“Bu gün Ermənistan rəhbərliyinin sülh haqqında danışmasını bir növ manipulyasiya hesab edirəm”. Bunu Prezident İlham Əliyev noyabrın 17-də Avropa İttifaqının Şərq Tərəfdaşlığı üzrə xüsusi elçisi Dirk Şuebelin rəhbərlik etdiyi nümayəndə heyətini qəbul edərkən deyib.
Prezident həmçinin “Siz Ermənistana səfərinizi və orada Ermənistan rəhbərliyindən sülh mesajı aldığınızı qeyd etdiniz. Biz işğalın davam etdiyi bütün illər ərzində bu mesajları eşitmişik. Lakin onlar səmimi deyildi. Biz də sülh arzulayırdıq, lakin torpaqlarımızı geri istəyirdik. Onlar isə torpaqları geri qaytarmadan sülh istəyirdilər. Fərq bunda idi. Beləliklə, biz münaqişəni güc yolu ilə, daha sonra isə siyasi vasitələrlə həll etməli olduq. Mən bu gün onların sülh haqqında danışmasını bir növ manipulyasiya hesab edirəm. Çünki onlar həqiqətən sülh arzulayırdılarsa, bizim təklifimizə cavab verərdilər. Müharibə başa çatdıqdan dərhal sonra sülh sazişi üzərində danışıqlara başlamağı təklif edən biz olmuşuq. Bu dünya tarixində nadir hallardandır ki, ərazisi uzun illərdir işğal altında olan, ədaləti güc yolu ilə bərpa edən, düşməni məğlub edərək torpağından qovan ölkə sülh təklif etsin. Biz Ermənistan tərəfindən ərazilərimizin dağıdılması və viran qoyulması, azərbaycanlıların əzab-əziyyət çəkməsinə baxmayaraq, sülh təklif etdik”-deyə bildirib.
“Azərbaycan Prezidenti bu 30 ildə Ermənistanın sülh prosesinə nə qədər ağır zərbələr vurduğunu bir daha avropalıların diqqətinə çatdırdı”
Siyasi ekspert Rövşən Rəsulov “Bakı-Xəbər”ə şərhində bildirdi ki, Azərbaycan Prezidenti Ermənistanın danışıqlarda tutduğu qeyri-ciddi mövqeyi, saxtakarlığı, ikiüzlü mövqeyini ifşa edib. “Ermənistanın son vaxtlar manipulyasiya cəhdlərinin daha da artması belə deməyə zəmin yaradır ki, Ermənistan rəhbərliyi sanki 2020 ilin 27 sentyabr tarixinə qədər olan mövqeyinə geri dönüb. Bu mövqe əslində Ermənistan və erməni xalqı üçün çox ağır və faciəvi nəticələrə gətirib çıxara bilər. Əbəs deyil ki, cənab Prezident İlham Əliyev də son vaxtlar öz çıxışlarında məhz bu faktorun üzərində dayanır, qeyd edir ki, Ermənistan tərəfi danışıqlarda müxtəlif vasitələrlə prosesi uzatmağa cəhd edir, üçtərəfli bəyanatda qəbul olunan bəndlərin icrasından yayınır. Ermənistan öz havdarlarına arxalanır. Xüsusilə də Fransaya güvənir, Fransa Senatının qəbul etdiyi bədnam qətnamə də, eləcə də, ABŞ-ın müəyyən dairələrindən, Rusiyadan müxtəlif üsullarla Azərbaycana qarşı təzyqilərə cəhdlər edilməsi də bunu deməyə əsas verir ki, Ermənistan həmin dairələr vasitəsilə prosesi uzadır və öz istəyinə nail olmağa çalışır. Lakin gəlin görək Ermənistan buna nail olacaqmı, qarşısına qoyduğu məsələləri reallaşdıra biləcəkmi? Əlbəttə ki, xeyr. Nəzərə alsaq ki, Qarabağda bütün strareji yüksəkliklər Azərbaycanın tam nəzarəti altındadır. Eləcə də müəyyən olunmamış Azərbaycan-Ermənistan sərhədi boyunca da bütün strateji yüksəkliklər Azərbaycan Silahlı qüvvələrinin nəzarətindədir. Bu zaman belə deyə bilərik ki, əgər Ermənistan prosesi uzatmaq üzrə manipulyasiya cəhdlərinə davam edərsə çox ağır zərbələrə məruz qalacaq”.
R.Rəsulovun sözlərinə görə, əbəs deyil ki, Prezident İlham Əliyev, xüsusilə Avropadan olan nümayəndələrlə söhbətlərində, eləcə də Azərbaycan xalqına müraciətlərində Ermənistanın bu davranışlarına səbr edilməyəcəyini, Azərbaycan xalqının və dövlətinin səbrinin tükənməz olmadığını xüsusi olaraq vurğulayıb. “Təbii ki, gec-tez qalib Azərbaycanın tələbləri və şərtləri yerinə yetiriləcək və tələblərin yerinə yetirilməsi əslində an məsələsidir. Azərbaycanın müzəffər ordusu çox qısa zamanda qarşısına qoyduğu məqsədi reallaşdıra bilər. Sadəcə, ortada yeni müharibə, yeni savaş istəməmək amili var, Azərbaycan bunu dəfələrlə bəyan edib. Lakin son anda Ermənistan tərəfi öz mövqeyini dəyişməyib, yenidən ciddi-cəhdlə nala-mıxa vurmağa cəhd edəcəksə o zaman onun başına ikinci dəmir yumruq enəcək. Buna da kimsənin şübhəsi olmamalıdır”-deyə bildirən R.Rəsulov əlavə etdi ki, Prezident Ermənistanla Azərbaycanın sülhə münasibətini çox dəqiq şəkildə ifadə edib. “Azərbaycan Prezidenti bu 30 ildə Ermənistanın sülh prosesinə nə qədər ağır zərbələr vurduğunu bir daha avropalıların diqqətinə çatdırdı”-deyə R.Rəsulov vurğuladı.
İradə SARIYEVA
