Cənubi Azərbaycandakı soydaşlarımızın mollakratiya rejiminə qarşı mübarizəsi davam edir. Bu gün öz milli müqəddaratını təyin etmək üçün mübarizəyə qatılan yüz minlərlə soydaşımızın əsas məqsədi Tehran rejimindən qopmaq və özgürlüyünə qovuşmaqdır.
Bu gün güneylilər milli azadlıq hərəkatının böyük uğurla nəticələnməsi uğrunda mübarizə aparırlar. Azərbaycan Prezidentinin verdiyi son bəyanatlar güneylilərə daha böyük stimul verir, mübarizələrini daha inamlı edir. Prezidentin bəyanatlarına Güney Azərbaycanın milli fəalları müsbət reaksiya verib və göstərdiyi dəstəyə görə ölkə başımıza təşəkkür ediblər.
Dr. Rıza Heyət, dr. Əlirıza Abdullahi, Elyar Türkər, dr. Babək Şahid, Elman Nuri, İlqar Ulusoy, Mehdi Nəimi, İsa Doğanlı, İbrahim Ramazani, Murtaza Muradpur, Sabir Zəmani, Nima Abbaspur, Hadi Qurbani, Səhər Abbaspur, Sara Abbaspur, dr. Əhməd Həbibi, İmad Həzrəti, dr. Ramin Abdullahzadə və
Kürşad Yılmaz kimi güneyli milli fəallar Azərbaycan Prezidenti İlham Əliyevə müraciət edib.
Soydaşlarımızın müraciətlərində deyilir: "...Sizin də son zamanlarda vurğuladığınız kimi, Azərbaycan Respublikası xaricində yaşayan azərbaycanlıların çoxu Güney Azərbaycan türklərindən təşkil tapmaqdadır. Arazın cənubunda yaşayan Azərbaycan türkləri həmişə zorla ayrı düşdüyü Quzeydəki "özü”nü nəsildən-nəsilə röyalarında, mahnılarında qoruyub saxlamışdır. "Arazı ayırdılar, qum ilə doyurdular, mən səndən ayrılmazdım, zor ilə ayırdılar" bayatısı hər bir azərbaycanlının beşikdən eşitdiyi laylası olmuşdur. Bu ayrılıq yarasının dərdi belə musiqi notları ilə birləşib sərhədləri aşıb dünyaya çatmışdır. Daha sonra bağrımız, Vətənimizin vandal düşmən tərəfindən işğal olunması ilə qana batsa da, Zati-alinizin rəhbərliyində və Vətən şəhidlərimizin qəhrəmanlıqları ilə külündən doğan güclü və iqtidarlı Azərbaycanın ortaya qoyduğu böyük əzm və birliklə, 44 günlük vətən muharibəsi sonunda bütün azərbaycanlılara gələcəyin işıqlı olduğunu göstərmişdir.
Bu gün İranda baş verən hadisələr və rejim və onun müxalifətinin ortaya qoyduğu antitürk və antiazərbaycan siyasətləri hamıya aydındır.
Biz buna inanırıq ki, yaxın gələcəkdə baş verəcək olan dəyişikliklər nəticəsində Cənubi Azərbaycanda yaşayan xalqımız öz müqəddəratını özü ələ alacaqdır. Bu günlərdə Azərbaycanda ən çox eşitdiyimiz xalq mahnısı "Yar bizə qonaq gələcək" mahnısıdır. İnanırıq ki, bu həsrət tezliklə bitəcəkdir.
Hörmətli Prezident,
Bu doğrultuda Güney Azərbaycan türkləri ilə bağlı tarixi bəyanatlarınız və dəstəkləriniz üçün Güney Azərbaycanın milli aktivistləri olaraq Sizə öz təşəkkür və minnətdarlığımızı bildiririk".
