Prezident İlham Əliyevin təsdiqlədiyi “İşğaldan azad edilmiş ərazilərə Böyük Qayıdışa dair I Dövlət Proqramı”nda əksini tapan sənəddə 2025-ci ilə qədər Ağdamdan Xankəndiyə qaz kəmərinin çəkilməsi, onun üzərində qaztənzimləyici məntəqələr quraşdırmaqla kəmərin qollarının tikintisinin planlaşdırması nəzərdə tutulub.
Tikinti işlərini Dövlət Neft Şirkəti (SOCAR) icra edəcək. Digər icraçılar isə Energetika Nazirliyi, İqtisadiyyat Nazirliyi, Fövqəladə Hallar Nazirliyi, Dövlət Şəhərsalma və Arxitektura Komitəsidir.
O da məlumdur ki, Ermənistan 1990-cı illərdə torpaqlarımızı işğal etdikdən sonra ərazimizdən Qarabağa qanunsuz olaraq qaz boru və elektrik xəttləri çəkib. Bu boru xətti ilə Rusiya və İran qazı ərazimizə ötürülür. Bu beynəlxalq hüquqa ziddir, bununla əlaqədar Azərbaycanla imzalanan heç bir dövlətlərarası saziş yoxdur. O baxımdan Ağdamdan Xankəndiyə qaz kəmərinin çəkilişinin planlaşdırılması önəmli hadisədir. Bu, həm də o deməkdir ki, Qarabağdakı etnik ermənilər Azərbaycanın tərkibində yaşamağa hazırlaşmalıdılar.
Maraqlıdır, bu, 2025-ci ildə rus sülhməramlılarının müddətinin başa çatmasına qədər Qarabağdakı etnik ermənilərin Azərbaycana inteqrasiya olunmasında nə kimi rol oynayacaq?
“Bütün bunlar istər-istəməz onların dövlətimizə münasibətinin dəyişməsinə öz təsirini göstərəcək”
Məsələyə münasibət bildirən Aydınlar Partiyasının sədri Qulamhüseyn Əlibəylinin fikrincə, məlum qərar ümumən etnik ermənilərin Azərbaycana inteqrasiya olunmasına müsbət təsir edəcək: “Təbii ki, işğaldan azad edilmiş ərazilərdə Azərbaycan öz suveren hakimiyyətini bərqərar etməlidir. O cümlədən, müəyyən sosial və digər problemləri həll etməlidir. Ağdam-Xankəndi qaz kəmərinin çəkilməsi o deməkdir ki, orada yaşayanların kimliyindən asılı olmayaraq onlar Azərbaycan vətəndaşıdır. Ona görə də onlar Azərbaycan dövlətinin qayğısını hiss etməlidilər. Hesab edirəm ki, sözügedən qaz kəmərinin çəkilməsi Qarabağ ermənilərini Ermənistanın asılılığından bir qədər azad edəcək. Ancaq tam azad edə bilməyəcək. Çünki mahiyyət etibari ilə onsuz da onların xisləti erməni xislətidir. Hələ bir müddət onlar Ermənistandan gələn təlimatlara uyğun hərəkət edəcəklər. Ancaq hər halda Azərbaycan dövlətinin gördüyü işlər Qarabağda yaşayan və ölkəmizin vətəndaşlığını qəbul etmək istəyən ermənilərin Azərbaycan cəmiyyətinə inteqrasiyasında əhəmiyyətli rol oynayacaq amillərdən biri olacaq. Bununla onlar bir daha görəcəklər ki, Azərbaycan dövləti öz vətəndaşlarının qayğısına necə qalır. Öz vətəndaşlarının sosial və məişət problemlərini necə həll edir. Bütün bunlar, istər-istəməz, Qarabağdakı etnik ermənilərdə Azərbaycan dövlətinə münasibətin dəyişməsinə öz təsirini göstərəcək”.
Bir sözlə, partiya sədri bunun müsbət effekt verəcəyi qənaətindədir.
Vidadi ORDAHALLI
