Xəbər verildiyi kimi, Ermənistanın baş naziri Nikol Paşinyan ölkənin ictimai televiziyasına geniş müsahibə verib. Müsahibədə o, bir sıra məqamlara toxunub.
Paşinyan müsahibəsində qeyd edib ki, Azərbaycan XİN-in son bəyanatında dəhliz sözündən istifadə olunmur. Bundan çıxış edən Paşinyan vurğulayıb ki, Azərbaycanın qərb rayonları ilə Naxçıvan arasında nəqliyyat əlaqəsinin yaradılması üçün heç bir maneə yoxdur: “Günü bu gün hökumət belə bir qərarı kağız üzərində de-yure qəbul edə bilər. Onlar Naxçıvanla əlaqə üçün Ermənistanın yollarından istifadə etmək istəyirlərsə, buyursunlar. Biz demişik ki, bu yol istənilən an açıla bilər”.
Əslində Paşinyanın Azərbaycan XİN-in bəyanatından ruhlanaraq belə qənaətə gəlməsi səhv yanaşmadır. Çünki həmin bəyanatda dəhliz sözünün işlədilməməsi o demək deyil ki, Azərbaycan Zəngəzur dəhlizindən imtina edib. Zəngəzur dəhlizi məsələsində Azərbaycanın mövqeyi dəyişməz olaraq qalır.
“Danışıqlar masasında bir mövqe ortaya qoyur, İrəvana qayıdandan sonra fərqli mövqe sərgiləyir”
Sözügedən məsələni “Bakı-Xəbər”ə şərh edən politoloq Məhəmməd Əsədullazadə Paşinyanın dəhliz məsələsində davamlı olaraq destruktiv mövqedən çıxış etməsinə bir neçə prizmadan yanaşdı: “Əvvəla, Ermənistanla Azərbaycan arasında üçtərəfli 10 noyabr birgə bəyannaməsinin 9-cu bəndinə əsasən, Naxçıvan Muxtar Respublikası ilə Azərbaycanın qərb rayonları arasında əlaqə bərpa edilməli və bu yolda Rusiya Federal Təhlükəsizlik Xidməti (FTX) təhlükəsizliyi təmin etməlidir. Burada deyilmir ki, Ermənistan təhlükəsizliyi təmin etməlidir. Orada söhbət həmin yolun təhlükəsizliyinin təmin olunmasından gedir. Bunun da mahiyyəti dəhliz deməkdir. Necə ki, Laçın dəhlizində təhlükəsizliyi Rusiya sülhməramlı qüvvələri təmin edir, məhz Zəngəzur dəhlizi də bunu ehtiva edir. Ancaq biz görürük ki, hər dəfə Paşinyan ümumiyyətlə 10 noyabr razılaşmasının bəndələrini təhrif edir. Onu arzuladığı formada təqdim edir. Halbuki, həmin bənddə maneəsiz gediş-gəliş öz əksini tapıb. Hazırda Ermənistan rəhbərliyi qeyri-konstruktiv mövqe sərgiləyir. Sülh müqaviləsinin bağlanmasına getməkdən hər vasitə ilə yayınır. Baxmayaraq ki, əldə olunan razılaşmalar var. Brüssel və Vaşinqton gündəliyi var. Ermənistan rəhbərliyi Fransanın təhriki ilə sülh müqaviləsinin bağlanmasından yayınır. Məhz 10 noyabr birgə bəyannaməsinin bəndlərini icra etmir. Məqsədi odur ki, yeni əlverişli geosiyasi şərait əldə etsin. Ona görə də danışıqlar masasında bir mövqe ortaya qoyur, İrəvana qayıdandan sonra fərqli mövqe sərgiləyir. Bu baxımdan hesab edirəm ki, biz Paşinyana etibar etməməli və ordumuz həmişə erməni təxribatlarına hazır olmalıdır”.
Ən nəhayət, politoloq hesab edir ki, Azərbaycan Ermənistana yönəlik hərbi təzyiqlərini artırmalıdır.
Vidadi ORDAHALLI
