Ermənistan mətbuatı, bir qayda olaraq, Amerika Birləşmiş Ştatlarının (ABŞ) rəsmilərinin fikirlərini saxtalaşdırmaqla məşğuldur. İndiyə qədər bir neçə ABŞ rəsmisinin fikirləri saxtalaşdırılsa da, təəssüf ki, onlar buna sərt reaksiya verməyib, bu da erməni mətbuatının daha geniş şəkildə əl-qol açmasına şərait yaradıb.
Özündə heç bir məsuliyyət daşımayan erməni mediası və erməni rəsmiləri istənilən xarici təşkilatın, xarici ölkə rəsmisinin açıqlamalarına ermənisayağı yanaşırlar.
Məsələn, Ermənistan mətbuatı yazır ki, ABŞ Dövlət Departamentinin Qafqaz üzrə baş məsləhətçisi Filip Riker sentyabrın 13-14-də hərbi əməliyyatlar zamanı regionda olub.
Erməni mediası iddia edir ki, guya Filip Riker ABŞ Senatının Xarici Əlaqələr Komissiyasında müzakirələr zamanı “Mən Prezident Əliyevlə görüşərək onu zorakılığı dayandırmağa çağırdım”-deyə bildirib. Əvvəla, Riker Azərbaycan Prezidentinə belə bir söz deyə bilməzdi, çünki Əliyev, Azərbaycan zorakılıq etməyib, Azərbaycanın bir dövlət kimi mövqeyi bəllidir. Zorakılıq edən Ermənistandır ki, 30 il torpaqlarımızı işğalda saxlayıb, 4000 minə yaxın vətəndaşımızın taleyindən hələ də bir xəbər yoxdur, bu gün azad edilən ərazilərimiz mina tarlasını xatırladır. Yəni nə edib Ermənistan edib, bütün zorakılıqlar ermənilər tərəfindən həyata keçirilib, Azərbaycan özünü müdafiə edib.
AMEA-nın Fəlsəfə və Sosiologiya İnstitutunun aparıcı elmi işçisi, fəlsəfə doktoru, BAO başqanının müvaini, siyasi şərhçi Faiq Ələkbərli “Bakı-Xəbər”ə şərhində bildirdi ki, Ermənistanın yaydığı məlumat yalan görsənir, bu məsələ ilə bağlı ABŞ Dövlət Departamentinin Qafqaz üzrə baş məsləhətçisi Filip Rikerin özü açıqlama verməlidir. “Filip Rikerin adından yayılan bu açıqlama həm təəccüb, həm də təəssüf doğurur. Erməni mediasının yaydığı açıqlamaya inansaq ABŞ Dövlət Departamentinin Qafqaz üzrə baş məsləhətçisi burada daha çox ermənipərəst mövqedən çıxış edir. İki il bundan əvvəl Ermənistanın Azərbaycan torpaqlarına təcavüzunu heç bu şəkildə dilə gətirmirdi. İddia edilir ki, 13-14 sentyabrda onun regiona səfəri olub. 12-13 sentyabr təxribatını da Ermənistanın törətdiyi məlumdur, təəssüf ki, ABŞ rəsmisi Azərbaycan tərəfi “zorakılıq etməkdə” ittiham edir, halbuki zorakılıq hər zaman Ermənistan tərəfindən edilib. Uzun illər Ermənistanın işğalçı qoşunları Azərbaycan torpaqlarında oturdular, bu gün də bu ölkənin qanunsuz silahlı dəstələri Xankəndidədir, hələ də o ərazidə separatçı dəstənin cinayətləri davam edir. Bu gün Xankəndidə, Xocavənddə, Ağdərədə qanunsuz silahlı dəstələr var, Ermənistanın hərbi qrupları separatçıların yanındadırlar. Azərbaycan isə həm öz ərazi bütövlüyünün təmin olunmasına davam edir, həm də sərhədlərin müəyyənləşməsi məsələsində aktivlik göstərir. Azərbaycanın məqsədi sərhədlərin müəyyən edilməsi və tezliklə sülh müqaviləsinin imzalanmasıdır. Bu isə qətiyyən zorakılıq sayıla bilməz. Biz öz sərhədlərimiz daxilində hərəkət edirik, ərazilərimizdəki terrorçu qruplara qarşı əməliyyatlar həyata keçiririk, keçirəcəyik də. Filip Riker əgər belə bir ifadə işlədibsə, böyük səhvə yol verib və o zorakılıqdan danışmaq istəyirdisə Ermənistanın 30 il boyunca həyata keçirdiyi zorakılıqları, dinc əhalini bombalamasını və sairi vurğulasın. Separatizmi, vandalizmi, müharibə cinayətlərini törədən Ermənistandır, amma nədənsə bunu dilə gətirmir. Çox təəssüf ki, bu belədir”.
Ermənilərin hər fürsətdə zorakılığı davam etdirdiyini deyən F.Ələkbərli vurğuladı ki, ermənilər revanşizimi hər zaman özlərinə həyat tərzi seçirlər. Sülh müqaviləsi Azərbaycanın irəli sürdüyü şərtlər əsasında həyata keçirilməli, 1991-ci ilin Almatı sənədi əsas götürülməlidir. Azərbaycanın öz qanuni torpaqlarından əl çəkməyəcəyini deyən F.Ələkbərlinin sözlərinə görə, Riker tərəf tutmamalı, obyektiv olmalıdır. “Əgər Riker doğrudan da Prezident Əliyevlə görüşdə hansısa “zorakılıqdan” bəhs edibsə ünvanı səhv salıb, onun ünvanı Paşinyan olmalı idi. Digər tərfdən də, Rikerin Azərbaycan Prezidentinə belə bir söz deməsi inandırıcı görsənmir. İnandırıcı görsənən odur ki, Ermənistan mətbuatının onun fikirlərini təhrif edib. Hesab edirəm ki, Filip Riker Ermənistan mediasının iddiasına aydınlıq gətirməlidir. Çünki bu fikirlərin heç bir əsası yoxdur, zorakılıq edən də, müharibə cinayəti törədən də, dinc insanları bombalayan da, raket atəşinə tuş edən də Ermənistanın cinayətkar hərbi-siyasi rəhbərliyidir”-deyə F.Ələkbərli qeyd etdi.
İradə SARIYEVA
