Ermənistanın baş naziri Nikol Paşinyan KTMT-nin Kollektiv Təhlükəsizlik Şurasının İrəvanda keçirilməsi planlaşdırılan iclasında konsensus əldə edə biləcəklərinə ümid etdiklərini bildirib:
“Ümid edirik ki, KTMT-nin Kollektiv Təhlükəsizlik Şurasının noyabrın 23-də İrəvanda keçiriləcək iclasında konsensus əldə edə biləcəyik. Məqsədimiz KTMT ilə Azərbaycan arasında müharibəyə səbəb olmaq deyil. Biz KTMT-nin bu vəziyyətdə hansı siyasi mövqe tutduğunu anlamaq istəyirik”.
Paşinyan həmçinin KTMT-nin sentyabr ayında sərhəddə baş verən qarşıdurmadan sonra alınan nəticələrə cavab verməməsindən təəssüfləndiyini bəyan edib və bu istiqamətdə mühüm bir qərarın qəbul ediləcəyinə ümidvar olduğunu bildirib.
Paşinyan ev sahibliyindən istifadə edib, KTMT-dən istədiyi cavabı ala biləcəkmi?
Hərbi-siyasi ekspert Ramil Məmmədli “Bakı-Xəbər”ə açıqlamasında bildirdi ki, Paşinyan hakimiyyətə gələndən sonra ilk işi KTMT-yə dönəm sədrliyini edən erməni generalını həbs etdirmək oldu: “Sonrakı dönəmlərdə dəfələrlə cəhd etdi ki, təşkilatı Azərbaycana qarşı addımlar atmağa sövq etdirsin. Bunların heç biri fayda vermədi. KTMT-nin videoformat şəklində keçirilən son iclasında Paşinyanın istəkləri fiaskoya uğradı. Paşinyan Azərbaycanı “təcavüzdə” ittiham edərək KTMT-nin müvafiq addımlar atmasını istədi. Ancaq qurumda təmsil olunanlar onu dəstəkləmədilər. Xüsusən də Belarus prezidenti Aleksandır Lukaşenkonun sərgilədiyi sərt mövqe Paşinyana vurulan zərbə idi. Belarus prezidenti açıq bəyan etdi ki, bütün məsələləri Prezident İlham Əliyevlə həll etmək lazımdır. Hətta onu da dedi ki, bu gün qərar verməsəniz, daha pis olacaq. O cümlədən, iclasda iştirak edən Qazaxıstan prezidenti Tokayev də oxşar mövqe sərgilədi. Bildirdi ki, sərhədlə bağlı məsələlər sülh yolu ilə həll olunmalıdır. Məhz bütün bunlar fiaskoya uğradığına görə Paşinyan KTMT-yə daha da qəzəblidir. Bununla o, həm də ölkədə KTMT və Rusiyaya qarşı ictimai rəydə nifrəti artırır. Guya KTMT məqsədyönlü şəkildə Azərbaycanın “təcavüzünü” önləmir. Paşinyan yaxşı bilir ki, KTMT-də təmsil olunan ölkələr Azərbaycanla çox yaxın münasibətlərə malikdir. Sadəcə, o, sərhəd məsələlərini şişirdərək bundan KTMT və Rusiyaya qarşı istifadə etməyə çalışır”.
Ekspertin sözlərinə görə, Paşinyan qurumu üzvlükdən çıxacağı ilə hədələyir: “O, birdən-birə KTMT-dən çıxmaqla bağlı addım ata bilməz. Çünki Ermənistanın qarşısında kəskin şəkildə xarici sərhədlər məsələsi dayanır. Axı onları Rusiya Federal Təhlükəsizlik Xidmətinin Sərhəd Xidməti qoruyur. Həmçinin Ermənistanda Rusiya hərbi bazası var. Onun KTMT sammitinin ev sahibi kimi çıxış etməsi heç nəyi həll etmir, həmçinin heç nəyə də təsir etməyəcək. Hamı bilir ki, Nikol Paşinyan Kollektiv Təhlükəsizlik Müqaviləsi Təşkilatının işlərinə qarışdı və KTMT-nin baş katibi olmuş Ermənistan nümayəndəsi Yuri Xaçaturovu həbs etdi. Bununla da bütün təşkilatın imicinə, diplomatik və hərbi-siyasi səviyyəsinə ziyan vurulmuş oldu. Bütün bu amillər onu deməyə əsas verir ki, Paşinyanın KTMT-ni proseslərə qoşmaqla bağlı budəfəki planı da tam fiaskoya uğrayacaq”.
Məhəmmədəli QƏRİBLİ