"Bunun nəticəsidir ki, güneyli fəallar Azərbaycan Prezidentinə öz xüsusi mesajlarını çatdırırlar, milli müqəddəratları uğrunda mücadiləyə davam etdiklərini bildirirlər"
AMEA-nın Fəlsəfə və Sosiologiya İnstitutunun aparıcı elmi işçisi, fəlsəfə doktoru, BAO sədrinin müavini, siyasi şərhçi Faiq Ələkbərli "Bakı -Xəbər" ə şərhində bildirdi ki, artıq soydaşlarımız öz müqəddəratlarını özləri həll etmək əzmindədir. "Azərbaycanın bütövlüyü məsələsi lokal milli və regional məsələ deyil, bu artıq beynəlxalq gündəmə çevrilib.
Bu anlamda Prezident İlham Əliyevin son bəyanatları, xüsusən də Səmərqənddə səsləndirdiyi fikirlər Azərbaycanın həm qüzeyində, həm güneyində, həm də dünyanın azərbaycanlılar yaşayan digər yerlərində çox böyük diqqətlə və məmnunluqla, sevinclə qarşılanıb. Bunun da nəticəsidir ki, güneyli fəallar Azərbaycan Prezidentinə öz xüsusi mesajlarını çatdırırlar, milli müqəddaratları uğurunda mücadiləyə davam etdirdiklərini bildirirlər. Azərbaycanın güneyindən olan, lakin irticaçı Tehran rejiminin repressiya siyasətindən bezərək müxtəlif ölkələrdə yaşayan soydaşlarımız Azərbaycan Prezidentinə müraciət ediblər. Güneylilər bu müraciətlə Prezident İlham Əliyevə öz dövlət başçıları kimi yanaşdıqlarını ortaya qoyurlar. Bu çox mühüm məsələdir. Yəni bu artıq onu göstərir ki, əvvəllər Azərbaycanın bütövlüyü, bir bayrağının olması, 60 milyonluq xalqın birliyi məsələsi bu və digər şəkildə ifadə olunurdusa, indi açıq şəkildə bəyan edilir. İnsanlarımız, bütün azərbaycanlılar üçün bir bütövlük, vahidlik məsələsi ciddi şəkildə ortaya çıxıb. Yəni dövlətləşmə, dövlətə çevrilmə anlamında olduqca mühüm faktordur, addımdır. Şübhəsiz ki, bu məsələdə, xüsusilə də cənab prezidentə müraciət ünvanlayanların da ifadə etdiyi kimi, artıq biz özümüz öz müqəddəratınımızı həll edirik, Azərbaycanın bütövlüyü, vahid bayrağının olması məsələsini artıq özümüz tənzimləyirik".
F. Ələkbərlinin fikrincə, burada əsas məsələ budur ki, birliyimiz, vahidliyimiz bizim öz əlimizdə cəmləşir. O vurğuladı ki, bu müraciət Azərbaycanın vahid dövlətə çevrilmək prosesini daha da sürətləndirir. "Bu prosesi mümkün qədər sürətləndirmək lazımdır. Bu anlamda soydaşlarımızın Azərbaycan Prezidentinə ünvanladığı müraciəti çox yüksək dəyərləndiririk. Bu, bütövlüyümüzü, birliyimizi daha da gücləndirir. Prezident İlham Əliyev demişkən, bu artıq Türk Dövlətlər Birliyinin də əsas məsələlərindən birinə çevrilməkdədir. Bunu da nəzərə almaq lazımdır ki, bu məsələ öz aktuallığını bütün anlamlarda göstərir. Bu, Azərbaycanın quzeyli-güneyli məsələsi olmaqla yanaşı, həm də türk dünyasının, türk xalqlarının, türk dövlətlərinin məsələsidir. Azərbaycanın yenidən birləşməsi bir şərt halına gəlib, bunu güneyli soydaşlarımız da dərindən anlayır. Bizim üçün birləşmədən başqa çıxış yolu yoxdur. Perspektivdə ən əsas məsələ xalqımızın vahid bayraqla vahid dövlətdə bir olmasıdır" - deyə F.Ələkbərli qeyd etdi.
İradə SARIYEVA
