Ceyhun Məmmədov: “Prezident İlham Əliyev çıxışında hansısa soyqırımdan söhbət açmayıb, Ermənistana xəbərdarlıq edib ki, o təxribatlara son qoymalıdır...” Dəyanət Osmanlı: “Ermənistan dövləti yenə də “soyqırım” kartından istifadə edərək regionda sülh prosesini əngəlləməyə çalışır...”
Ermənistan mediası Azərbaycana şər atmaqdan çəkinmir və bunu hər fürsətdə edir. Düşmən öz səhvini etiraf edib üzr istəmək əvəzinə böhtan, qarayaxma kampaniyasını davam etdirir. Çox təəssüf ki, bu işlərə hansısa beynəlxalq qurumları da şərik edə bilirlər. Azərbaycan Prezidentinin son bəyanatlarından ciddi narahat olan düşmən əsassız iddialarda bulunur.
Erməni mediası Lemkin adına Soyqırımların Qarşısının Alınması İnstitutunun üzdən iraq “rəyini” yayıb. Sözügedən təşkilat Azərbaycan Prezidenti İlham Əliyevin son çıxışlarında dəfələrlə Ermənistana xəbərdarlığını başqa şəkilə yozub və guya Azərbaycan Ermənistanı “soyqırımla” hədələyib, bunlar da narahat olub. Həmin təşkilat Azərbaycan Prezidentinin bəyanatını tamamilə təhrif edib. Məsələ burasındadır ki, Lemkin İnstitutu ünvanı səhv salıb, o Ermənistanın, ermənilərin Azərbaycan xalqına qarşı törətdiyi çoxsaylı real soyqırım faktlarını araşdırmalı, bununla bağlı bəyanat verməli idi, amma o qərəzindən və ermənipərəstliyindən əl çəkməyərək Azərbaycana şər atıb. Lemkin İnstitutunun dərc etdiyi qərəzli hesabatda Azərbaycan Prezidentinin erməniləri “faciə gözləyir” və ya “Azərbaycanın səbri tükənir” sözləri misal kimi göstərilir. Guya bu sözlər ermənilərin “soyqırımla” hədələnməsidir(?).
Əvvəla, Azərbaycan xalqı, Azərbaycan dövləti heç zaman ermənilərə qarşı soyqırım törətməyib, soyqırımlar ustası ermənilər özləridir ki, 1918-ci ilin martında, 1992-ci ilin fevralında, başqa-başqa vaxtlarda Azərbaycan xalqına qarşı soyqırımlar törədib. Xocalıda, Meşəlidə, Qaradağlıda, Ağdabanda, Kərkicahanda, Bağanıs Ayrımında, Daşaltıda və başqa rayon və kəndlərimizdə erməni daşnaklarının törətdiyi soyqırım cinayətlərinə, Vətən müharibəsi dövründə dinc sakinlərimizin bombalanmasına hələ də beynəlxalq hüquq qiymət verməyib. Halbuki, ermənilər dəhşətli qətllər, soyqırımlar törədib. Lemkin İnstitutu gözündən pərdəni qaldırıb bunları görsün. Azərbaycan dövləti heç zaman erməni xalqına qarşı hər hansı bir mənfi niyyət sərgiləməyib, bizim davamız erməni xalqı ilə yox, erməni faşizmi, revanşizmi ilədir. Bu da bizim dövlətimizin mövqeyidir.
Millət vəkili Ceyhun Məmmədov baki-xeber.com-a şərhində bildirdi ki, bu növbəti erməni yalanıdır və beynəlxalq ictimaiyyəti çaşdırmağa yönəlib: “Məlum olduğu kimi, tarix boyu bütün soyqırımları ermənilər törədiblər. Bu Azərbaycana qarşı yeni bir tezisdir. Ermənistan yeni bir cəbhə açmağa çalışır ki, guya Azərbaycan “soyqırım”a hazırlaşır. Xocalıda, Daşaltıda, Malıbəylidə, Qaradağlı da və başqa yerlərimizdə bir çox faciələri, soyqırımları məhz ermənilər törədiblər. Amma bu gün onlar bununla bağlı Azərbaycanı əsassız olaraq ittiham edirlər. Prezident İlham Əliyev son çıxışlarında yalnız Ermənistana xəbərdarlıq edib ki, Ermənistan belə əməllərə, belə təxribatlara son qoysun. Yəni Prezident İlham Əliyev çıxışında hansısa soyqırımdan söhbət açmayıb, Ermənistana xəbərdarlıq edib ki, o təxribatlara son qoymalıdır, sülh müqaviləsinin imzalanması üçün konstruktiv mövqe nümayiş etdirməlidir. Bu bir daha onu göstərir ki, Ermənistan sülh barədə yox, yenə təxribat barədə düşünür. Əlbəttə, Ermənistan belə düşünürsə, Azərbaycan da bununla bağlı öz addımlarını atacaq, tədbirlərini görəcək. Ermənistan bu kimi təxribatlarla məşğul olmaq əvəzinə prosesə töhfə vermək barədə düşünsün və təxribatlara son qoysun”.
C.Məmmədov bir daha qeyd etdi ki, Xocalı, Daşaltı, Malıbəyli, Ağdaban, Meşəli və digərlər soyqırımları törətməyib, onu törədənlər məhz ermənilərdir. “Ermənilər də buna görə mütləq cavab verəcəklər. Onlar qabaqdan gəlmişliik etməklə də heç nəyə nail ola bilməyəcəklər” - deyə millət vəkili vurğuladı.
