Məlum olduğu kimi, Milli Məclisin noyabrın 16-da keçirilən iclasında Fransa Senatının Azərbaycana qarşı qətnaməsi ilə bağlı bəyanat qəbul edilib. Bəyanatda qeyd edilir ki, Fransa Senatının Azərbaycana qarşı qəbul etdiyi qətnamə Fransa ilə Azərbaycan arasında ikitərəfli öhdəlikləri pozur.
Bildirilib ki, Azərbaycanın ərazi bütövlüyünə hörmət edilməsi Fransa hökumətinin həm ikitərəfli, həm çoxtərəfli öhdəliklərindən irəli gəlir.
Bəyanatda Fransa ilə bağlı bir sıra məsələlərin yenidən nəzərdən keçirilməsi üçün hökumətə müraciət edilib. O məsələlərdən biri də Azərbaycanla Fransa arasında mövcud olan siyasi, iqtisadi münasibətlərə yenidən baxılmasıdır.
Əgər siyasi-iqtisadi məsələlərə yenidən baxılacaqsa, bu hansı nəticələrə gətirib çıxara bilər?
“İqtisadi cəhətdən Fransanın fəaliyyətini məhdudlaşdırmağımız onun üçün bəlkə də böyük fəlakət olmazdı, Fransa üçün əsl fəlakət onun siyasi baxımdan ifşa edilməsidir”
Məsələ ilə bağlı Liberal İqtisadçılar Mərkəzinin rəhbəri Akif Nəsirli “Bakı-Xəbər”ə şərhində bildirdi ki, bütövlükdə Fransa ilə öz dilində danışmaq lazımdır. Bu ölkənin Senatının qəbul etdiyi qətnamədə əks olunan məsələlərin tamamilə absurd olduğunu qeyd edən A.Nəsirlinin sözlərinə görə, Azərbaycan hökuməti Fransaya qarşı addımlar atmaqdan ötrü Senatın çıxardığı qətnaməni ifşa etməlidir. “Çünki o qətnamədə o qədər ədalətsiz müddəalar yer alıb ki, bu, Azərbaycanın müstəqillyinə, ərazi bütövlüyünə təhdiddir. Ona görə də Azərbaycan həm BMT qarşısında Fransa ilə bağlı məsələ qaldırmalıdır, həm də öz tərəfdaşlarından bu ölkəyə qarşı siyasi təzyiq vasitəsi kimi istifadə etməlidir. “Biz bu gün siyasi-iqtisadi cəhətdən addımlar atsaq və Fransa ilə iqtisadi və siyasi münasibətlərimizə kəssək bu ölkəyə o qədər də ciddi təsir göstərə bilməyəcəyik. Çünki bu ölkə dünyanın aparıcı ölkələrindən biridir. Fransanın bizə qarşı bu cür mövqe göstərməsi qəbuledilməzdir. Ona görə də, hesab edirəm ki, bu məsələ siyasi müstəvidə həll olunmalıdır. Siyasi baxımdan Fransa yerində oturdulmalıdır. O nə qədər güclü olsa da, təsir imkanları geniş olsa da, Fransa Senatının bu qətnamədəki mövqeyi beynəlxalq hüquq normalarının pozulmasıdır, müstəqil dövlətin ərazi bütövlüyünə şübhədir, daxili işlərinə qarışmaqdır. Bu müddəlarla bağlı siyasi-diplomatik addımlar atıb Fransanı güncə sıxışdırmaq lazımdır. Əlbəttə, biz əlavə vasitə kimi, tutaq ki, Fransanı Azərbaycanın enerji sektorundakı payından məhrum etdik, amma iqtisadi sahədə atılacaq addımlarla Fransaya o qədər də ağır zərbə vura bilmərik, əsas işimizi siyasi-diplomatik sahədə həyata keçirməliyik. Azərbaycan hökuməti siyasi-diplomatik yolla öz tərəfdaş ölkələri ilə birlikdə bu istiqamətdə iş aparmalıdır. Diplomatiya işə düşməlidir. Burada iqtisadi məsələ o qədər də yetərli təzyiq vasitəsi deyil. Ona görə ki, Fransanın bizimlə elə də ciddi iqtisadi əlaqləri yoxdur”.
A.Nəsirli hesab edir ki, Fransanın iqtisadiyyatda payı enerji sektorundadır, bu da çox az faiz təşkil edir. “İqtisadi cəhətdən Fransanın fəaliyyətini məhdudlaşdırmağımız onun üçün bəlkə də böyük fəlakət olmazdı, Fransa üçün əsl fəkakət onun siyasi baxımdan ifşa edilməsidir. Fransanın ədalətsiz, qərəzli mövqeyinin siyasi cəhətdən ifşası bu ölkə üçün böyük fəlakət olardı”.
A.Nəsirli qeyd etdi ki, bədnam qətnamədə əks olunanları oxuyarkən Fransanın burada siyasi və diplomatik baxımdan həddini aşdığı aşkar görsənir. “Məsələn, “Arsaxın müstəqilliyi tanınmalıdır” ifadəsinə baxsanız onun həddini aşdığı açıq görsənər. Fransa, sən kimsən ki, Azərbaycanın daxili işlərinə qarışırsan, onun ərazi bütövlüyünü şübhə altına almağa cəhd edirsən? Fransada yarım milyon erməni yaşayır, muxtariyyət həvəsindəsənsə onlara muxtariyyət ver. Ermənistan-Azərbaycan sərhədində sülhməramlı dayanmalıdır deyirsən, sən bunu hansı əsasla deyirsən? Bu məsələdə Fransaya qarşı bizə Rusiya qoşula bilər. Yalandan iddia edir ki, guya Azərbaycanda “erməni mirası” dağıdılıb, Azərbaycanda isə heç bir erməni olmayıb. Fransanın ədalətsiz mövqeyinə görə Azərbaycanın öz tərəfdaşları ilə birlikdə Fransa üzərinə getməyə tarixi şans yaranıb. Bundan istifadə etmək lazımdır”-deyə A.Nəsirli qeyd etdi.
A.Nəsirli onu da əlavə etdi ki, Fransa ilə iqtisadi-siyasi müstəvidə əlaqələr, əməkdaşlıqlar nəzərdən keçirilə bilər, amma biz ona daha çox siyasi-diplomatik yöndə zərbələr vura bilərik, bu daha təsirli olar.
İradə SARIYEVA
