“...Bu yaxınlarda yenə də üzv olmadığımız, amma Ermənistanın bilmirəm hansı səbəbə görə üzv olduğu Frankofoniya təşkilatı çərçivəsində də Azərbaycana qarşı çirkin bir təxribat planlaşdırılırdı. Bu təxribatın müəllifi Fransa idi və Fransa da Ermənistana indi himayədarlıq edir. Onlar bir-birinə “bacı” deyirlər və mən görürəm, yoldaşlar da bunu xüsusi qeyd etdilər. Mən daha demədim ki, “qardaş” da deyə bilərdilər, amma nədənsə bunlar “bacı” deyirlər. Orada hazırlanmış qətnamənin ilkin variantı sırf anti-Azərbaycan tezislər üzərində qurulmuşdur və həqiqətə tam zidd idi. Frankofoniya təşkilatında olan dostlarımızın, - onları biz yaxşı tanıyırıq və onlar da, sözün əsl mənasında, dostlarımızdır, - səyi nəticəsində bütün anti-Azərbaycan tezisləri oradan çıxarıldı. Fransa-Ermənistan tandemi bu imkandan da istifadə edə bilməmişdir. Yəni, bu, onu göstərir ki, bizim beynəlxalq təşkilatlardakı nüfuzumuz və beynəlxalq müstəvidə apardığımız siyasət təqdir edilir. Çünki biz hər bir işə hər zaman məsuliyyətlə yanaşırıq. Bizim sözümüzlə imzamız arasında heç bir fərq yoxdur...” Bunu noyabrın 21-də Heydər Əliyev Mərkəzində Yeni Azərbaycan Partiyasının (YAP) yaradılmasının 30 illiyi münasibətilə keçirilən tədbirdəki çıxışında Prezident İlham Əliyev deyib.
Prezidentin vurğuladığı kimi, bu yaxınlarda Fransa-Ermənistan cütlüyünün Frankofoniya təşkilatı çərçivəsində Azərbaycana qarşı çirkin təxribat planı ifşa edildi, hazırlanmış qətnamədən bütün anti-Azərbaycan tezisləri çıxarıldı. Heç şübhəsiz bu, Azərbaycanın beynəlxalq miqyasda apardığı işin, yürütdüyü siyasətin uğuru, Fransa-Ermənistan tandeminin rüsvayçılığı idi.
“...Bir daha bənzər cəhdlərini davam etdirsələr daha rüsvayçı diplomatik məğlubiyyətlə qarşı-qarşıya qalacaqlar”
Mövzuya şərh verən “SƏS” qəzetinin baş redaktoru, siyasi ekseprt Bəhruz Quliyev “Tunisdə keçirilən Frankofoniya təşkilatı çərçivəsində Azərbaycan əleyhinə təxribatçı qətnamənin qəbul edilməməsi ilk olaraq o deməkdir ki, Azərbaycan hətta təmsil olunmadığı beynəlxalq qurumlarda belə öz maraqlarını müdafiə etmək gücündə və əzmindədir və bu, eyni zamanda ölkəmizin beynəlxalq statusunun nə qədər möhkəm dayaqlara söykənməsinin bariz sübutudur” - deyə bildirdi.
Onun sözlərinə görə, Fransanın Ermənistana himayədarlığı sayəsində kirli oyun oynamaq cəhdlərinin puça çıxması da belə nəticə hasil etməyə zəmin yaradır ki, əslində daş qayaya rast gəlib və bir daha isbatlanıb ki, Azərbaycan beynəlxalq arenada öz sözünü deyən güclü, qüdrətli, eləcə də sadiq dostlara malik olan bir dövlətdir: “Əbəs deyil ki, hazırlanmış qətnamədəki anti-Azərbaycan xarakterli ifadələr oradan çıxarıldı və buna qarşı çıxanlar da Azərbaycanın dostları oldular. Buna misal kimi Albaniya, Cibuti və s. kimi dost ölkələri göstərə bilərik. Ümumiyyətlə, bir addım irəli getməyə cəhd edən Fransa-Ermənistan cütlüyü rüsvayçı şəkildə iki addım geriyə addım atmış oldu və həmin mənzərə həqiqətən də Frankofoniyada təmsil olunan ölkələrdə də həmin cütlüyə qarşı istehza vəziyyəti yaratmış oldu. Yəni bu, açıq-aşkar ifşa idi və Prezident İlham Əliyevin YAP-ın təsis edilməsinin 30-cü ildönümü ilə bağlı keçirilən tədbirdə vurğuladığı kimi, iki bacı bir araya gələrək ortaya heç bir nəticə qoymağı bacarmadılar.
Bəli, məhz bacı adlandırılan Fransa-Ermənistan tandemi bu dəfə də süquta uğradı və düşünürəm ki, gələcəkdə bir daha bənzər cəhdlərini davam etdirsələr daha rüsvayçı diplomatik məğlubiyyətlə qarşı-qarşıya qalacaqlar”, deyən siyasi ekspertə görə, Fransa, açığını desək, həmin ölkənin prezidentin Emmanuel Makron elə sanırdı ki, Frankofoniya onun və ölkəsinin çirkli siyasi maraqlarını təmin edən ayrıca bir qurumdur, lakin o, bu məsələdə də kökündən yanılıb: “Makron-Paşinyan bacıları Frankofoniyanın fəaliyyətini az qala Fransa Senatı ilə paralel tuturdular. Məsələn, Fransa Senatının Azərbaycan əleyhinə çıxardığı qəsd xarakterli qətnamə ermənipərəst senatorların dəstəyi ilə qəbul edildi. Ancaq həmin qətnamənin hər hansı bir gücünün də mexaniki olaraq işə düşməsi böyük sual altındadır. Çünki ortada Avropa İttifaqı var və bu birliyə üzv olan ölkələr var və onlar Fransanın ermənipərəstlik siyasətinə dəstək verməyə, Azərbaycana qarşı çıxmağa borclu da deyillər. Bu baxımdan, biz qarşıda Fransa-Ermənistan cütlüyünün daha bir məğlubiyyətlərinin şahidlərinə çevrilə bilərik. Qaldı ki, Frankofoniyadakı rüsvayçılığa, bu da Fransanın beynəlxalq imicinə vurulan diplomatik zərbədir və həmin zərbənin vurulmasında Azərbaycana dəstək göstərən dost ölkələrə də, təbii ki, minnətdarlıq və alqışlar düşür”, deyən Bəhruz Quliyev əlavə etdi. O vurğuladı ki, Fransa-Ermənistan adlı bacılar bundan sonra ölkəmizə qarşı hər hansı bir addım atmağı planlaşdırarkən bir daha düşünsünlər və növbəti dəfə özlərini rüsvay etməsinlər.
İradə SARIYEVA
