“Müxalifət Qarabağla bağlı Rusiyanın təkliflərini qəbul etmirsə, uca səslə rədd etsin”. Bunu Ermənistanın Baş naziri Nikol Paşinyan parlamentdə çıxışı zamanı deyib.
Paşinyan bunu belə izah edib: “Qarabağla bağlı indiki mövqeyimiz müxalifətin bizdən tələb etdiyidir. Ona görə də müxalifət hesab edir ki, Rusiyanın təklifləri rədd edilməlidir. O zaman bunu yüksək səslə bəyan etmək düzgün olardı”.
Onun sözlərinə görə, Rusiya prezidenti Vladimir Putinin “Valday”da verdiyi bəyanat bir sıra məsələlərə aydınlıq gətirib: “Rusiyanın təklifləri ilə bağlı bu sualın verildiyi vaxt hökumət çox cəld reaksiya verdi. Lakin həm müxalifət müstəvisində, həm də Qarabağdakı “hakimiyyət”dən Rusiyanın təkliflərini qəbul etməsi tələbi ilə bəyanatlar verildi. Hökumət artıq 2021-ci ilin yanvarından bu sazişləri qəbul edib və onlar haqqında düzgünlük əsasında danışmayıb”.
Görünən odur ki, Paşinyan bu minvalla müxalifəti oyundankənar vəziyyətə salmağa və təşəbbüsü öz əlində saxlamağa çalışır.
“O bununla həm müxalifəti neytrallaşdırmaq istəyir, həm də revanşistləri Rusiyanın dəstəyindən məhrum etməyə çalışır”
Sözügedən məsələ ilə bağlı fikirlərini “Bakı-Xəbər”lə bölüşən Yeni Yol Partiyasının sədri Ramil Hüseynovun fikrincə, Paşinyanın müxalifətin guya Qarabağla bağlı Rusiya variantının əleyhinə olduğu barədə səsləndirdiyi fikirlər ağ yalandır: “Əslində Paşinyan belə deməklə özünü gülünc duruma salır. Ermənistanda Paşinyana qarşı əsas müxalif qüvvələr revanşistlərdir. Onların da Rusiyaya bağlı olduğunu nəinki Ermənistanda, dünyada belə bilməyən yoxdur. Çünki indi Ermənistanda müxalif mövqedə olanlar məhz Rusiyanın hərtərəfli himayəsi ilə ölkədə 20 il hakimiyyətdə oldular. Rusiyanın təklif etdiyi variant Qarabağın “status” məsələsinin sonrakı dövrə saxlanılmasını nəzərdə tutur. Bu o deməkdir ki, Rusiya Qarabağın Azərbaycanın tərkibində olmasını istəmir. Ermənistanda revaşist müxalifətin də istəyi bu deyilmi? Paşinyan bununla kimi aldatmaq istəyir? Hesab edirəm ki, Paşinyan belə açıqlamalar verməklə həm müxalifəti neytrallaşdırmaq istəyir, həm də revanşistləri Rusiyanın dəstəyindən məhrum etməyə çalışır. Ancaq düşünmürəm ki, onun bu cür açıqlamaları Kremldə rəğbətlə qarşılansın. Ən azından ona görə ki, Rusiya hakimiyyəti zatən Paşinyana etibar etmir və onun Qərbin bir layihəsi olduğunu yaxşı bilir. Sadəcə, Rusiyanın imkanları o dərəcədə güclü deyil ki, Paşinyanı devirsin. Ona görə ki, revanşistlərin Ermənistanda elektoratı zəifdir. Erməni cəmiyyəti Köçəryan-Sarkisyan rejiminin 20 illik kriminal hakimiyyətindən necə bezibsə, artıq onlara stavka edilmir. Rusiyanın da hazırda onları əvəz edə biləcək siyasi fiquru yoxdu. Düzdü, gələcək planları milyarder Vardanyanı Ermənistanda hakimiyyətdə gətirməkdir, amma buna da zaman lazımdır. Üstəlik, Ermənistan uğrunda Qərblə Rusiyanın geosiyasi mübarizəsinin getdiyi bir vaxtda Vardanyan layihəsinin nə dərəcədə özünü doğruldacağı naməlumdur”.
Vidadi ORDAHALLI
