BMT-nin İnsan Hüquqları Şurası "İranda insan hüquqları ilə bağlı vəziyyətin pisləşməsi" mövzusunda xüsusi sessiya keçirəcək. Bu barədə Şuranın bəyanatına istinadən məlumat verilir. Qeyd olunur ki, iclas noyabrın 24-də Almaniya və İslandiyanıın müraciəti əsasında keçiriləcək. Bu təşəbbüsü hazırda 44 dövlət dəstəkləyib.
Məlumdur ki, İran dünyada terroru dəstəkləyən və həyata keçirən bir ölkə kimi tanınır. Bunu bir sıra faktlarla da sübut etmək olar. İranın terroru dəstəkləyən ölkə olmasına ən bariz nümunə onun Yaxın Şərqdə həyata keçirdiyi terror aktlarıdır. İranin bu yaxınlarda Türkiyə ərazisində terror həyata keçirmək cəhdlərinin müəyyən edilməsi və neytrallaşdırılması ilə bağlı baş verənlər bu ölkənin gercək mahiyyətini ortaya qoymuş olur. Eləcə də, bu ölkə, Ermənistan istisna olmaqla, bütün qonşu ölkələrə qarşı düşmənçilik siyasəti yürüdür, ideoloji və hərbi qarşıdurma şəraitində yaşayır. Faktiki olaraq İraq, Suriya, Yəmən, Livanda terrorun arxasında İranın durması ilə həmin bölgəni qan gölməçəsinə çevirib.
İran həm də Rusiyaya silah verməsi ilə Ukrayna xalqına qarşı terror etmiş oldu. Son günlər bizim DTX tərəfindən İrana casusluq edən bir neçə dəstənin ifşa edilməsi bir daha sübut edir ki, həmin ölkənin Azərbaycanla bağlı da niyyətləri məkrlidir. Burada da zorla hakimiyyətin ələ keçirilməsini dəstəkləyir.
Bütün bu dəlillər İranla bağlı BMT-də keçiriləcək sessiyada onun terrorçu mahiyəti ilə bağlı açıq müzakirələrin aparılmasını və bu barədə yekun qərarın qəbul edilməsini zəruri edirmi?
Böyük Azərbaycan Partiyasının sədri Elşad Musayev “Bakı-Xəbər”ə açıqlamasında bildirdi ki, Tehran rejimi din pərdəsi altında İranda yaşayan xalqları əzməklə məşğuldur: "Təkcə ordakı azərbaycanlıların deyil, farslar və ermənilər istisna olmaqla, digər xalqların da, demək olar ki, bir çox hüquqları təmin edilməyib. Eyni zamanda, İran dövləti beynəlxalq aləm üçün də təhlükəli bir dövlətdir. Terroru maliyyələşdirən, dəstəkləyən, terror təşkilatları yaradan, müsəlman dövlətləri arasında daim təfriqə, ayrıseçkilik salan bir dövlətdir. Bununla belə, Azərbaycan İrana qarşı uzun müddət mülayim, bəlkə də mən deyərdim ki, həddindən artıq mehriban qonşuluq siyasəti yürüdüb. Bu da bizim dövlətimizin beynəlxalq siyasi xəttindən və humanist mahiyyətindən irəli gəlir. Amma son dövrlərdə biz İranın istər öz daxilində vətəndaşlarına münasibətdə, istərsə də qonşulara münasibətində çox kəskin, radikal bir dəyişməni hiss edirik. Beynəlxalq hesabatlarda qeyd edilir ki, 1979-cu ildə “İslamçıların” hakimiyyətə gəlişindən sonra İranın dövlət strukturlrının yönləndirməsi ilə dünyanın 20-dən çox ölkəsində sui-qəsdlər və ya terror aktları təşkil edilib. Bu aktlar Avropa, Şimali və Cənubi Amerika, Afrika və Asiya daxil olmaqla, dünyanın 5 qitəsində həyata keçirilib. Bu baxımdan İran rejiminin terrora dəstək verməsi qlobal problem kimi təsnif edilib. ABŞ Dövlət Departamenti tərəfindən tərtib edilən, “Beynəlxalq qanunları pozan İran rejiminin dağıdıcı hərəkətlərinin tarixi" adlı hesabatda göstərilir ki, İran hər il Suriya, Yəmən və İraqda terror aktlarının gerçəkləşdirilməsi üçün milyardlarla dollar vəsait xərcləyir. Buna görə də, BMT-nin xüsusi sessiyasında İranın terrorçu mahiyyətinə tam aydınlıq gətirilməlidir”.
Məhəmmədəli QƏRİBLİ
