Molla rejimi yalnız sadə insanlara silah tuşlamır, onlara qarşı repressiv davranışlar sərgiləmir, həbs etmir, eyni zamanda xalqa dəstək olan incəsənət xadimlərini, tanınmış mədəniyyət adamlarını da həbsxanaya atır. Mətbuatda yayılan məlumata görə, bu ölkədə tanınmış şəxslərə qarşı həbslər başlayıb.
Yayılan məlumatlarda bildirilir ki, İranda iki məşhur aktrisa ölkədə davam edən etiraz aksiyalarına qoşularaq həmrəylik nümayiş etdirdikləri və açıq şəkildə hicablarını çıxardıqları üçün həbs edilib.
IRNA agentliyinə istinadən yayılan xəbərə görə, İranın məşhur iki aktrisası Henqame Qazinai və Ketayun Riahi sosial şəbəkələrdə "təxribat xarakterli" paylaşımlar etdikləri üçün prokurorluğa çağırıldıqdan sonra həbs olunublar.
Qeyd edilənə görə, təbrizli teatr aktrisası Səmanə Babazadə də bir neçə gündür həbsdədir.
Bildirilir ki, Ketayun Riahi 2008-ci ildə İranda yayımlanan məşhur "Həzrəti Yusif" serialında Züleyxa obrazını canlandırıb. Teleserial Azərbaycanda "Space TV"də yayımlanıb.
Son məlumatlara görə isə, təbrizli musiqiçi və bəstəkar Seyid Morteza Əbülməali də rejim tərəfindən həbs edilib.
“...Ümumiyyətlə inkişafa xor baxan rejimlər əsasən də sənət adamlarının həbs edilməsi, sıxışdırılması, basqı altında saxlanılması üçün bütün mümkün vasitələrdən istifadə edir”
İranda yaşananlara münasibət bildirən siyasi şərhçi Azər Həsrətin fikrincə, bu ölkədə müşahidə edilən məlum hadisələr bir daha təsdiq edir ki, metastaz çox şiddətlənir, obrazlı desək, ona görə də bu yara birdəfəlik kəslib arılmalıdır. “Əlbəttə, söhbət ondan gedir ki, İran İslam Cumhuriyyətinin sonu yetişib, bu dövlət dağılmalıdır, yox olmalıdır. Güney Azərbaycan hakimiyyəti qurulmalı və türklər azadlığa çıxmalıdır, eyni zamanda farslar da özlərinə Tehran mərkəzli İran Xalq Cumhuriyyəti deyə bir dövlət qurmalıdır. Yəni bu XXI yüzildə bu cür davam edə bilməz. “Baçını açdı, saçını göstərdi” kimi əsassız ittihamlarla qadınları həbs edəcək bir zehniyyət dövlət sayıla bilməz. Bu çox dəhşətli və təhlükəlidir. Bu təkcə İranın özü üçün deyil, bütün bəşəriyyət üçün təhlükəlidir. Əlbəttə ki, belə bir zehniyyətlə idarə edilən dövlətin mövcudluğuna bəşər dözməməlidir. Ona görə də düşünürəm ki, İran xalqları bu mübarizədə qətiyyətli davranmalıdır. Həm farsların özləri, həm türklər, həm də digər azlıqlar artıq İran adında bir dövlətin mövcudluğunun həm özlərinə, həm də bəşəriyyətə təhlükə olduğunun fərqinə varmalıdırlar”.
A.Həsrət hesab edir ki, rejim dəyişdirilməsi məsələni kökündən həll etməyəcək, çünki İran konstitutsiyası, qanunları yenə də qadınların başını açmasını yasaqlayır, yenə də insanların küçədə şallaqla döyülərək cəzalandırılmasına imkan verir, yenə də günahkar sayılan şəxslərin meydanlarda asılmasına imkan verir. “Bütün bunlar da geri zəkalılığın əlamətidir. Geri zəkalı insanların idarə etdiyi bir dövlətin mövcudluğu isə təkcə özü üçün deyil, bütün bəşəriyyət üçün çox böyük təhlükə təşkil etməkdədir. Bu səbəbdən də düşünürəm ki, Güney Azərbaycan Cumhuriyyəti quraraq güneyli soydaşlarımız birdəfəlik bu girdabdan qurtarmalıdırlar, yerdə qalan xalqlar da artıq öz talelərini həll etməlidirlər...”
A.Həsrət hesab edir ki, sənət adamlarına qarşı da baş verən həbslər qəbul edilməzdir və bu insan haqqlarının boğulmasıdır. Müsahibimizin fikrincə, sənət adamlarına qarşı da repressiyaların başlanması artıq molla rejiminin tam simasını göstərir: “Sənət adamlarını çərçivəyə, sıxma-boğmaya salmaq, onların özünü azad şəkildə ifadə etməsinin qarşısını almaq birmənalı olaraq çürük rejimlərin xarakterinə uyğundur. Çökməkdə olan, özəlliklə də yenilklərlə ayaqlaşa, dünyanın gərdişinə uyğunlaşa bilməyən, ümumiyyətlə inkişafa xor baxan rejimlər əsasən də sənət adamlarının həbs edilməsi, sıxışdırılması, basqı altında saxlanılması üçün bütün mümkün vasitələrdən istifadə edirlər. İndi gözümüzün qarşısında, qulağımızın dibində də İran adlı belə bir rejim mövcuddur. Ona görə də həmişə deyirik, ümimiyyətlə bu rejim, bu sistem birdəfəlik çökdürülməli, məhv edilməlidir ki, yenilənsin, əvəzində də orada insanlar azad nəfəs ala bilsin. O cümlədən də sənət adamları”.
İradə SARIYEVA
