Türk Dövlətlərinin Səmərqənd zirvəsində Türk dünyası İnvestisiya Fondunun yaradılmasına qərar verildi. Çox böyük hadisədir. Fondun görəcəyi böyük işlər olacaq. Bu qərardan qabaq elə həmin Zirvədə Prezident Əliyev Türk dövlətlərinə səslənərək onları Azərbaycanın azad olunmuş rayonlarının bərpasında iştiraka dəvət etdi. Görünür ki, yaradılmış Fond İlham Əliyevin çağırışına dərhal verilmiş reaksiyadır.
Bunu “Bakı-Xəbər” Media Qrupunun rəhbəri, politoloq Aydın Quliyev öz Facebook səhifəsində yazıb.
A.Quliyev daha sonra yazır:
Niyə də olmasın və Türk dövlətləri torpaqlarımızın bərpasında niyə də hamılıqla iştirak etməsinlər? Niyə bu işdə tək Türkiyənin adı olsun?!..
İlham Əliyev özü hamıdan dəqiq bilir ki, torpaqların bərpası Azərbaycanın özünün də qardaş Türkiyə ilə birgə bacaracağı işdir. Lakin digər türk dövlətlərinin də cəlb olunması bir neçə nöqteyi-nəzərdən müstəsna əhəmiyyət daşıyır.
Əvvəla, bu Fond təcavüzkar Ermənistana kəskin mesaj verir ki, sənin dağıtdıqlarını bu dəfə birlikdə bərpa edəcəyik, lakin unutma ki, sənin növbəti təcavüzkar addımların olsa, ona qarşı duran tək Azərbaycan yox, bütün türk dövlətləri olacaq.
İkinci, Fond Türk dövlətlərinin ümumən maliyyə-bank sistemlərinin inteqrasiyasını yeni mərhələyə çıxara bilər.
Uğurlu olsun, millətimizə və DÖVLƏTLƏRİMİZƏ...
İradə SARIYEVA
