Həyasızlığın dərəcəsinə bax ki, İranın daha bir əyalət mollası Azərbaycanı bu ölkəyə terrorçu göndərməkdə ittiham edib. Belə ki, Xamneyinin rəsmi nümayəndəsi Azərbaycana yönəlik “terrorçu” ittihamı ilə çıxış edib.
Məsələ ondadır ki, Xamneyinin Təbrizdəki nümayəndəsi Məhəmmədəli Ali-Haşem gülünc bəyanat yayaraq, cümə namazı xütbələrində Azərbaycana eyhamla əsası olmayan fikirlər səsləndirib: “Biz heç vaxt qonşularımızın haqlarını pozmamışıq və heç bir ölkəyə də bizim hüquqlarımızı pozmağa icazə verməmişik. Qonşuların da bizimlə sülh və qardaşlıq mövqeyində qarşılıqlı əlaqədə olmasını gözləyirik. İran dəfələrlə vurğulayıb ki, bu yaxınlarda həyata keçirdiyi hərbi təlim heç bir qonşunun nə lehinə, nə də əleyhinə deyil və konkret məqsədləri var idi”.
Daha sonra din xadimi İran rəsmilərinin Azərbaycana qarşı əsassız iddialarını təkrarlayıb: “Hesab edirik ki, dövlətlərin münasibətlərinə xarici müdaxilə zərərlidir və qonşu dövlətlər terrorçuların başqa ölkələrə göndərilməsi üçün platformaya çevrilməməlidir”.
Xamneyinin nümayəndəsinin açıqlamasından belə məlum olur ki, guya Azərbaycan terrorçuların hansısa ölkəyə keçməsində tranzit ölkə rolunda çıxış etdiyi üçün İran Araz boyu hərbi təlimlər keçirib. Halbuki, bütün bunlar sadəcə cəfəngiyatdır. İranın narahatlığı Zəngəzur dəhlizinin reallaşması ilə əlaqədardır.
“Ancaq nə etsələr də, molla rejimi bunu əngəlləyə bilməyəcək”
Məsələyə münasibət bildirən hərbi ekspert Ramil Məmmədlinin fikrincə, Xamneyinin nümayəndəsinin səsləndirdiyi fikirlər əsassız olmaqla yanaşı, reallıqdan uzaq bir yanaşmadır: “Ən azından onra görə ki, Azərbaycan heç vaxt hansısa formada terrora dəstək verən fəaliyyətlə məşğul olmayıb. Baxmayaraq ki, uzun illər ərazilərimizin müəyyən hissəsi Ermənistanın işğalı altında olub. Azərbaycan heç vaxt İrana qarşı platsdarm rolunda çıxış etməyə təşəbbüs göstərməyib. Zamanında bəzi xarici dairələrin bu kimi istəklərini yaxın buraxmayıb. Niyə? Ona görə ki, rəsmi Bakı qonşu dövlətlərlə mehriban münasibətlərin qurulmasının tərəfdarı olub. Cənubda milyonlarla soydaşımız yaşayır. İran isə terroru himayə edən ölkələr siyahısında olub. Molla rejimi bir sıra terrorçu qruplaşmalara yardım edib. Bunu biz demirik. Bunu bir sıra beynəlxalq hesabatlar deyir. İranın adı terroru himayə edən ölkələrin siyahısında öncül yerdədir. Bu baxımdan kimin kim olduğunu hamı yaxşı bilir. Azərbaycanın Vətən müharibəsində əldə etdiyi zəfərdən sonra ötən iki ildə İran Araz çayı boyunca 3 dəfə genişmiqyaslı hərbi təlimlər keçirib. Halbuki, Azərbaycanın İranla sərhədinin 132 kilometri 30 ilə yaxın Ermənistan işğalında olanda bir dəfə də olsun hərbi təlim keçirmədilər. Baxmayaraq ki, o zaman hərbi təlimə ehtiyac var idi, indi yox. Ona görə ki, Azərbaycan İranla dövlət sərhədinə 2 ildir nəzarəti bərpa edib. İranın keçirdiyi təlimlərdə əsas hədəfi Zəngəzur dəhlizinin reallaşmasını əngəlləməkdir. Ancaq nə etsələr də molla rejimi bunu əngəlləyə bilməyəcək”.
Hərbi ekspert onu da əlavə etdi ki, Tehran rejimi qlobal nəqliyyat layihələrini əngəlləmək gücündə deyil.
Vidadi ORDAHALLI
