Avropa Parlamentinin bir sıra üzvləri Avropa İttifaqını Qafqazda və xüsusilə Ermənistanda baş verən hadisələrə biganə qalmaqda ittiham edib. Burada təəssüf və təəccüb doğuran məqam odur ki, həmin deputatlar içində Azərbaycandan ciddi həcmdə qaz alan İtaliya deputatları xüsusi fəallıq göstərir.
Əsasən də Avropa Parlamentinin İtaliyadan olan deputatı Fabio Massimo Kastaldo xüsusi canfəşanlıq göstərir. İtaliyanı təmsil edən bu deputat dəfələrlə müxtəlif beynəlxalq tədbirlərdə, regiona etdiyi səfərlərdə, xarici media vasitələrinə verdiyi müsahibələrdə Azərbaycanın ünvanına kəskin fikirlər səsləndirib. Bu dəfə də “ənənəsinə” sadiq qalan Kastaldo qeyd edib ki, demokratik Ermənistan Azərbaycanın “təcavüzünə” məruz qalıb. O qeyd edib ki, Aİ Kiyevi dəstəkləməklə yanaşı, eyni zamanda Azərbaycanı etibarlı tərəfdaş kimi qəbul edir. O bunu düzgün hesab etməyib, ikili standartların etimadı sarsıtdığını vurğulayıb: “Avropa Şurasının Azərbaycan qoşunlarının Ermənistanın suveren ərazisinin 220 kvadrat kilometrini işğal etdiyi, həmçinin hərbi cinayətlər, vəhşiliklər və işgəncələr törətdiyi Cənubi Qafqazla bağlı yeni məlumat verməməsindən dərin məyus olduq. Mən həmişə və hər yerdə demokratiyanın, Ermənistanın tərəfindəyəm”.
Azərbaycanın Avropaya ixrac etdiyi qazın böyük hissəsinin alıcısı İtaliyadır. Ancaq əfsuslar olsun ki, Avropa Parlamentində İtaliyanı təmsil edən deputatlar bunu görməzdən gəlir.
“Bu cür fəaliyyət beynəlxalq müstəvidə ölkəmizlə bağlı mənfi rəyin formalaşmasında müəyyən rol oynayır”
Məsələyə münasibət bildirən AMİP funksioneri Əli Orucovun fikrincə, belə çağırışlar, priinsipcə, rəsmi Romanın Azərbaycanla bağlı siyasətinə birbaşa təsir etməsə də, hər halda təəssüf doğurur: “Məsələ ondadır ki, İtaliya Azərbaycanla yaxın tərəfdaşlıq münasibətlərinə malikdir. Xüsusən də İtaliyanın Azərbaycandan TAP vasitəsi ilə daha çox qaz idxal etməsi qarşıya məqsəd qoyması iki ölkə arasında olan yaxın münasibətlərin göstəricisidir. Düzdür, İtaliyadan parlamentarilərin Avropa Parlamentində belə çıxışları rəsmi Romanın Azərbaycanla bağlı siyasətinə təsir etmir. Ancaq bu cür fəaliyyət beynəlxalq müstəvidə ölkəmizlə bağlı mənfi rəyin formalaşmasında müəyyən rol oynayır. Biz nəzərə almalıyıq ki, İtaliya sıradan bir ölkə deyil. Avropa İttifaqının aparıcı dövlətlərindən biridir. İtaliyanı Avroparlamentdə təmsil edən deputat Fabio Massimo Kastaldo neçə illərdir erməni lobbisindən yallanır. Deputat şərəfini erməni lobbisinin yardımlarına satan Kastaldonun bir məqsədi var - harda və necə gəldi Azərbaycanı qaralamaq. Dəfələrlə bunun şahidi olmuşuq. Nəinki Avroparlamentin tribunasında, digər tədbirlərdə də Azərbaycana yönəlik iftira xarakterli fikirlər səsləndirib. Əfsuslar olsun ki, 13-14 sentyabr toqquşmalarından sonra Ermənistan və erməni lobbisi Avropada Azərbaycana qarşı güclü təbliğat kampaniyası qura bilib. Var gücləri ilə belə rəy yaratmaq istəyirlər ki, Azərbaycan təcavüzkar tərəfdir. Ermənistanın maraqlarından çıxış edən dairələr müəyyən qüvvələri bu yalana inandıra bilib. Çox təəssüf ki, Azərbaycanın Avropa ölkələrindəki səfirlikləri yetərincə adekvat cavab addımları atmır. Ya bunu bacarmırlar, ya da öz işlərinə məsuliyyətlə yanaşmırlar”.
Bu baxımdan partiya funksioneri hesab edir ki, Azərbaycan Avropada diplomatik müstəvidə fəallığını artırmalıdır.
Vidadi ORDAHALLI
