.
Məhəmmədəli QƏRİBLİ
