Ermənistan yenə söz oyunu ilə təxribatlara başlayır. Ermənistan Təhlükəsizlik Şurasının katibi Armen Qriqoryan bəyan edib ki, “Dağlıq Qarabağ problemi” həllini tapmadan Azərbaycanla sülh sazişini imzalamaq mümkün olmayacaq.
A.Qriqoryan sülh üçün Qarabağın ermənilər yaşayan hissəsilə bağlı heç olmasa müəyyən dəqiqləşdirmələrin olmasını vacib sayıb: “Erməni tərəfi Azərbaycanın təqdim etdiyi 5 baza prinsipin genişləndirilmiş variantı üzərində işləyib. Noyabrın 7-də iki ölkənin XİN rəhbərləri Vaşinqtonda bu əsnada görüşüblər. Hazırda Ermənistanla Azərbaycan arasındakı problemlərin kompleks həllinə imkan verən bu mətn çərçivəli razılaşma təsiri bağışlayır. Düşünürəm ki, artıq sülh prosesinin hansı səpkidə aparılması daha da müəyyənləşir”.
Qriqoryanın sözlərinə görə, Ermənistanla Azərbaycan arasında 4 böyük mövzu var ki, onlar da öz növbəsində alt mövzulara bölünür: “Birincisi, humanitar məsələlər, bütün əsirlərin tezliklə azad edilməsi, ikincisi, nəqliyyat yollarının açılması, daha sonra delimitasiya, sərhədlərin təhlükəsizliyi və Dağlıq Qarabağ probleminin həlli üzrə komissiyaların işidir. Təbii ki, danışıqlarda Qarabağ məsələsi müzakirə olunur, biz irəliləyişlə bağlı mümkün həll yollarını axtarırıq. Məsələni gələcəyə buraxmaq, ya da Dağlıq Qarabağla Azərbaycan arasında hüquq və təhlükəsizliyin müzakirəsi üçün beynəlxalq mexanizm yaratmaq variantı var. Dağlıq Qarabağ problemini həll etmədən, heç olmasa Qarabağ probleminin necə həll olunacağına aydınlıq gətirmədən sülh müqaviləsi bağlamaq mümkün deyil. Qarabağ problemindən yan keçmək mümkün deyil, bu bütün iclaslarda müzakirə olunur, gündəmdədir”.
Qriqoryanın “Dağlıq Qarabağ problemi” həllini tapmadan sülh mümkün deyil fikirləri Azərbaycanın mövqeyinə tam əks fikirlərdir. Çünki Azərbaycan hesab edir ki, sülh sazişində ümumiyyətlə “Dağlıq Qarabağ”, “status” ifadəsi olmamalıdır. Ona görə ki, “Dağlıq Qarabağ” adlı ərazi vahidi yoxdur və nə vaxtsa mövcud olan bu problem həllini tapıb. Ermənilər sülh istəyirlərsə, mövcud reallıqları qəbul etməli və Azərbaycanın ərazi bütövlüyünü tanımalıdırlar. Ancaq biz görürük ki, erməni tərəfi hər vasitə ilə Dağlıq Qarabağ məsələsini gündəmə gətirməyə çalışır.
“Qriqoryanın açıqlaması birbaşa olaraq sülh gözləntilərinin üzərindən xətt çəkilməsi anlamına gəlir”
Məsələyə münasibət bildirən Böyük Azərbaycan Partiyasının sədri Elşad Musayevin fikrincə, bütün bunlar o deməkdir ki, biz aldanmamalıyıq: “Yaxın perspektivdə Ermənistanla hansısa sülh sazişinin imzalanacağı real deyil. Qriqoryanın açıqlaması birbaşa olaraq sülh gözləntilərinin üzərindən xətt çəkilməsi anlamına gəlir. Bizim yanaşmamızla ermənilərin yanaşması tamamilə fərqlidir. Biz düşünürük və bəyan edirik ki, Qarabağ problemi həll olunub. Ancaq Ermənistan rəhbərliyi, sıravi ermənilər elə düşünmür. Ermənilər nə iddialarından, nə də revanşist əhval-ruhiyyədən geri çəkilirlər. Ona görə də proseslərə kiməsə aldanmadan, obyektiv yanaşmalıyıq. Ermənilərin nə istədiyini bilməliyik. Onlar altdan-altdan öz siyasətlərini yeridirlər. Belə olmasaydı, o zaman Ermənistan Qarabağdakı separatçılara gələn il üçün 300 milyon dollardan çox vəsait ayırmazdı. Qarabağda separatçıları təmsil edənlər də hər dəfə açıq bəyan edirlər ki, biz Azərbaycanın tərkibində olmayacağıq. O üzdən, biz özümüzü niyə aldatmalıyıq ki? Azərbaycanda bir çox insanlarda belə rəy yaranıb ki, ilin sonuna qədər tərəflər arasında sülh sazişi imzalanacaq. Bu belə deyil. Erməni rəsmiləri sözdə Azərbaycanın ərazi bütövlüyünü tanımağa hazır olduqlarını desələr də, biz nəzərə almalıyıq ki, onlar bunu deyərkən Qarabağı ora aid etmir. Bu baxımdan biz reallığı düzgün qiymətləndirməliyik. Ermənistan yalnız güclə hesablaşır”.
Vidadi ORDAHALLI
