Bir qrup iranlı deputat Azərbaycan Prezidenti İlham Əliyevin Türk Dövlətlərinin 9-cu Sammitində Azərbaycanın hüdudlarından kənarda yaşayan azərbaycanlıların dil hüquqları haqqında fikirlərindən bərk narahat olub.
Qeyd ediblər ki, Gülüstan müqaviləsi olmasaydı, Azərbaycan İranın bir hissəsi olardı. Deputat Seyed Alborz Hosseyni Azərbaycanın İranın bir hissəsi olduğunu, Şimali Azərbaycan ərazisinin Gülüstan müqaviləsinə əsasən İrandan ayrıldığını qeyd edib.
Bu azmış kimi, İran parlamentində Naxçıvanı ələ keçirmək çağırışı səslənib: “Nəvə öz babasını inkar edə bilməz. Diqqət edin ki, Azərbaycan İrandan ayrılıb, əksinə deyil”.
Görünən odur ki, İran deputatları tarixi saxtalaşdırmaqla məşğuldurlar. 200 il əvvəl Azərbaycan İranın tərkib hissəsi olmayıb. İranın böyük hissəsi Səfəvilər dövlətinin tərkibində olub. Üstəlik, hazırda İran əhalisinin əksəriyyətini azərbaycanlılar təşkil edir. O baxımdan İran deputatlarının belə yanaşmasının heç bir tarixi əsası yoxdur.
“Tarix heç nəyi unutmur və zamanı çatanda hər şey öz yerinə geri dönür”
Məsələyə münasibət bildirən “SƏS” Media Qrupunun rəhbəri, politoloq Bəhruz Quliyevin fikrincə, yaxşı olardı İran deputatları tarixi düzgün araşdırsınlar: “Yaxşı olardı ki, iranlı deputatlar əsassız və heç bir tarixi sübutları olmayan, eləcə də mehriban qonşuluq prinsiplərinə zidd olan fikirlər səsləndirməkdənsə son 200 ilin tarixini vərəqləsinlər. Ən azından onu öyrənsinlər ki, Arazın o tayında da, bu tayında da idarəçilik hər zaman azərbaycanlıların əlində olub. Yaxşı olardı ki, iranlı deputatlar arxivlərdə qeyd edilən tarixi faktları araşdırsınlar. Prezident İlham Əliyevin Türk Dövlətlərinin 9-cu Sammitində Azərbaycanın hüdudlarından kənarda yaşayan azərbaycanlıların dil hüquqları haqqında irəli sürdüyü fikirlər ilk növbədə o deməkdir ki, dövlətimizin başçısı milli kimliyimizin, dilimizin, tariximizin, ənənələrimizin qorunub-saxlanılması istiqamətində öz qətiyyətini göstərib. Bu gün dünyanın bir çox ölkəsində 50 milyondan çox azərbaycanlı yaşayır və onlar milli dəyərlərimizi, kimliyimizi, dilimizi, mədəniyyətimizi qoruyub-saxlamaqla gələcək nəsillərimizə ötürürlər. Təəssüf ki, qonşu və müsəlman İranda biz bunun şahidi olmuruq. Ona görə yox ki, Cənubi Azərbaycanda yaşayan soydaşlarımız bu ənənələri davam etdirmirlər. Ona görə ki, oradakı hakimiyyət buna imkan vermir. Əksinə, İranda yaşayan bir neçə min erməni üçün, demək olar ki, bütün şəraitlər yaradılıb. 30 milondan çox olan azərbaycanlılara isə qadağalar tətbiq olunur. Onlar İranın mediasında daim təhqir obyektlərinə çevrilir, soydaşlarımıza qarşı təqib və təzyiq siyasəti, repressiyalar tətbiq olunur. Belə olan halda 50 milyonluq Azərbaycan xalqının lideri kimi Prezident İlham Əliyev haqlı olaraq sözügedən bəyanatını səsləndirib və daha yaxşı olardı ki, iranlı deputatlar bu bəyanatdan doğru nəticə hasil etsinlər”.
B.Quliyev hesab edir ki, İran deputatları tarixi saxtalaşdırırlar və bu vasitələrlə özlərinin qondarma iddialarını reallıq kimi göstərməyə cəhd edirlər: “Hazırda bütün faktları, dəlilləri sübut edən arxivlər mövcuddur və həmin arxivlər açılsa həqiqətlər üzə çıxar. Yaxşı olardı ki, iranlı deputatlar arxivlərdə qeyd edilən tarixi faktları araşdırsınlar və sonra ağıllarına gələn fərziyyələri ilə ictimai rəyi çaşdırmaqdan çəkinsinlər. Ancaq buna cürət etmirlər. Onlar yaxşı bilirlər ki, Azərbaycan öz tarixi kökləri ilə bütün regiona sahib olub və sonrakı proseslərdə baş verən kataklizmlər, xəyanətlər nəticəsində torpaqlarımız bölünüb, parçalanıb. Tarix isə heç nəyi unutmur və zamanı çatanda hər şey öz yerinə geri dönür. Bu gün Təbrizdə, Ərdəbildə, Urmiyada, Zəncanda və s. qədim, tarixi Azərbaycan torpaqlarında milli kimlikləri, azadlıqları uğrunda mücadilə aparan soydaşlarımız da arxayındırlar. Əmindirlər ki, onların kürəklərini dayayacağı yer Azərbaycan dövləti, Azərbaycan xalqı və onun lideridir”.
Bu baxımdan politoloq o qənaətdədir ki, İran hakimiyyəti Azərbaycanla bağlı öz mənfur planlarını reallaşdıra bilməyəcək.
Vidadi ORDAHALLI
