İki aydan çoxdur ki, mollakratiya rejimindən cana doyan xalq küçələrə, meydanlara axışıb etiraz aksiyaları keçirir. Xalqın qəzəbi qarşısında molla hakimiyyəti də, qulbeçəsi SEPAH da heç bir iş görə bilmir, xalq sel kimi mollaların üstünə yeriyir. Neçə vaxtdır ki, bu aksiyaların beynəlxalq dəstək qazanıb-qazanmayacağı barədə müzakirələr gedir.
Soydaşlarımızın dominantlıq təşkil etdiyi aksiyanın şüarı azadlıq, ədalət, Milli Hökumətdir. Bu da o deməkdir ki, soydaşlarımızın haqq mübarizəsi milli dövlətçilik quruluşuna nail olmaqla nəticələnəcək. Bu arada artıq Cənubi Azərbaycanın ayrı-ayrı şəhərlərində üçrəngli bayrağımız dalğalanır, soydaşlarımız bayrağımızın işığında ədalət mübarizəsini davam etdirirlər.
Bu hərəkatın beynəlxalq dəstək qazanıb-qazanmayacağı məsələsinin müzakirə olunduğu bir vaxtda mətbuatın yazdığına görə, ABŞ-ın sabiq Prezidenti Bill Klintondan etirazçılara dəstək gəlib. B.Klinton İran xalqına videomüraciətində “Dünya ictimaiyyəti İran xalqının cəsarətinə şahiddir və onu bundan sonra da dəstəkləyəcək.
Dünya sizin cəsarətinizə şahiddir və azad olmağınız üçün nə qədər lazımdırsa, o qədər də sizə dəstək olacağıq”, deyə bildirib.
B.Klinton həmçinin beynəlxalq ictimaiyyəti İran xalqını dəstəkləməyə çağırıb: “İran xalqının bizə ehtiyacı var. Onlar bizim qlobal birliyin bir hissəsi olmaq istəyirlər. İranlılar savadlı, zəhmətkeş, yaradıcı və maarifçi insanlardır. Onlar Qərblə normal münasibətlər istəyir və bizim dəstəyimizə layiqdirlər”.
Qeyd edək ki, aksiyanın ilk mərhələsində ABŞ prezidenti Co Bayden “Narahat olmayın, biz İranı azad edəcəyik. Onlar özlərini tezliklə azad edəcəklər” bəyanatını vermişdi. Bu gün isə ABŞ-ın eks-prezidenti aksiyaçılara öz dəstəyini göstərir və beynəlxalq ictimaiyyəti də onlara dəstək verməyə çağırır.
Klintonun bu addımını necə dəyərləndirmək olar? Bunu beynəlxalq dəstəyin hərəkətə gəlməsi kimi qiymətləndirmək olarmı?
Ekspertlər qeyd edirlər ki, orada 40 milyon soydaşımız var və ilk növbədə bizi onların taleyi düşündürür, mütləq mənada onların mübarizəsinə dəstək veriləcək.
“Qlobal güclər də bu qənaətə gəliblər ki, İran adlanan dövlət bu cür davam edə bilməz...”
Siyasi şərhçi Azər Həsrət “Bakı-Xəbər”ə şərhində bildirdi ki, İranda baş verən proseslər, əlbəttə, qlobal səviyyədə diqqəti cəlb etməyə bilməzdi. “Çünki XXI yüzildə hələ də orta əsr təfəkkürü ilə idarə edilən bir dövlətin olması dünya üçün qlobal təhdid təşkil edir. Yəni bu rejim bir tərəfdən öz vətəndaşlarını daimi zülm və basqı altında saxlayır, digər tərəfdən də hətta nüvə silahı əldə etməyə cəhd göstərməklə dünyanı təhlükə altında saxlayır. Təbiidir ki, belə bir şəraitdə dünya ictimaiyyəti, özəlliklə də dünyanın taleyinə cavabdeh olan ən güclü dövlətlər məsələyə münasibət bildirməli idlər, özü də məhz bu şəkildə. İstər ABŞ-ın keçmiş prezidenti Bill Klintonun, istərsə də hazırkı prezidenti Co Baydenin bu cür narahatlıq və dəstək çağırışı əlbəttə ki, təqdirəlayiqdir. Yəni bizim gördüyümüzü onlar da görür, narahatlığımızı onlar da paylaşır. Azərbaycan Respublikası İranla həmsərhəddir. Yəni proseslər də bizim sərhəddimizin o tayında, üstəlik də, tarixi Azərbaycan torpaqlarında baş verir. Əlbəttə, bu bizim üçün birmənalı olaraq həyat məsələsidir. Belə bir şəraitdə ABŞ-dan bu cür səslərin yüksəlməsi təqdirəlayqdir, eyni zamanda ondan xəbər verir ki, İranla bağlı bizim düşündüklərimiz, daha doğrusu proqnozlaşdırdıqlarımız yerini tutmaqdadır. Yəni qlobal güclər də bu qənaətə gəliblər ki, İran adlanan dövlət bu cür davam edə bilməz, orada xalqların hüquqları, azadlıqları təmin edilməlidir, təmin edilməyəcəyi təqdirdə əlbəttə, hər bir xalq, ümumi İran xalqının tərkib hissəsi olan ayrı-ayrı xalqlar öz müqəddaratını həll etməli olacaqlar. O baxımdan Güney Azərbaycan Cumhuriyyətinin qurulması əlbəttə, artıq qaçılmaz olub”.
A.Həsrətin sözlərinə görə, istər güneyli soydaşlarımız, istər qüzey Azərbaycanda yaşayan vətəndaşlarımız, istərsə də dünyanın dörd bir yanına səpələnmiş soydaşlarımız, eləcə də türk xalqları artıq ona kökləniblər ki, çox yaxın bir müddətdə Güney Azərbaycan Cumhuriyyəti elan ediləcək. “Həmin cumhuriyyət İran adlanan xalqlar həbsxanasından azad olaraq özünün müstəqil həyatına qədəm basacaq. Belə bir şəraitdə ABŞ-ın həm keçmiş, həm də indiki prezidentinin dəstək bəyanatları tam yerinə düşür. Düşünürəm ki, belə çıxışlar Güney Azərbaycan Milli Azadlıq Hərəkatını da yetərincə həvəsləndirmiş olur. O baxımdan, istər Klintonun, istərsə də Baydenin bu yanaşmalarını şəxsən təqdir edirəm”-deyə A.Həsrət bildirdi.
İradə SARIYEVA
