ABŞ Prezidenti Donald Trampın oğlu Donald Tramp kiçiyin toyundan sonrakı şənliklərin bir hissəsini rusiyalı oliqarx Umar Kremlyov təşkil edib. Kiçik Trampın həyat yoldaşı Bettina Anderson bunu bazar ertəsi, 14 sentyabr tarixində "Instagram"da təsdiqləyib. O, Baham adalarındakı özəl bir məkanda keçirilən şənliyi "fövqəladə dərəcədə səxavətli toy hədiyyəsi" kimi təsvir edib. Andersonun paylaşımı "ProPublica"nın bazar ertəsi "Donald Tramp kiçiyin Baham adalarındakı toyu Putinin yaxın ətrafındakı rusiyalı oliqarx tərəfindən gizli şəkildə maliyyələşdirilib" başlıqlı məqaləni dərc etməsindən sonra ortaya çıxıb. CBS News-un məlumatına görə, Anderson bildirib ki, "əziz dostumuz" adlandırdığı rusiyalı iş adamı toy sonrası iki gecəlik şənliyin xərclərini ödəyib. Kremlyov Beynəlxalq Boks Assosiasiyasının baş katibi və Rusiya diktatoru Vladimir Putinin müttəfiqidir. Andersonun sözlərinə görə, toy mərasiminin özü yalnız ailə üzvləri üçün nəzərdə tutulmuşdu. Prezident Donald Tramp Vaşinqtondakı vəzifələrini əsas gətirərək mərasimdə iştirak etməyib. "Ardınca gələn həftəsonu əslində çoxdan planlaşdırılmışdı – sadəcə dostlarla əyləncəli bir istirahət kimi," – deyə o yazıb. "Bu, bizim toy həftəsonumuz olmalı deyildi. İlkin toy planlarımız dəyişdikdə, biz sadəcə əvvəlcədən evlənməyə qərar verdik və artıq planlaşdırılmış həftəsonuna yeni evlənmiş cütlük kimi gəldik. Əziz dostumuz Umar çox səxavətlə toyumuzdan sonra bizim üçün iki inanılmaz şənlik gecəsi təşkil etdi. Bu, bir dostdan gələn inanılmaz dərəcədə səxavətli toy hədiyyəsi idi – elə bir hədiyyə ki, buna görə biz hədsiz minnətdar idik və hələ də minnətdarıq". Tramp kiçiklə Kremlyovun dəqiq necə tanış olduqları məlum deyil. Anderson paylaşımında qeyd edib ki, "dostluq siyasi motiv tələb etmir". "Dünyanın hər yerində gözəl dostlara sahib olduğumuz üçün şanslıyıq və onlara minnətdar olduğumuz üçün heç vaxt utanmayacağıq və ya üzr istəməyəcəyik," – deyə o bildirib və vurğulayıb ki, "heç bir sui-qəsd yoxdur". "Forbes" Donald Tramp-kiçiyin xalis sərvətini təxminən 300 milyon dollar dəyərində qiymətləndirir. CBS News şirkətdə icraçı vitse-prezident vəzifəsini tutan Tramp-kiçiyin niyə belə bir hədiyyəni qəbul etdiyini öyrənmək üçün "Trump Organization" ilə əlaqə saxlayıb. Kremlyovun mətbuat xidməti "ProPublica"ya bildirib ki, o və Tramp-kiçik "dostluq münasibətləri saxlayırlar" və ilk dəfə "bir neçə il əvvəl" görüşüblər. Açıqlamada həmçinin qeyd olunur ki, Kremlyov "heç vaxt amerikalı dostları və ya tanışları ilə siyasi məsələləri müzakirə etməyib".
SAMİRƏ
