Noyabrın 10-da Ermənistanın baş naziri Nikol Paşinyan hökumətin iclasında deyib ki, güya Azərbaycan “Dağlıq Qarabağın” ( İfadə Paşinyana məxsusdur- red.) erməni əhalisinin soyqırımını hazırlayır.
Onun sözlərinə görə, Azərbaycan hakimiyyəti beynəlxalq platformalarda “Dağlıq Qarabağ” nümayəndələri ilə dialoqa başlamaq üçün hələ də heç bir addım atmayıb, üzərinə düşən öhdəlikləri yerinə yetirməyib:
“Bakı özünü konstruktiv tərəf kimi göstərməyə cəhd edir və bəyan edir ki, “Dağlıq Qarabağ” erməniləri Azərbaycan vətəndaşlarıdır, onların hüquqları və təhlükəsizliyi təmin edilir. 44 günlük müharibə nəticəsində qovulmuş Hadrut və “Dağlıq Qarabağ”ın digər yaşayış məntəqələrinin minlərlə sakininin öz evlərinə qayıtması üçün Azərbaycanın hansı şəraiti yaratdığını xatırlayanda bu bəyanatın nə dərəcədə doğru olduğunu təsəvvür etmək olar”. Göründüyü kimi, Paşinyan növbəti yalana start verib. Bu dəfə Azərbaycanın ünvanına iki hədyanı birdən yağdırır. Güya Azərbaycan Qarabağdakı ermənilərə qarşı soyqırım hazırlayır və üzərinə götürdüyü hansısa beynəlxalq dialoqla bağlı öhdəliyi yerinə yetirmir. Paşinyanın bu sərsəmləməsinin arxasında hansı məqsədlər dura bilər?
Politoloq Əhəd Məmmədli “Bakı-Xəbər”ə açıqlamasında bildirdi ki, bu, ermənilərin çoxdankı təbliğatıdır: “Onlar bir necə ildir bu tezisi dövriyəyə buraxıblar ki, güya birgə yayış zərurəti yaranarsa, Azərbaycan orada yaşayan erməniləri soyqırıma məruz qoyacaq və yerdə qalanlarını da etnik təmizləmə apararaq oradan çıxaracaq. Görünən budur ki, ermənilər bu yalana böyük meyli olan bəzi ölkələri buna inandıra da bilib. Xüsusilə də Rusiya və Fransa bu istiqamətdə ciddi fəallıq göstərir. Bu da həmin ölkələrin anti-türk mahiyyətindən irəli gəlir. Azərbaycanın bütün vətəndaşları qarşısında onların təhlükəsizliyinə təminat vermək kimi öhdəliyi var. Bu məsələ bizim daxili işimizdi. Heç bir ölkə və o cümlədən də Ermənistan bu məsələyə müdaxilə edə bilməz. Paşinyan rus sülhməramlılarına çox arxayın olduğu üçün belə danışır. Fransa və ABŞ-a da çox güvənir ki, onu qoruyacaqlar. Soyqırım törədən daim ermənilər olub. Çox da uzağa getməyən Xocalı tarixi buna bariz sübutdur. Azərbaycan düşməni sülhə təhrik etmə ilə bağlı daha bir əməliyyat həyata keçirməlidir. Əməliyyatın həcmi daha böyük olmalıdır. Ermənilər güc görəndə hesablaşır. Gördünüzmü, 44 günlük müharibədə rayonları boşaltmaqla bağlı öhdəliyi necə tez yerinə yetirdilər? Çünki yumruq başlarına yeni dəymişdi. Təsiri gedən kimi yayınırlar. Ciddi təzyiq hiss etməsələr ağıllanan deyillər. Ermənistanın öz politoloqları deyir ki, Azərbaycan Ermənistanı növbəti bir hücum əməliyyatı ilə hədələməsə, sülh müqaviləsi imzalanmayacaq. Özünü arxayın saydığına görədir ki, Paşinyan bizə növbəti şər-böhtanlarını yağdırır. Bizim Ermənistan qarşısında heç bir beynəlxalq dialoqla bağlı öhdəliyimiz yoxdur. Öhdəlik ermənilərdə var. Onları da yerinə yetirmirlər”.
Məhəmmədəli QƏRİBLİ
