Ermənistanın Zəngəzur dəhlizi ilə bağlı həyasızlığı səngimək bilmir. Ermənistan parlamentinin Xarici Əlaqələr Komissiyasının sədri, hakim “Vətəndaş müqaviləsi” partiyasından olan deputat Eduard Ağacanyan bəyan edib ki, Laçın dəhlizi heç bir halda Zəngəzur dəhlizi ilə müqayisə oluna bilməz:
“Ermənistanın Zəngəzur dəhlizi vermək öhdəliyi yoxdur. Ermənistan Zəngəzur dəhlizi ilə bağlı heç vaxt belə bir öhdəlik götürməyib. Söhbət yolların açılmasından gedir. Dəhliz Ermənistan üçün qırmızı xətdir. Laçın dəhlizi heç bir halda Zəngəzur dəhlizi ilə müqayisə oluna bilməz. Bu məsələ ilə bağlı mövqeyimiz heç vaxt dəyişməyib və dəyişməyəcək. Azərbaycanın hədələyici bəyanatları Ermənistan tərəfinin ifadə etdiyi mövqelərə təsir edə və ya dəyişdirə bilməz”.
Görünən odur ki, Zəngəzur dəhlizi məsələsi Ermənistan rəsmilərinə rahatlıq vermir. Hər dəfə bütün vasitələrlə bunu inkar etməyə və yaxın buraxmamağa çalışırlar.
“Ağacanyan kimiləri yaxşı bilirlər ki, Zəngəzur dəhlizi bir az ləng ola bilər, ancaq bu dəhliz mütləq açılacaq”
Məsələyə münasibət bildirən AMİP-in sədr müavini Afsəddin Nəbiyev Ermənistanın Zəngəzur dəhlizi ilə bağlı təlaşını bir sıra faktorlarla əlaqələndirdi: “Ermənistanın bir çox siyasilərinin Azərbaycan əleyhinə apardıqları təbliğatın kökündə Rusiya, Fransa, İran kimi dövlətlər dayanır. Deyərdim ki, Ermənistan sülh müqaviləsini imzalamağa hazır olduğunu bəyan etsə belə, bu dövlətlər bütün vasitələrlə sülh müqaviləsinin imzalanmasına əngəl olmağa çalışacaqlar. Çünki onlar Ermənistana dövlət kimi yox, maşa kimi baxırlar. Bütün dünya da bilir ki, bu xalqı bədbəxt edən bu dövlətlərdir. Bunu dərk etməyən erməni siyasiləri bu dövlətlərin şirnikləndirici vədlərindən cuşa gələrək bəzi hallarda barış ritorikasını dəyişirlər. Təbii ki, belə bir vəziyyətin erməni xalqına heç bir faydası olmayacaq. Elə erməni deputatı Eduard Ağacanyanın Zəngəzur dəhlizi ilə bağlı etdiyi çıxış da yuxarıda sadalanan faktorların tərkib hissəsidir. Ağacanyan kimiləri yaxşı bilirlər ki, Zəngəzur dəhlizi bir az ləng ola bilər, ancaq bu dəhliz mütləq açılacaq. Özü də erməni ictimaiyyəti yaxşı bilir ki, 10 noyabr Bəyanatını imzalayıb öhdəlik götürən Ermənistan bu öhdəliyi əvvəl-axır yerinə yetirməli olacaq. Bəyanatda Ermənistan Azərbaycanla Naxçıvan arasında nəqliyyat kommunikasiyalarının maneəsiz hərəkətini təmin etməyi öz öhdəsinə götürüb. Laçın dəhlizi ilə bağlı həmin sənəddə maneəsiz hərəkət anlayışı yoxdur. Əslində bu şərtlər bizə əlavə üstünlüklər qazandırır. Eyni zamanda belə müqavilələr beynəlxalq hüququn prinsip və normaları ilə tənzimlənir. Üçtərəfli Bəyanatın 9-cu bəndində söhbət, yuxarıda ifadə etdiyim kimi, nəqliyyat vasitələrinin və yüklərin hər iki istiqamətdə maneəsiz hərəkətinin təşkilindən gedir. Bu isə dövlətlərarası və həm də xüsusi statusa malik olan dəhliz deməkdir. Maneəsiz hərəkət yüklərin, nəqliyyat vasitələrinin və vətəndaşların sərhəd, gömrük və digər xidmətlərin iştirakı olmadan fasiləsiz hərəkətinin təmin edilməsi anlamına gəlir. Beynəlxalq konvensiyalarda bu prinsiplər əsas götürülür”.
A.Nəbiyevin fikrincə, bütün konvensiyalarda dövlətlərarası razılaşmalar əsas götürülür: “Və 2020 -ci il noyabrın 10-da imzalanmış Bəyanatda həm də üçüncü – zəmanətçi tərəf var. Bu, həm “Beynəlxalq razılaşmalar hüququ” haqqında Vyana Konvensiyasının, həm də Beynəlxalq Hüququn prinsipləri haqqında Bəyannamənin müvafiq müddəalarına uyğun olaraq, razılaşmaya imza atan bütün tərəflərin, o cümlədən zəmanətçi ölkənin öhdəliklərini yerinə yetirməyə borclu olduğunu, buna görə hüquqi məsuliyyət daşıdığını ortaya qoyur. Buradan belə bir nəticəyə gəlmək mümkündür ki, Ermənistan tərəfi bu müqavilənin şərtlərinə əməl etməyəcəksə, o zaman Azərbaycan tərəfi bu müqavilədə Ermənistana etdiyi bütün güzəştlərdən onu məhrum edə bilər. Sadəcə, indi elə bir vəziyyətdir ki, erməni siyasətçiləri mövcud vəziyyəti bir az uzatmaqla vaxt qazanmağa çalışırlar. Buna necə nail "olacaqlar", bunu zaman göstərəcək. Ermənistan siyasi rəhbərliyi sülh üçün şansları qaçırdıqca daha çətin durumla üz-üzə qalacaq”.
Sədr müavini onu da əlavə etdi ki, Azərbaycan dövlətinin dəmir iradəsi öz yerindədir.
Vidadi ORDAHALLI
