“Bütün işlərimizin mahiyyəti məhz bu idi - Qarabağı azad etmək, tarixi ədaləti bərpa etmək. Biz bu hədəfə doğru gedirdik. Bizim yolumuz çox çəkdi”. Bunu Prezident İlham Əliyev Yeni Azərbaycan Partiyasının yaradılmasının 30 illiyi münasibətilə keçirilən tədbirdə çıxışı zamanı deyib.
Ölkə başçısının fikrincə, elə gedib, elə nöqtə vurmalı idik ki, birdəfəlik olsun: “Biz avantüraya heç vaxt gedə bilməzdik. Biz səhv addım, yaxud da ki, vaxtsız addım ata bilməzdik. Biz hər şeyi ölçüb-biçib öz gücümüzü, eyni zamanda, digər amilləri nəzərə alaraq ən düzgün vaxt seçməli idik, ən düzgün vaxt üçün ən yaxşı vəziyyətdə olmalı idik. Xalqımız Ordumuzla tam birləşdi. Ona görə biz hamımız deyirik ki, bu, ümumxalq Qələbəsidir. Çünki xalq-iqtidar bir yumruq kimi birləşdi və cəmi 44 gün ərzində biz istədiyimizə nail olduq, tarixi ədaləti bərpa etdik, düşməni torpaqlarımızdan qovduq”.
Həqiqətən də qələbə qazanmaq üçün bir sıra faktorlar nə qədər önəmlidirsə, doğru zamanı seçmək və uyğun şərtləri düzgün dəyərləndirmək daha önəmlidir. Uyğun zamanın düzgün seçilməməsi bir sıra planların fiaskoya uğramasına səbəb ola bilərdi.
“Prezidentimiz xarici siyasətdə elə bir strategiya ortaya qoydu ki, beynəlxalq təzyiqlər olmadı”
Sözügedən məsələni “Bakı-Xəbər”ə şərh edən politoloq Məhəmməd Əsədullazadənin fikrincə, ölkə başçısının məlum dəyərləndirməsi reallığı əks etdirir: “Azərbaycanın Vətən müharibəsində qalibiyyəti xalq-ordu birliyinin bariz nümunəsidir. Buna nail olmaq üçün müəyyən müddət lazım idi. Birinci Qarabağ savaşında Azərbaycanda birliyin olmaması, ölkə daxilində siyasi qarşıdurmalar Ermənistana imkan verdi ki, ərazilərimizi işğal etsin. Bu illər ərzində Prezident İlham Əliyev Qarabağın azad olunması üçün kifayət qədər hərbini gücləndirdi. Xarici siyasətdə elə bir strategiya ortaya qoydu ki, beynəlxalq təzyiqlər olmadı. Bundan əlavə xalqın ermənilərə nifrəti, işğalla barışmaması, müharibədə dövlətin yanında olmaları və doğru zamanın seçilməsi qələbəmizə səbəb oldu. Dövlət və xalq birlik nümayiş etdirdi. Bu, Ermənistan üzərində xalqla ordunun birgə qələbəsidir. Bunun nümunəsi faşistlərə qarşı İkinci Dünya müharibəsində olub. 21-ci əsrdə biz bir olub erməni faşizmini əzdik. Demək olar ki, bu çox nadir hallarda olur və bizim vətənə, torpağa bağlılığımız bunun nəticəsidir. Düşünürəm ki, Prezident İlham Əliyev məhz xalqa söykənərək bu siyasətlə getdi və xalq da onu birmənalı dəstəklədi. Bundan sonra da xalq Ermənistanla bağlı məsələdə Prezidentin yanında durub. Bütün cəbhələrdə Ermənistanı əzməyə qadir olduğumuzu sübut etmiş olduq”.
Politoloq onu da əlavə etdi ki, əldə etdiyimiz qələbə bizi arxayınlaşdırmamalıdır.
Vidadi ORDAHALLI
