Şimali Kipr Türk Cümhuriyyəti Türk Dövlətləri Təşkilatına (TDT) müşahidəçi üzv olub. Bu barədə Türkiyə Prezidenti Rəcəb Tayyib Ərdoğan noyabrın 11-də Səmərqənddə Türk Dövlətləri Təşkilatının IX Zirvə Görüşündə çıxışı zamanı bildirib. O qeyd edib ki, müvafiq qərar TDT-nin Səmərqənd sammitində qəbul edilib.
Şimali Kiprin Türk Dövlətləri Təşkilatına müşahidəçi qəbul edilməsinin nə kimi perspektivləri var? Bu onun müstəqil dövlət kimi tanınacağına müsbət impuls verə bilərmi?
Aydın Quliyev: “Türk dünyasında müstəqil dövlətə çevrilmək şansı olan "ocaqlar" hələ var”
“Bakı-Xəbər” Media Qrupunun rəhbəri Aydın Quliyev hesab edir ki, Şimali Kipr Türk Cümhuriyyətinin Türk Dövlətləri Təşkilatına müşahidəçi statusla qəbul edilməsi on illər öncə Kipr Türk Respublikasının elan olunması qədər önəmli hadisədir:
“Şimali Kipr bu təşkilatda Macarıstan və Türkmənistanla bir sırada eyni status daşıyacaq. Böyük ehtimalla, gələcəkdə Şumali Kipr bu təşkilatın Azərbaycan, Türkiyə, Qazaxıstan , Özbəkistan və Qırğızıstan kimi üzvü statusunu alacaq. Bizim Prezident İlham Əliyev TDT-nin Səmərqənd zirvəsində dedi ki, Türk dünyası təkcə müstəqil Türk dövlətlərindən ibarət deyil. Yəni türk dünyasında müstəqil dövlətə çevrilmək şansı olan "ocaqlar" hələ var.Türk Kipri onlardan biridir.
Bildiyim qədər, müstəqil dövlət kimi tanınana qədər hansısa beynəlxalq təşkilatda müşahidəçi statusu almış tək ölkə Fələstin olub. Digər tərəfdən, hansısa beynəlxalq təşkilata tam üzv olana qədər müşahidəçi statusunu daşımış çoxlu sayda müstəqil dövlətlər göstərmək olar.
Artıq Şimali Kipr milyonlarla türkün qürur duymalı olduğu uğura yetişib”.
Yeganə Hacıyeva: “Biz dünyada beynəlxalq hüquqla uzlaşmayan bir çox hadisələrin reallığa çevrildiyinin şahidi olmuşuq”
Politoloq Yeganə Hacıyeva “Bakı-Xəbər”ə açıqlamasında bildirdi ki, Şimiali Kiprin TDT-yə müşahidəçi statusda qəbul edilməsi bir neçə vacib hədəfə hesablanıb: “Bu, TDT üzvü olan ölkələr üçün Avropaya çıxış yoludur. Şimali Kipr Avropaya çıxış yolunda bir dayaq rolunu oynamış olacaq. Aralıq dənizi ətrafı ilə yanaşı, digər istiqamətlər üzrə də gələn yüklərin diversifikasiyasında bu yol güvənlidir. Burada tarixi, milli birlik amilləri də mühüm rol oynayır. Məlumdur ki, Yunanıstan Türkiyə və bizimlə yanaşı, təşkilata üzv olan digər ölkələrlə də bağlı beynəlxalq platformalarda ədalətli mövqe sərgiləmir. Bu addım həm də ona yaxşı ismarıcdır. Bilirsiniz ki, son vaxtlar dünyada yeni reallıqlar meydana çıxıb. Artıq köhnə nizam bir qədər pozulub. Bu yeni nizamın tələbləri çərçivəsində Şimali Kiprin müstəqil dövlətə çevrilə biləcəyi də bizi təəccübləndirməməlidir. Proses ona doğru gedir. Ancaq beynəlxalq hüquqla uzlaşmayan bəzi məqamlar var ki, bu da Şimali Kiprin müstəqil ölkəyə çevrilməsinə mane ola bilər. Ancaq biz dünyada beynəlxalq hüquqla uzlaşmayan bir çox hadisələrin reallığa çevrildiyinin şahidi olmuşuq. Bu prosesləri biz, demək olar ki, bütün qitələrdə izləyirik. İndiki dövr üçün isə bu, daha çox, iqtisadi mənfəətin əldə edilməsinə hesablanan addımlardır”.
Məhəmmədəli QƏRİBLİ