“Türk Dünyası İnfo” İctimai Birliyinin rəhbəri, Atatürk Mərkəzinin baş redaktoru Dəyanət Osmanlı da bildirdi ki, qondarma "erməni soyqırımı" iddiası tarixi həqiqətdən uzaq olsa da, ermənilər hələ də böhtan kampaniyalarından əl çəkmirlər. “Artıq bu iddialar bir xəstə təxəyyülün, xislətin vərdişinə çevrilib. Ermənilər tarix boyu törətdikləri qətliamların əvəzində özlərinin əzilmiş, qırılmış obrazını yarada bilmiş və əvəzində gündəlik yaşam üçün havayı ianələr alıblar.
Azərbaycanın 44 günlük Vətən müharibəsindəki parlaq qələbəsinin böyük təsirindən hələ də ayıla bilməyən Ermənistan dövləti yenə də “soyqırım” kartından istifadə edərək regionda sülh prosesini əngəlləməyə çalışır. Elə son vaxtlar Ermənistan mediası, diaspor təşkilatları Azərbaycanın onlara qarşı “soyqırım” planları barədə saxta informasiyalar yayırlar. Şübhəsiz, beynəlxalq aləmdə özlərinə yeni dəstək, daha çox yardımlar almaq fikrindədirlər.
Erməni mediası soyqırımların qarşısının alınması üzrə Lemkin İnstitutunun yalnız böhtandan, iftiradan ibarət olan bəyanatını yayıb. İddia olunur ki, Azərbaycan ermənilərə qarşı “soyqırım” siyasəti yürütməyə hazırlaşır. Misal olaraq Azərbaycan Prezidenti, Müzəffər Ali baş Komandan İlham Əliyevin çıxışlarını “sübut” olaraq təqdim edirlər. Görünür, cənab Prezidentin böyük vətənpərvər, Azərbaycançı, türkçü imici onları bərk qorxuya salıb, ona görə də dəstək axtarışına çıxıblar. Onlar hələ də anlamaq istəmirlər ki, bir xalq olaraq sülh və əmin-amanlıq şəraitində yaşamaq üçün Azərbaycanın təklif etdiyi şərtləri qəbul etməli, cinayətkar əməllərinə son qoymalıdırlar. Bəlkə də bunu xalq istəyər, amma qeyd etdiyim kimi, erməni-daşnak lobbisi regionda ölkəmizin güc sahibinə çevrildiyini qəbul etmək istəmir və ona görə də durmadan sabitlik planlarını pozmağa cəhd edirlər
44 günlük müharibədən sonra və Azərbaycanın sülh səylərinə adekvat bəzi münasibətlərin şahidiyik. Qondarma “soyqırım” iddiaları ilə dünyada özlərini “əzabkeş və əzilmiş millət” kimi tanıtmağı bacarmış ermənilərin 1918-ci ilin martında azərbaycanlılara qarşı soyqırım törətməsi faktından onları himayə edən qüvvələrin yaxşı xəbəri olsa da yenə ikili standartlar sərgiləyirlər. Təəssüf ki, tarixdən bixəbər olanlar, o zamankı mövcud şəraiti bilməyənlər hadisələrin saxta təbliğatına inanırlar”.
D.Osmanlının qeyd etdiyinə görə, faktlar, tarixi sənədlər, arxivlər sübutlayır ki, ermənilər zaman-zaman türklərə qarşı soyqırım siyasəti aparıblar. D.Osmanlının sözlərinə görə, “erməni soyqırımı” kampaniyalarının təməlində Türkiyə və Azərbaycana təsir göstərmək, hər iki strateji müttəfiq ölkəni prinsipial mövqeyindən çəkindirmək düşüncəsi vardır. “Əlbəttə, onlara dəstək verən bəzi dövlətlərin yaxşı xəbəri var ki, ermənilər 1992-ci il fevralın 25-dən 26-na keçən gecə Azərbaycanın Dağlıq Qarabağ bölgəsinin Xocalı şəhərində XX əsrin ən dəhşətli soyqırımlarından birini törədiblər. Bir günün içində yer üzündən silinən şəhəri tərk edən 2500 Xocalı sakinindən 63-ü uşaq, 106-sı qadın, 70-i qoca olmaqla, 613 nəfər qətlə yetirilib, 8 ailə tamamilə məhv edilib, 25 uşaq hər iki valideynini, 130 uşaq valideynlərindən birini itirib. Yaralanan 487 nəfərdən 76-sı uşaq olub. 1275 xocalılı əsir, 150 nəfər isə itkin düşüb. Dövlətin və əhalinin əmlakına 1992-ci il 1 aprel tarixinə olan qiymətlərlə 5 milyard rubl məbləğində ziyan vurulub. Bütün bu faktları danmaq, özlüyündə anti-Azərbaycan mövqeyinin nümayişidir. Təkcə XX əsrdə ermənilər azərbaycanlılara qarşı 1905-06, 1918-20,1946-53, 1988-93-cü illərdə soyqırım törədiblər. Bu gün erməniləri müdafiə adı ilə onlardan Türkiyəyə və Azərbaycana, ümumən güclənməkdə olan türk dünyasına qarşı təsir vasitəsi kimi istifadə edən bəzi Qərb və Avropa dövətləri ermənilərin cinayət əməllərini bilərəkdən gizlətməyə çalışırlar ki, bunun nəticəsində də yeni saxta iddialar meydana gəlir.
Nəticə etibarı ilə, qərəzli erməni təbliğatı maşınının fəallaşması Azərbaycan və Türkiyənin dövlət başçılarının dünya siyasətindəki qətiyyətli və prinsipial mövqeyinə münasibətdə ictimai rəyə təsir göstərmək istəyini açıq-aşkar biruzə verir” - deyə D.Osmanlı bildirdi.
İradə SARIYEVA
