Prezident İlham Əliyev dövlət katibi Entoni Blinkenin Azərbaycanla Ermənistan arasında münasibətlərin normallaşdırılması prosesini daim diqqətdə saxlamasının və ABŞ-ın bu istiqamətdə göstərdiyi səylərin yüksək qiymətləndirildiyini diqqətə çatdırıb. Bu barədə Prezident İlham Əliyev noyabrın 16-da ABŞ dövlət katibi Entoni Blinkenlə telefon danışığı zamanı bildirib.
Azərbaycan Prezidenti qeyd edib ki, bu istiqamətdə göstərilən səylərə və aparılan danışıqlara baxmayaraq, Ermənistan rəhbərliyi tərəfindən son günlərdə səsləndirilən ziddiyyətli bəyanatlar iki ölkə arasında münasibətlərin normallaşmasına və sülh gündəliyinin irəli aparılmasına mənfi təsir göstərir.
Prezident burda Ermənistan rəhbərliyinin təxminən hansı ziddiyyətli bəyanatlarını, mövqelərini, fikirlərini nəzərdə tutur ki, sülh prosesinin irəliləməsinə maneçilik törədir?
Azərbaycan Naminə Alyans Partiyasının (ANAP) sədri Abutalıb Səmədov “Bakı-Xəbər”ə bildirdi ki, Azərbaycan Prezidenti Amerika Birləşmiş Ştatlarının Dövlət katibi ilə telefon danışığında tamamilə haqlı olaraq Ermənistan rəhbərliyinin ziddiyyətli bəyanatlarına diqqət çəkib. “Məlumdur ki, Vaşinqton sülh sazişinin imzalanması istiqamətində ən çox fəallıq göstərən mərkəzlərdən biridir. Bir qədər əvvəl Vaşinqtonda Azərbaycan Prezidentinin köməkçisi Hikmət Hacıyevlə Ermənistan Təhlükəsizlik Şurasının katibi arasında səmərəli danışıqlar olub və “Vaşinqton variantı” deyilən bir sənədin müəyyən müddəaları hazırlanıb. Mətbuatda gedən informasiyalar “Vaşinqton variantı”nın hələlik Azərbaycanın maraqlarına cavb verdiyini göstərirdi. Təbii ki, Azərbaycan bu variant üzərində səmimi şəkildə işləmək istədiyini nümayiş etdirir. Ancaq sonradan ortaya Rusiya prezidentinin təxribatçı “Valday” bəyanatı çıxdı. O erməni cəmiyyətini Paşinyana qarşı qaldırmaq üçün “Vaşinqton variantı”nda nəzərdə tutulan bəzi məqamları açıqladı. Bu bəyanat həqiqətən də bir dövlət başçısına qətiyyən yaraşmayan bir bəyanat idi. Putin iddia etdi ki, Vaşinqton sənədində Azərbaycanın Qarabağ üzərində suverenliyi nəzərdə tutulub və əgər Ermənistan bununla razıdırsa Rusiya da buna etiraz etmir. Guya Qarabağ üzərində Azərbaycanın suverenliyiyinin nəzərdə tutulmasında qeyri-adi nəsə var idi. Halbuki, həm Praqa sənədində, həm Soçidə imzalanan sənəddə Azərbaycanın öz ərazisi üzərində suverenliyini Ermənistan öz imzası ilə qəbul edib, burada Rusiyanın da, Avropa İttifaqının da imzası var. Sonradan Nikol Paşinyan Rusiya variantını qəbul etdiyini açıq şəkildə bəyan etdi və bununla kifayətlənməyib Putindən xahiş etdi ki, Rusiya öz mövqeyində axıra qədər dayansın və Azərbaycanı məcbur etməyə çalışsın, Azərbaycana təzyiqlər göstərsin. Təbiidir ki, bu mümkün olan məsələ deyildi. Azərbaycan Prezidenti bunların qarşısını birmənalı şəkildə aldı, hətta Putinlə görüşəndə də heç kimin gözləmədiyi qətiyyətlə - söhbət təbii ki, ermənilərdən və ruslardan gedir, biz bu qətiyyəti gözləyirdik - Prezident açıq şəkildə dedi ki, Qarabağ məsələsi deyilən bir məsələ yoxdur və bu məsələni müzakirə etmək fikrində deyil. Soçi görüşündən sonra da Paşinyan dəfələrlə Rusiyanın təklifini dəstəklədiyini bəyan edib. Paşinyan bir tərəfdən Praqa sənədinə qol çəkir, bir tərəfdən Vaşinqtonda onun nümayəndəsi müəyyən sənəd üzərində işləməyə razılıq verir, digər tərəfdən o fəaliyyətlərə qətiyyən uyğun olmayan Rusiyanın təklifini dəstəklədiyini bəyan edir. Ermənistanın baş nazirinin son dövrlər verdiyi ziddiyyətli bəyanatlar bununla bitmir”.
A.Səmədovun sözlərinə görə, Avropa İttifaqının (Aİ) vasitəçiyi ilə keçiriən danışıqlarda Zəngəzur dəhlizi ilə bağlı müəyyən razılaşmalara gedəndən sonra Ermənistana qayıdan Paşinyan Azərbaycana yeni variantlar təklif edir ki, qətiyyən Azərbaycan üçün məqbul variantlar deyil. “Digər ziddiyyətli bəyanatlar verir və son bu cür bəyanatları Ermənistan hökumətinin başçısı parlamentdə bir daha səsləndirdi. Təbiidir ki, bunlar da danışıqlar prosesinə ciddi zərbə vurur. ABŞ-ın aktiv şəkildə sülh sazişini imzalaması üçün çalışdığı məqamda Paşinyanın mövqeyi, onun ziddiyyətli bəyanatları bu prosesi ləngitməyə xidmət edir. Azərbaycan Prezidenti də Dövlət katibi Blinkenin diqqətini bu məsələyə çəkib və Ermənistan rəhbərliyi ilə bu istiqamətdə söhbət etməyin zəruriliyini onun diqqətinə çatdırıb. Həm ABŞ, həm Ermənistan bilməlidir ki, Azərbaycan rəhbərliyi Paşinyanın bu ikiüzlü mövqeyinə imkan verməyəcək və onun dünya ictimaiyyətini bundan sonra da aldatmaq cəhdlərinin qarşısını qətiyyətlə alacaq”-deyə A.Səmədov vurğuladı.
İradə SARIYEVA
