Azərbaycan “Şərq Tərəfdaşlığından” çıxacaq? - Əliyevin “hədəflərə tam nail olduq” fikrinin məntiqi...

Ramil Hüseynov: “Çox güman ki, “Şərq Tərəfdaşlığı” proqramı yeni bir platformaya transformasiya olunacaq”

img

Prezident İlham Əliyev bu günlərdə Avropa İttifaqının “Şərq Tərəfdaşlığı” üzrə xüsusi elçisi Dirk Şuebelin rəhbərlik etdiyi, Avropa İttifaqının və bir sıra üzv ölkələrin “Şərq Tərəfdaşlığı” üzrə məsul şəxslərinin daxil olduğu nümayəndə heyətini qəbul edərkən bir sıra məqamları xüsusi qeyd etdi.

Prezidentin fikrincə, Azərbaycan “Şərq Tərəfdaşlığı” qrupuna daxil olan nadir ölkədir ki, öz strateji hədəfinə həqiqətən nail olub. Bu hədəflər və yeni mərhələ üçün, yeni çağırışlara uyğun olaraq əməkdaşlığın prinsipləri müəyyən olunmalıdır.

Burada diqqəti çəkən məqam odur ki, birincisi, “Şərq Tərəfdaşlığı”nda öz strateji hədəfinə həqiqətən nail olan nadir ölkəyik. İkincisi, dövlət başçısı dedi ki, “Şərq Tərəfdaşlığı”na üzv ölkələr öz seçimlərini ediblər. Bəziləri Assosiasiya Sazişini imzalayıb, digərləri Avrasiya İqtisadi İttifaqına üzv olub. Azərbaycan yeganə ölkədir ki, heç bir formata qoşulmayıb. İndi biz “Şərq Tərəfdaşlığı” ilə bağlı yeni imkanların nədən ibarət olduğunu nəzərdən keçirməliyik. Yəni bu o deməkdir ki, “Şərq Tərəfdaşlığı” ilə münasibətlərin davam etdirilməsinə və ya etdirilməməsinə qərar verməliyik.

Bax bütün bunlardan sonra gözləmək olarmı ki, Azərbaycanın “Şərq Tərəfdaşlığı” ilə bağlı növbəti platforması necə olacaq? “Şərq Tərəfdaşlığı” platformasında fəaliyyətini davam etdirəcək, yoxsa oradan çıxacaq? Yoxsa “Şərq Tərəfdaşlığı” proqramı tam yeni bir proqrama, platformaya transformasiya olunacaq? Hər halda, bütün bunlar nə deməkdir?

  • “Ölkə başçısının mesajları təsadüfi deyil və bu, bir sıra məsələlərin dəyişəcəyinə işarədir”

Məsələyə münasibət bildirən Yeni Yol Partiyasının sədri Ramil Hüseynovun fikrincə, Prezidentin yanaşmasından belə qənaət yarandı ki, əməkdaşlıq formatı dəyişməlidir: “Düşünmürəm ki, Azərbaycan “Şərq Tərəfdaşlığı” proqramı ilə əməkdaşlığı dayandırsın. Azərbaycan əsas strateji hədəflərinə çatsa da, bu proqramla əməkdaşlığı kəsməz. Bunun bir neçə səbəbi var. Birincisi, Azərbaycan Avropa ölkələri ilə xüsusi əlaqələrə malikdir. Avropanın qazla təmin olunmasında xüsusi yerə malikdir və bu sahədə əməkdaşlıq genişlənir. İkincisi, Avropa İttifaqı Azərbaycanla Ermənistan arasında vasitəçilik missiyası ilə çıxış edir. Üçüncüsü, Azərbaycan Avropa ilə Asiyanı birləşdirən nəqliyyat dəhlizləri üzərində yerləşir. Ukrayna müharibəsindən sonra bu baxımdan ölkəmizin əhəmiyyəti daha da artıb. Yeni nəqliyyat dəhlizləri gündəmdədir. Dördüncüsü, Avropa İttifaqı ilə əməkdaşlıq regionda güc balansının qorunması baxımından Azərbaycanın xeyrinədir. Bu baxımdan düşünmürəm ki, ölkəmiz “Şərq Tərəfdaşlığı” proqramından çıxsın. Düzdür, Vətən müharibəsində qələbəmizdən sonra yeni vəziyyət yaranıb. “Dağlıq Qarabağ” münaqişəsi deyilən bir məfhum artıq tarix olub və s. Ancaq bu o demək deyil ki, proqramdan çıxacağıq. Çox güman, “Şərq Tərəfdaşlığı” proqramı yeni bir platformaya transformasiya olunacaq. Proqramda nəzərdə tutulan prinsiplərin məzmunu dəyişəcək. Hər halda, ölkə başçısının mesajları təsadüfi deyil və bu, bir sıra məsələlərin dəyişəcəyinə işarədir”.

Vidadi ORDAHALLI

Peşə etikası

Son xəbərlər