Noyabrın 12-də Fransa prezidenti Emmanuel Makron Prezident İlham Əliyevə zəng edib. …Telefon danışığı zamanı dövlət başçıları Azərbaycan, Ermənistan, Avropa İttifaqı və Fransanın iştirakı ilə dördtərəfli formatda keçirilmiş Praqa görüşünün nəticələri və bundan irəli gələn məsələlər barədə fikir mübadiləsi aparıblar.
Prezident İlham Əliyev Ermənistanla Azərbaycan arasında münasibətlərin normallaşdırılması prosesində bitərəf, qərəzsiz və tarazlaşdırılmış yanaşmanın nümayiş etdirilməsinin vacibliyini qeyd edib. Azərbaycan Prezidenti Ermənistan tərəfindən son günlərdə səsləndirilən bəyanatların iki ölkə arasında münasibətlərin normallaşdırılması və sülh gündəliyi ilə ziddiyyət təşkil etdiyini diqqətə çatdırıb.
Azərbaycan Prezidenti bu sözü Fransa prezidentinin gözünün içinə deyib. Prezidentin Fransanın qərəzsiz, obyektiv olmalı olduğu fikrini birbaşa Makronun üzünə deməsini necə şərh etmək olar?
“Ümid edək ki, Makron da İlham Əliyevin sözlərindən nəticə hasil edəcək və hazırkı siyasətinə çəki-düzən verməli olacaq”
“Prezident İlham Əliyevin Fransanın dövlət başçısı Emmanuel Makronla telefon danışığı zamanı öz haqlı iradlarını ona çatdırması ilk növbədə ölkə rəhbərimizin qətiyyətinin, siyasi iradəsinin isbatıdır”. Bu fikirləri “SƏS” qəzetinin baş redaktoru, siyasi ekspert Bəhruz Quliyev mövzu ilə bağlı şərhində deyib. Onun sözlərinə görə, son vaxtlar Fransanın dövlət siyasəti və prezidenti də daxil olmaqla ayrı-ayrı siyasət adamları fonunda açıq-aşkar anti-Azərbaycan xarakterli fəaliyyəti bu iradların yaranmasına başlıca səbəbdir: “Məhz bu baxımdan, İlham Əliyev Makronla apardığı telefon danışığı zamanı Ermənistanla Azərbaycan arasında münasibətlərin normallaşdırılması prosesində bitərəf, qərəzsiz və tarazlaşdırılmış yanaşmanın nümayiş etdirilməsinin vacibliyini xüsusilə vurğulayıb. O cümlədən, fakt budur ki, 44 günlük müharibə zamanı öz ərazilərini işğaldan azad edən, qalib olan Azərbaycan hazırkı dövrə qədər vasitəçilərin iştirakı ilə Ermənistanla razılaşdırılmış bəyanatların həyata keçirilməsini tələb olaraq qarşıya qoyub. Daha dəqiq desək, məğlub, kapitulyasiya sənədinə imza atan Ermənistan rəhbərliyi üzərinə götürdüyü öhdəlikləri yerinə yetirməsi yerinə tamamilə əks mövqe nümayiş etdirir, bu mövqeyi ilə Cənubi Qafqaz regionundakı vəziyyəti gərginləşdirməyə cəhdlər göstərir. Təbii ki, belə olan halda rəsmi Bakının ritorikası da dəyişir, tələbləri sərtləşdirilir. Maraqlıdır ki, Fransanın dövlət rəhbərliyi, habelə ermənipərəst senatorarı bütün bunları bilə-bilə bir daha aşkar qəbuledilməz düşüncələrini ortaya qoyurlar. Ona görə də Prezident İlham Əliyev öz sözlərini Makronun diqqətinə çatdırıb və qeyd edib ki, onlar Ermənistanın qəbuledilməz davranışlarına dəstək göstərmək yerinə sülh gündəliyinin ziddiyyət təşkil etməsinə səbəb olan maneələri aradan qaldırmağa cəhd etsinlər, rəsmi İrəvanı ipə-sapa yatırsınlar”.
B.Quliyevin fikrincə, bütövlükdə isə belə nəticəyə gəlmək olar ki, Azərbaycan Prezidenti nəinki Fransanın dövlət başçısı ilə, ümumiyyətlə, dövlətimizin, xalqımızın maraqlarına zidd olan fəaliyyətləri ilə məlum olan istənilən siyasi mərkəzlərə öz sərt, qətiyyətli fikirlərini bildirib, iradlarını çatdırıb. “Hətta belə desək, açıq şəkildə üzlərə deyilən bu iradlar qarşıdakı zamanlarda həmin tərəflərin düşünmələrinə səbəblər yaradır, hansı yanlış siyasət addımı atmaları ilə bağlı bir daha nəticə hasil etmələrinə səbəb olur. Ümid edək ki, Makron da İlham Əlyevin sözlərindən nəticə hasil edəcək və hazırkı siyasətinə çəki-düzən verməli olacaq. Əgər Fransa həqiqətən də, necə deyərlər, Ermənistanın halına acıyırsa, onu sülhə çağırmalı, öhdəliklərini yerinə yetirməyə sövq etməlidir. Prezident İlham Əliyev bu vasitə ilə vurğulayıb ki, Azərbaycan dövlətinin və xalqının səbri də tükənməz deyil”- deyə siyasi ekspert qeyd etdi.
İradə SARIYEVA
