Azərbaycan Prezidenti, Yeni Azərbaycan Partiyasının (YAP) Sədri İlham Əliyev partiyanın yaradılmasının 30 illiyi münasibətilə keçirilən tədbirdəki çıxışında bildirib ki, güclü ordu quruculuğu Ulu Öndərin bizə olan vəsiyyəti idi:
“Bu gün Azərbaycan Ordusu artıq özünü təsdiqləyib, cəmi 44 gün ərzində düşməni tarixi torpaqlarımızdan qovub, tarixi ədaləti bərpa edib, xalqımızın qürurunu bərpa edib və bu gün Azərbaycan dövlətinin təhlükəsizliyinin qarantıdır. Biz ordu quruculuğuna həmişə çox böyük diqqət göstərmişik. Bəzi işlər ictimai diqqətə də təqdim edilirdi, bəzi işləri biz daha çox konfidensial, yəni, məxfi şəraitdə aparırdıq, bu da başadüşüləndir. Amma nəticə etibarilə elə bir qəhrəmanlıq, elə bir peşəkarlıq göstərdik ki, bu, bu gün bir çoxları üçün nümunədir”.
Heydər Əliyevin əsas vəsiyyətinin yerinə yetirilməsi Vətən müharibəsinin taleyində nə rol oynadı?
Hərbi-siyasi ekspert Emin Həsənli “Bakı-Xəbər”ə açıqlamasında bildirdi ki, hər bir dövlətin müstəqil, təhlükəsiz yaşaması üçün güclü orduya ehtiyacı var: “Azərbaycan dövlətinin də çox güclü ordusu var. Bu ordunun əsasını Ulu Öndər, Ümumimilli Llider Heydər Əliyev hələ Cəmşid Naxçıvanski adlanan lisey yaratmaqla qoyub. Bu liseyin məzunlarının, SSRİ-nin ayrı-ayrı universitetlərinə gəncləri göndərdiyi kimi, hərbi məktəblərdə oxumasını təmin edərək Azərbaycan kadr potensialını yaradıb.
Azərbaycanda dövlət quruculuğuna başlayanda Ulu Öndər məhz o kadrların köməyliyi ilə güclü ordu yaratdı. Eyni zamanda təhsil alması üçün dünyanın bir çox ölkələrinə, Türkiyəyə Azərbaycan gəncləri göndərildi və hərbi akademiya yaradıldı, təlim - tədris mərkəzi yaradıldı, beynəlxalq əlaqələr gücləndi. Ordunun müasir inkişafı cənab Prezidentin adı ilə bağlıdır. Prezident İlham Əliyev, müxtəlif sahələrdə olduğu kimi, ordu quruculuğunda da Ulu Öndərin siyasətini davam etdirdi və çox uğurlu nəticələr əldə etdi. Dünyanın ən müasir silahları Azərbaycan ordusuna gətirildi. Azərbaycanın hərbi hissələri təmir olundu, yenidən hərbi kazarmalar tikildi, hərbi şəhərciklər salındı. Eyni zamanda hərbi təhsil, hərbi səhiyyə gücləndi. Müdafiə Sənayesi Nazirliyi, Fövqəladə Hallar Nazirliyi, Səfərbərlik və Hərbi Xidmətə Çağırış üzrə Dövlət Xidmətini yaratdı. Silahlı qüvvələrin ayrı-ayrı qoşun növlərinin maddi-texniki bazası gücləndirildi. Bir sözlə, ordu quruculuğu məsələsi Azərbaycanda həmişə diqqət mərkəzində olub. Azərbaycanın hərbi büdcəsi bütövlükdə Ermənistandan daha çoxdur. Cənab Prezident bunu qarşısına məqsəd kimi qoymuşdu. Hərbi dövlətin və ordunun güclü olması üçün ölkənin iqtisadiyyatı güclü olmalıdır. Ona görə də hərbiçilərin sosial şəraitinin gücləndirilməsi üçün ardıcıl addımlar atıldı. Onların əmək haqları yüksəldi. Eyni zamanda hərbiçilər mənzillərlə təmin edildi. Daim döyüşən orduya ölkə Prezidenti xüsusi qayğı göstərdi. Bunların hamısı vətənpərvərlik ruhunun yüksəlməsinə çox böyük səbəb oldu”.
Ekspertin sözlərinə görə, yeni yaranan dövlət qurumları günün müasir tələblərinə uyğun quruldu. Həm Müdafiə Sənaesi Nazirliyi, həm FHN, eyni zamanda Səfərbərlik Xidməti orduda aparılan islahatların davamı kimi çox mühüm dövlət qurumlarından oldu. Və bu addımlar onu göstərdi ki, Azərbaycanın ordu quruculuğu istiqamətində sistemli, ardıcıl işlər görülüb. Bu işlərin nəticəsində aparılan islahatlar müharibədə özünü göstərdi. Hər bir ordu üçün, hər bir dövlət üçün ən ağır imtahan müharibədir. Biz Rusiya ilə Ukrayna müharibəsində Rusiyanın apardığı döyüş əməliyyatlarını, Ukraynanın apardığı müdafiə döyüşünü, əks hücumları, səfərbərliklə bağlı Rusiyanın böyük boşluqların olmasını gördük. Azərbaycanla bağlı isə müharibədə Azərbaycan xalqının qısa sürədə səfərbər olması, hər bir kəsin bir bayraq altında birləşməyi, dəmir yumruq olaraq böyük nəticələr əldə etməyi Ulu öndərin ən böyük vəsiyyətinin yerinə yetirilməsi demək idi və müstəqil Azərbaycanın qüdrətlənməsi, ərazi bütövlüyümüzün təmin olunması baxımından çox vacib idi.
Dövlət başçısı, müdrik siyasi xadim, cəsur sərkərdə, Ali baş komandan İlham Əliyev Ulu Öndər Heydər Əliyevin ən mühüm arzusu - torpaqlarımızın azad edilməsi, ərazi bütövlüyümüzün təmin edilməsini həyata keçirdi. Zaman göstərdi ki, biz qalibik. Ən alternativ, ən doğru siyasət Ulu Öndərin yolu olduğunu həyat sübut etdi. Heydər Əliyev siyasətinin alternativi yoxdur. Bu siyasət Azərbaycan xalqının nicatı və qalib gəlməsidir. Cənab Prezident bu yolu ən uğurlu, ayıq şəkildə davam etdirir”.
Məhəmmədəli QƏRİBLİ
