Ermənistanda daşınmaz əmlakın satışı ilə bağlı vasitəçilik xidməti göstərən bir şəxs erməni mediasında maraqlı yazı ilə çıxış edib. O, müharibə səbəbindən Ermənistana sığınan rusların başına hansı oyunların açıldığını belə təsvir edir:
“Ermənistana qaçan rusların necə məskunlaşdığını və bu yöndə olan paylaşımlarını maraqla izləyirəm. Dostum Ruben Paşinyan ünsiyyətcil və maraqlı insandır. Səfərə gələn ruslara faydalı olmaq, nəyi görməyi, problemləri necə həll etməyi təklif etmək və məsləhət vermək üçün Facebook-dakı “Russ in Armenia” qrupuna qoşulmaq qərarına gəlib. Ancaq məlum oldu ki, bir qrupa mesaj göndərmək üçün xüsusi olaraq 15.000 dram (40 dollar) ödəniş etməlisən. Qrupun sahibi bunu 12.000 abunəçisinin olması ilə izah edir. Rubik İrəvandakı belə həyasızlıqdan çaşıb və əsəbiləşib. O, açıq, mehriban, bəzən hətta səmimiyyətində sadəlövh insandır. Onun əlavə pulu yoxdur, çünki o, cüzi İrəvan maaşı ilə yaşayır. İrəvana gələn ruslara kömək məqsədilə yaradıldığı iddia edilən qrup əslində ruslara hər hansı kömək və məsləhətin qarşısını alır. Təsəvvür edirsinizmi, müharibədən qaçan ruslara kömək etmək istəyən nə qədər “qonaqpərvər” erməni qaçaraq gələnlərin pulunu həyasızcasına qoparmaq istəyir.
Əgər mən indi özümü “Aşotdan mənzillər” şirkəti adlandırsam və analoji qrup vasitəsilə kirayə verilən mənzillərdən 10% komissiya vəd etsəm, o zaman həm mən, həm də pulsuz kömək etməyə hazır olan sadə ermənilər bloklanacaq.
Bir neçə ay əvvəl mən bir neçə başqa qrupda fırıldaqçılara aldanmamaq üçün ruslar üçün kiçik bir post-tövsiyə yerləşdirdim. Ermənistanda Rusiya Federasiyası vətəndaşlarının daimi yaşamaq üçün yaşayış icazəsi almasına ehtiyac yoxdur. Çünki hər iki ölkə MDB üzvü olduğundan, Ermənistanda yaşamaq və işləmək üçün Əmək Nazirliyində onlayn qeydiyyatdan keçmək kifayətdir və tamamilə pulsuzdur. Bu yazıları harada yerləşdirdimsə, dərhal bloklandım. Çünki bütün internet ruslar üçün böyük pul müqabilində Ermənistanda yaşamaq icazəsi verən bəzi firmaların reklamları ilə doludur.
Bütün bu qruplar və digərləri sıradan bir dələduzluqla məşğul olurlar”.
Bakı şəhərində daşınmaz əmlak üzrə fəaliyyət göstərən firmalardan birinə rəhbərlik edən Habil Kəlbalıyev adlı şəxs “Bakı-Xəbər”ə açıqlamasında bildirdi ki, bizdə belə dələduzluq halları yoxdur: “Hazırda Rusiyadakı müharibə səbəbindən Bakıdakı kirayə bazarında da bahalaşma hiss edilir. İş burasındadır ki, Bakıya həm Rusiyadan, həm də Ukraynadan çoxlu sayda qaçqın gəlib. Onlar Bakını stabillik olduğu üçün seçirlər. Bizdə qanunvericilik bazasının təkmil olması və dövlət qurumlarının saytlarının bir neçə dildə fəaliyyət göstərməsi bura gələnlərə imkan verir ki, özləri şəxsi problemlərini həll etsinlər. Yəni bu cür məsələlərdə dəlallara heç bir ehtiyac qalmır. Onlar yalnız kirayə tapan firmaların xidmətindən yararlanırlar ki, bu da bütün dünyada var. Biz öz vətəndaşlarımızdan nə qədər faiz alırıqsa, onlardan da həmin məbləği alırıq. Müvəqqəti yaşamaq istəyən xarici ölkə vıtəndaşları Asan Xidmətə müraciət edib, orada lazım olan bütün məsləhətləri alırlar. Yəni bura gələn qaçqın rusu və ya ukraynalını aldatmaq üçün “münbit şərait” yoxdur. Ermənistanda dərəbəylik olduğundan belə hallar yaşanır”.
Məhəmmədəli QƏRİBLİ
