Ermənistan tərəfi Azərbaycana iftira atmaqla kifayətlənməyib, indi də Avropa İttifaqının (Aİ) adından saxta bəyanat yaymağa başlayıb. Doğrudur, bu, Ermənistan rəsmiləri üçün yeni bir şey deyil, onlar buna adətkardırlar.
Bu dəfə də Ermənistanın xüsusi tapşırıqlar üzrə səfiri Edmon Marukyan irəli düşüb yalan danışmaqla məşğul olur.
E.Marukyan özünün “Twitter” mikrobloqunda bəyan edib ki, Ermənistanın bu yaxınlarda Ermənistan-Azərbaycan sərhədində yerləşdirdiyi Aİ monitorinq missiyası Azərbaycanın guya “Ermənistanın suveren ərazisinə gündəlik hücumlarını” sənədləşdirib.
Aİ-nin ortada heç bir bəyanatı olmadığı halda bu qurumun adından danışan Marukyan Azərbaycanı Ermənistana "təcavüzdə" ittiham etməkdən çəkinməyib, guya Azərbaycan Ermənistana qarşı "terror planlayır". Əslində, E.Marukyanın bu bəyanatı tamamilə yalan üzərində qurulub və o, Ermənistanın davranışlarını bizimki kimi qələmə verməklə özünü biabır edib, ölkəsinin mahiyyətini ortaya qoyub.
"Ermənistan ərazisində yerləşmiş Avropa İttifaqının 40 nəfərlik müşahidə missiyası hələ heç bir sənəd ortaya qoymayıb"
Azərbaycan Naminə Alyans Partiyasının sədri Abutalıb Səmədov "Bakı-Xəbər" ə şərhində bildirdi ki, Avropa İttifaqı heç bu sənəd yaymayıb: "Ermənistan ərazisində yerləşmiş Avropa İttifaqının 40 nəfərlik müşahidə missiyası hələ heç bir sənəd ortaya qoymayıb. Yəqin ki, yaxın vaxtlarda hansısa sənədin ortaya çıxma ehtimalı da yoxdur. Son dərəcə məsul dövrdür. Bu ay Brüsseldə növbəti görüş gözlənilir. Soçidə uğursuzluqla nəticələnən danışıqlardan sonra Brüssel görüşünün əhəmiyyəti dəfələrlə artmışdır. Rusiyada aparılan danışıqlara yardımçı olaraq ortaya çıxan Avropa İttifaqı platforması artıq əsas danışıqlar platformasına çevrilib. Sülh sazişinin məhz Avropa İttifaqının vasitəçiliyi ilə imzalanması ehtimalı son dərəcə yüksəkdir. Belə bir vəziyyətdə Avropa İttifaqının müşahidə missiyası həddindən artıq diqqətli olmalı və Avropa İttifaqının vasitəçilik missiyasına zərbə vuracaq hər hansı addımı atmaqdan çəkinməlidir. Xüsusi tapşırıqlar üzrə səfir Edmon Marukyanın bəyanatı növbəti erməni məkri, erməni həyasızlığı kimi qiymətləndirilməlidir.
Çox təəssüf ki, Putinin "Valday" diskussiya klubunda səsləndirdiyi son dərəcə təxribatçı bəyanatlardan sonra ermənilər bir az da həyasızlaşıblar. Dalbadal həm baş nazir, həm onun ətrafında olanlar bizi hiddətləndirən, əsəblərimizlə oynayan bəyanatlar verirlər. Bu vəziyyətdə, təbiidir ki, Azərbaycan son dərəcə səbrli olmalı və həmişə olduğu kimi müdrik siyasət yeritməkdə, erməni təxribatına uymamaqda davam etməlidir. Dünənə kimi sonuna qədər dəstək aldıqları Qərb dövlətlərindən bu gün fərqli münasibət görmək erməniləri son dərəcə ağır duruma salıb".
A.Səmədovun sözlərinə görə, nəticədə bu onları Rusiyaya bir az da sığınmaq məcburiyyətində qoyur. Partiya sədri vurğuladı ki, bir il əvvəl Soçidə keçirilən danışıqlarda Rusiyanın vasitəçiliyinə qəti etiraz edən Ermənistanın baş naziri bu günlərdə Soçidə keçirilən növbəti görüşdə Rusiyanın vasitəçiliyini tələb edirdi, Rusiyanın öz mövqeyindən dönməməsini xahiş edirdi: "Bunu Ermənistan ona görə edirdi ki, dünyada çıxdaş vəziyyətə salınmış Rusiya onların istədiyi mövqeni tutar və təzyiqlər yolu ilə bunu Azərbaycana da qəbul etdirə bilər. Təbiidir, təzyiqlər davam edir, təzyiqlər bundan sonra daha da artacaq, ancaq Azərbaycan son 30 ildə ən ağır durumlarda dayana bildirsə, 44 günlük böyük qələbədən sonra hər cür təzyiqin qabağında daha qətiyyətlə dayanacaq. Marukyan kimilərinin belə təxribatçı bəyanatları bu təzyiqlərin tərkib hissəsidir. Bizi hiddətdəndirməyə, qəzəbləndirməyə, səbrimizi daşırmağa çalışırlar. Biz də bu cür mənfur qonşularla birlikdə yaşamaq məcburiyyətindəyik. Səbrli olmalıyıq, birlikdə olmalıyıq, hər cür təxribatın qarşısını birlikdə almağa çalışmalıyıq".
İradə SARIYEVA
