60 günə yaxındır ki, mollakratiya rejiminin həyata keçirdiyi repressiyaya etiraz olaraq soydaşlarımız, eləcə də İran adlanan ölkədə yaşayan xalqların nümayəndələri etiraz aksiyası keçirir. Tehran rejimi vətəndaşların səsini eşitmək əvəzinə onların hüquq və azadlıqlarını pozur, insanları qanunsuz olaraq həbs edir, barələrində ölüm hokmü çıxarır.
Molla ölkəsində davam edən aksiyalara, demək olar ki, bütün sahələrin təmsilçiləri qoşulub. Təbii ki, bütün bunlar molla rejiminə ciddi siqnaldır. Bu gün soydaşlarımız SEPAH-ın və başqa qaniçən dəstələrin gülləsinə tuş gəlir. Tehran rejimi günü-gündən daha da yırtıcılaşır, qaniçənə çevrilir. Vətəndaş etirazlarına idmançılar da qatılıb.
Günaz TV-nin yaydığı məlumata görə, İran milli basketbol komandasının oyunçuları Azadi Basketbol Salonunda Çin milli komandası ilə oyunun açılış mərasimində ölkənin rəsmi himnini oxumaqdan imtina ediblər. Məlumata görə, idmançılar bunu İrandakı etirazlarla həmrəylik əlaməti olaraq ediblər.
“...Zorakılığa basketbol komandası himni oxumaqdan imtina etməklə cavab verib”
Müasir İnkişaf Birliyinin sədri, siyasi şərhçi Mübariz Göyüşlü “Bakı-Xəbər”ə şərhində bildirdi ki, İran milli basketbol komandasının oyunçularının davranışları tam başadüşüləndir. O vurğuladı ki, Tehran rejimi vətəndaşların səsini eşitməlidir. “Mən də bu xəbəri izlədim. Ümumiyyətlə, hər birimiz müşahidə edirik ki, İranda keçirilən etiraz aksiyaları səngimək bilmir. Artıq iki aya yaxındır ki, bu proses davam edir. Xüsusən də azad ruhlu insanlar, müstəqil və müxalif düşüncəli şəxslər, gənclər, tələbələr bu aksiyalarda çox aktiv görünürlər. Tehran rejimindən azadlıq, bir sıra istiqamətlərdə liberal qaydaların tətbiq olmasını tələb edirlər. Ölkə şəriət qanunlarının üstünlüyü ilə idarə olunduğu, dini qurumlar, ruhani şəxslər hakimi mütləq olduqları üçün onların qəbul etdiyi qərarlar insanlarda qıcıq doğurur, narazılıq yaradır. Baxırıq ki, bunun nəticəsində də bu ölkəni etiraz dalğası bürüyüb. Bilirik ki, gənc qız Məhsa Əmininin öldürülməsindən sonra bu aksiyalar başladı və ona qoşulanlar çoxdur, onların etirazları bütün ölkəni bürüyüb. Hesab edirəm ki, molla hakimiyyəti etirazçıların tələblərinə ciddi yanaşmalı, güc və zorakılıq tətbiq etməkdən çəkinməlidir. Güc tətbiq etmək durumu daha da pisləşdirir. Hətta oxudum ki, etirazçıya ölüm hökmü çıxarılıb. Bu presedentin olması da narazılıqları alovlandıracaq məqam olacaq. Tehran rejiminin etirazçılara qarşı tətbiq etdiyi zorakılığa basketbol komandası himni oxumaqdan imtina etməklə cavab verib. İdmançılar da bu məsələyə sərt reaksiya verir. Onların belə reaksiya verməsi ciddi bir siqnal olmalıdır. Bu onu göstərir ki, bütün sahələr üzrə etirazlar var.
Onların tələbləri yerinə yetirilməlidir. Etirazçıları hansısa xarici qüvvələrlə əlaqələrdə olmaqda ittiham etmək düzgün deyil. Onları xarici qüvvələrlə əlaqələndirməyə çalışdıqca ciddi problemlərdən yayınırlar, görməzdən gəlirlər. Bu da etirazları gücləndirir. Bütün baş verənlər İranı idarə edən şəxslər üçün bir siqnal olmalıdır”- deyə M.Göyüşlü vurğuladı.
İradə SARIYEVA
